൯. തോദേയ്യമാണവപുച്ഛാനിദ്ദേസോ

൫൭. യസ്മിം കാമാ ന വസന്തി, [ഇച്ചായസ്മാ തോദേയ്യോ]

തണ്ഹാ യസ്സ ന വിജ്ജതി;

കഥംകഥാ ച യോ തിണ്ണോ, വിമോക്ഖോ തസ്സ കീദിസോ.

യസ്മിം കാമാ ന വസന്തീതി യസ്മിം കാമാ ന വസന്തി ന സംവസന്തി ന ആവസന്തി ന പരിവസന്തീതി – യസ്മിം കാമാ ന വസന്തി. ഇച്ചായസ്മാ തോദേയ്യോതി. ഇച്ചാതി പദസന്ധി…പേ… പദാനുപുബ്ബതാപേതം – ഇച്ചാതി. ആയസ്മാതി പിയവചനം…പേ…. തോദേയ്യോതി തസ്സ ബ്രാഹ്മണസ്സ നാമം…പേ… അഭിലാപോതി – ഇച്ചായസ്മാ തോദേയ്യോ.

തണ്ഹാ യസ്സ ന വിജ്ജതീതി തണ്ഹാ യസ്സ നത്ഥി ന സതി ന സംവിജ്ജതി നുപലബ്ഭതി ഞാണഗ്ഗിനാ ദഡ്ഢാതി – തണ്ഹാ യസ്സ ന വിജ്ജതി.

കഥംകഥാ ച യോ തിണ്ണോതി കഥംകഥാ ച യോ തിണ്ണോ ഉത്തിണ്ണോ നിത്ഥിണ്ണോ അതിക്കന്തോ സമതിക്കന്തോ വീതിവത്തോതി – കഥംകഥാ ച യോ തിണ്ണോ.

വിമോക്ഖോ തസ്സ കീദിസോതി വിമോക്ഖോ തസ്സ കീദിസോ കിംസണ്ഠിതോ കിംപകാരോ കിംപടിഭാഗോ ഇച്ഛിതബ്ബോതി വിമോക്ഖം പുച്ഛതീതി – വിമോക്ഖോ തസ്സ കീദിസോ. തേനാഹ സോ ബ്രാഹ്മണോ –

‘‘യസ്മിം കാമാ ന വസന്തി, [ഇച്ചായസ്മാ തോദേയ്യോ]

തണ്ഹാ യസ്സ ന വിജ്ജതി;

കഥംകഥാ ച യോ തിണ്ണോ, വിമോക്ഖോ തസ്സ കീദിസോ’’തി.

൫൮. യസ്മിം കാമാ ന വസന്തി, [തോദേയ്യാതി ഭഗവാ]

തണ്ഹാ യസ്സ ന വിജ്ജതി;

കഥംകഥാ ച യോ തിണ്ണോ, വിമോക്ഖോ തസ്സ നാപരോ.

യസ്മിം കാമാ ന വസന്തീതി. യസ്മിന്തി യസ്മിം പുഗ്ഗലേ അരഹന്തേ ഖീണാസവേ. കാമാതി ഉദ്ദാനതോ ദ്വേ കാമാ – വത്ഥുകാമാ ച കിലേസകാമാ ച…പേ… ഇമേ വുച്ചന്തി വത്ഥുകാമാ…പേ… ഇമേ വുച്ചന്തി കിലേസകാമാ. യസ്മിം കാമാ ന വസന്തീതി യസ്മിം കാമാ ന വസന്തി ന സംവസന്തി ന ആവസന്തി ന പരിവസന്തീതി – യസ്മിം കാമാ ന വസന്തി.

തോദേയ്യാതി ഭഗവാതി. തോദേയ്യാതി ഭഗവാ തം ബ്രാഹ്മണം നാമേന ആലപതി. ഭഗവാതി ഗാരവാധിവചനമേതം…പേ… സച്ഛികാ പഞ്ഞത്തി, യദിദം ഭഗവാതി – തോദേയ്യാതി ഭഗവാ.

തണ്ഹാ യസ്സ ന വിജ്ജതീതി. തണ്ഹാതി രൂപതണ്ഹാ സദ്ദതണ്ഹാ ഗന്ധതണ്ഹാ രസതണ്ഹാ ഫോട്ഠബ്ബതണ്ഹാ ധമ്മതണ്ഹാ. യസ്സാതി അരഹതോ ഖീണാസവസ്സ. തണ്ഹാ യസ്സ ന വിജ്ജതീതി തണ്ഹാ യസ്സ നത്ഥി ന സതി ന സംവിജ്ജതി നുപലബ്ഭതി, പഹീനാ സമുച്ഛിന്നാ വൂപസന്താ പടിപ്പസ്സദ്ധാ അഭബ്ബുപ്പത്തികാ ഞാണഗ്ഗിനാ ദഡ്ഢാതി – തണ്ഹാ യസ്സ ന വിജ്ജതി.

കഥംകഥാ ച യോ തിണ്ണോതി കഥംകഥാ വുച്ചതി വിചികിച്ഛാ. ദുക്ഖേ കങ്ഖാ…പേ… ഛമ്ഭിതത്തം ചിത്തസ്സ മനോവിലേഖോ. യോതി യോ സോ അരഹം ഖീണാസവോ. കഥംകഥാ ച യോ തിണ്ണോതി കഥംകഥാ ച യോ തിണ്ണോ ഉത്തിണ്ണോ നിത്ഥിണ്ണോ അതിക്കന്തോ സമതിക്കന്തോ വീതിവത്തോതി – കഥംകഥാ ച യോ തിണ്ണോ.

വിമോക്ഖോ തസ്സ നാപരോതി നത്ഥി തസ്സ അപരോ വിമോക്ഖോ. യേന വിമോക്ഖേന വിമുച്ചേയ്യ വിമുത്തോ സോ. കതം തസ്സ വിമോക്ഖേന കരണീയന്തി – വിമോക്ഖോ തസ്സ നാപരോ. തേനാഹ ഭഗവാ –

‘‘യസ്മിം കാമാ ന വസന്തി, [തോദേയ്യാതി ഭഗവാ]

തണ്ഹാ യസ്സ ന വിജ്ജതി;

കഥംകഥാ ച യോ തിണ്ണോ, വിമോക്ഖോ തസ്സ നാപരോ’’തി.

൫൯. നിരാസസോ സോ ഉദ ആസസാനോ, പഞ്ഞാണവാ സോ ഉദ പഞ്ഞകപ്പീ;

മുനിം അഹം സക്ക യഥാ വിജഞ്ഞം, തം മേ വിയാചിക്ഖ സമന്തചക്ഖു.

നിരാസസോ സോ ഉദ ആസസാനോതി നിത്തണ്ഹോ സോ, ഉദാഹു സതണ്ഹോ രൂപേ ആസീസതി [ആസിംസതി (സ്യാ.)], സദ്ദേ…പേ… ഗന്ധേ… രസേ… ഫോട്ഠബ്ബേ… കുലം… ഗണം… ആവാസം… ലാഭം… യസം… പസംസം… സുഖം… ചീവരം… പിണ്ഡപാതം… സേനാസനം… ഗിലാനപച്ചയഭേസജ്ജപരിക്ഖാരം… കാമധാതും … രൂപധാതും… അരൂപധാതും… കാമഭവം… രൂപഭവം… അരൂപഭവം… സഞ്ഞാഭവം… അസഞ്ഞാഭവം… നേവസഞ്ഞാനാസഞ്ഞാഭവം… ഏകവോകാരഭവം… ചതുവോകാരഭവം… പഞ്ചവോകാരഭവം… അതീതം… അനാഗതം… പച്ചുപ്പന്നം… ദിട്ഠസുതമുതവിഞ്ഞാതബ്ബേ ധമ്മേ ആസീസതി സാദിയതി പത്ഥേതി പിഹേതി അഭിജപ്പതീതി – നിരാസസോ സോ ഉദ ആസസാനോ.

പഞ്ഞാണവാ സോ ഉദ പഞ്ഞകപ്പീതി. പഞ്ഞാണവാ സോതി പണ്ഡിതോ പഞ്ഞവാ ബുദ്ധിമാ ഞാണീ വിഭാവീ മേധാവീ. ഉദ പഞ്ഞകപ്പീതി ഉദാഹു അട്ഠസമാപത്തിഞാണേന വാ പഞ്ചാഭിഞ്ഞാഞാണേന വാ മിച്ഛാഞാണേന വാ തണ്ഹാകപ്പം വാ ദിട്ഠികപ്പം വാ കപ്പേതി ജനേതി സഞ്ജനേതി നിബ്ബത്തേതി അഭിനിബ്ബത്തേതീതി – പഞ്ഞാണവാ സോ ഉദ പഞ്ഞകപ്പീ.

മുനിം അഹം സക്ക യഥാ വിജഞ്ഞന്തി. സക്കാതി സക്കോ ഭഗവാ. സക്യകുലാ പബ്ബജിതോതിപി സക്കോ. അഥ വാ, അഡ്ഢോ മഹദ്ധനോ ധനവാതിപി സക്കോ. തസ്സിമാനി ധനാനി, സേയ്യഥിദം – സദ്ധാധനം സീലധനം ഹിരിധനം ഓത്തപ്പധനം സുതധനം ചാഗധനം പഞ്ഞാധനം സതിപട്ഠാനധനം സമ്മപ്പധാനധനം ഇദ്ധിപാദധനം ഇന്ദ്രിയധനം ബലധനം ബോജ്ഝങ്ഗധനം മഗ്ഗധനം ഫലധനം നിബ്ബാനധനന്തി. തേഹി അനേകവിധേഹി ധനരതനേഹി അഡ്ഢോ മഹദ്ധനോ ധനവാതിപി സക്കോ. അഥ വാ, പഹു വിസവീ അലമത്തോ സൂരോ വീരോ വിക്കന്തോ അഭീരൂ അച്ഛമ്ഭീ അനുത്രാസീ അപലായീ പഹീനഭയഭേരവോ വിഗതലോമഹംസോതിപി സക്കോ. മുനിം അഹം സക്ക യഥാ വിജഞ്ഞന്തി സക്ക യഥാഹം മുനിം ജാനേയ്യം ആജാനേയ്യം വിജാനേയ്യം പടിവിജാനേയ്യം പടിവിജ്ഝേയ്യന്തി – മുനിം അഹം സക്ക യഥാ വിജഞ്ഞം.

തം മേ വിയാചിക്ഖ സമന്തചക്ഖൂതി. തന്തി യം പുച്ഛാമി യം യാചാമി യം അജ്ഝേസാമി യം പസാദേമി. വിയാചിക്ഖാതി ആചിക്ഖാഹി ദേസേഹി പഞ്ഞപേഹി പട്ഠപേഹി വിവരാഹി വിഭജാഹി ഉത്താനീകരോഹി പകാസേഹി. സമന്തചക്ഖൂതി സമന്തചക്ഖു വുച്ചതി സബ്ബഞ്ഞുതഞാണം…പേ… തഥാഗതോ തേന സമന്തചക്ഖൂതി – തം മേ വിയാചിക്ഖ സമന്തചക്ഖു. തേനാഹ സോ ബ്രാഹ്മണോ –

‘‘നിരാസസോ സോ ഉദ ആസസാനോ, പഞ്ഞാണവാ സോ ഉദ പഞ്ഞകപ്പീ;

മുനിം അഹം സക്ക യഥാ വിജഞ്ഞം, തം മേ വിയാചിക്ഖ സമന്തചക്ഖൂ’’തി.

൬൦. നിരാസസോ സോ ന ച ആസസാനോ, പഞ്ഞാണവാ സോ ന ച പഞ്ഞകപ്പീ;

ഏവമ്പി തോദേയ്യ മുനിം വിജാന, അകിഞ്ചനം കാമഭവേ അസത്തം.

നിരാസസോ സോ ന ച ആസസാനോതി നിത്തണ്ഹോ സോ. ന സോ സതണ്ഹോ രൂപേ നാസീസതി. സദ്ദേ…പേ… ഗന്ധേ… ദിട്ഠസുതമുതവിഞ്ഞാതബ്ബേ ധമ്മേ നാസീസതി ന ഇച്ഛതി ന സാദിയതി ന പത്ഥേതി ന പിഹേതി നാഭിജപ്പതീതി – നിരാസസോ സോ ന ച ആസസാനോ.

പഞ്ഞാണവാ സോ ന ച പഞ്ഞകപ്പീതി. പഞ്ഞാണവാതി പണ്ഡിതോ പഞ്ഞവാ ബുദ്ധിമാ ഞാണീ വിഭാവീ മേധാവീ. ന ച പഞ്ഞകപ്പീതി അട്ഠസമാപത്തിഞാണേന വാ പഞ്ചാഭിഞ്ഞാഞാണേന വാ മിച്ഛാഞാണേന വാ തണ്ഹാകപ്പം വാ ന കപ്പേതി ദിട്ഠികപ്പം വാ ന കപ്പേതി ന ജനേതി ന സഞ്ജനേതി ന നിബ്ബത്തേതി നാഭിനിബ്ബത്തേതീതി – പഞ്ഞാണവാ സോ ന ച പഞ്ഞകപ്പീ.

ഏവമ്പി തോദേയ്യ മുനിം വിജാനാതി. മുനീതി മോനം വുച്ചതി ഞാണം…പേ… സങ്ഗജാലമതിച്ച സോ മുനി. ഏവമ്പി തോദേയ്യ മുനിം വിജാനാതി തോദേയ്യ, ഏവം മുനിം ജാന പടിജാന പടിവിജാന പടിവിജ്ഝാതി – ഏവമ്പി തോദേയ്യ മുനിം വിജാന.

അകിഞ്ചനം കാമഭവേ അസത്തന്തി. അകിഞ്ചനന്തി രാഗകിഞ്ചനം ദോസകിഞ്ചനം മോഹകിഞ്ചനം മാനകിഞ്ചനം ദിട്ഠികിഞ്ചനം കിലേസകിഞ്ചനം ദുച്ചരിതകിഞ്ചനം. യസ്സേതാനി [യസ്സേതേ (സ്യാ.)] കിഞ്ചനാനി [കിഞ്ചനാ (സ്യാ.)] പഹീനാനി സമുച്ഛിന്നാനി വൂപസന്താനി പടിപ്പസ്സദ്ധാനി അഭബ്ബുപ്പത്തികാനി ഞാണഗ്ഗിനാ ദഡ്ഢാനി, സോ വുച്ചതി അകിഞ്ചനോ. കാമാതി ഉദ്ദാനതോ ദ്വേ കാമാ – വത്ഥുകാമാ ച കിലേസകാമാ ച…പേ… ഇമേ വുച്ചന്തി വത്ഥുകാമാ…പേ… ഇമേ വുച്ചന്തി കിലേസകാമാ. ഭവാതി ദ്വേ ഭവാ – കമ്മഭവോ ച പടിസന്ധികോ ച പുനബ്ഭവോ…പേ… അയം പടിസന്ധികോ പുനബ്ഭവോ.

അകിഞ്ചനം കാമഭവേ അസത്തന്തി അകിഞ്ചനം പുഗ്ഗലം കാമേ ച ഭവേ ച അസത്തം അലഗ്ഗം അലഗ്ഗിതം അപലിബുദ്ധം നിക്ഖന്തം നിസ്സടം വിപ്പമുത്തം വിസഞ്ഞുത്തം വിമരിയാദികതേന ചേതസാ വിഹരന്തന്തി – അകിഞ്ചനം കാമഭവേ അസത്തം. തേനാഹ ഭഗവാ –

‘‘നിരാസസോ സോ ന ച ആസസാനോ, പഞ്ഞാണവാ സോ ന ച പഞ്ഞകപ്പീ;

ഏവമ്പി തോദേയ്യ മുനിം വിജാന, അകിഞ്ചനം കാമഭവേ അസത്തന്തി.

സഹ ഗാഥാപരിയോസാനാ…പേ… സത്ഥാ മേ ഭന്തേ ഭഗവാ, സാവകോഹമസ്മീതി.

തോദേയ്യമാണവപുച്ഛാനിദ്ദേസോ നവമോ.