൧൧. ജതുകണ്ണിമാണവപുച്ഛാനിദ്ദേസോ

൬൫. സുത്വാനഹം വീര അകാമകാമിം, [ഇച്ചായസ്മാ ജതുകണ്ണി]

ഓഘാതിഗം പുട്ഠുമകാമമാഗമം;

സന്തിപദം ബ്രൂഹി സഹജനേത്ത, യഥാതച്ഛം ഭഗവാ ബ്രൂഹി മേതം.

സുത്വാനഹം വീര അകാമകാമിന്തി സുത്വാ സുണിത്വാ ഉഗ്ഗഹേത്വാ ഉപധാരേത്വാ ഉപലക്ഖയിത്വാ. ഇതിപി സോ ഭഗവാ അരഹം…പേ… ബുദ്ധോ ഭഗവാതി – സുത്വാനഹം. വീരാതി വീരോ ഭഗവാ. വീരിയവാതി വീരോ, പഹൂതി വീരോ, വിസവീതി വീരോ, അലമത്തോതി വീരോ, സൂരോതി വീരോ, വിക്കന്തോ അഭീരൂ അച്ഛമ്ഭീ അനുത്രാസീ അപലായീ പഹീനഭയഭേരവോ വിഗതലോമഹംസോതി വീരോ.

വിരതോ ഇധ സബ്ബപാപകേഹി, നിരയദുക്ഖം അതിച്ച വീരിയവാ [വിരിയവാ (സ്യാ.) സു. നി. ൫൩൬] സോ;

സോ വീരിയവാ പധാനവാ, വീരോ താദി പവുച്ചതേ തഥത്താതി.

സുത്വാനഹം വീര. അകാമകാമിന്തി. കാമാതി ഉദ്ദാനതോ ദ്വേ കാമാ – വത്ഥുകാമാ ച കിലേസകാമാ ച…പേ… ഇമേ വുച്ചന്തി വത്ഥുകാമാ…പേ… ഇമേ വുച്ചന്തി കിലേസകാമാ. ബുദ്ധസ്സ ഭഗവതോ വത്ഥുകാമാ പരിഞ്ഞാതാ, കിലേസകാമാ പഹീനാ. വത്ഥുകാമാനം പരിഞ്ഞാതത്താ കിലേസകാമാനം പഹീനത്താ ഭഗവാ ന കാമേ കാമേതി, ന കാമേ പത്ഥേതി, ന കാമേ പിഹേതി, ന കാമേ അഭിജപ്പതി. യേ കാമേ കാമേന്തി, കാമേ പത്ഥേന്തി, കാമേ പിഹേന്തി, കാമേ അഭിജപ്പന്തി, തേ കാമകാമിനോ രാഗരാഗിനോ സഞ്ഞാസഞ്ഞിനോ. ഭഗവാ ന കാമേ കാമേതി, ന കാമേ പത്ഥേതി, ന കാമേ പിഹേതി, ന കാമേ അഭിജപ്പതി. തസ്മാ ബുദ്ധോ അകാമോ നിക്കാമോ ചത്തകാമോ വന്തകാമോ മുത്തകാമോ പഹീനകാമോ പടിനിസ്സട്ഠകാമോ വീതരാഗോ വിഗതരാഗോ ചത്തരാഗോ വന്തരാഗോ മുത്തരാഗോ പഹീനരാഗോ പടിനിസ്സട്ഠരാഗോ നിച്ഛാതോ നിബ്ബുതോ സീതിഭൂതോ സുഖപ്പടിസംവേദീ ബ്രഹ്മഭൂതേന അത്തനാ വിഹരതീതി – സുത്വാനഹം വീര അമകാമകാമിം.

ഇച്ചായസ്മാ ജതുകണ്ണീതി. ഇച്ചാതി പദസന്ധി…പേ… പദാനുപുബ്ബതാപേതം – ഇച്ചാതി. ആയസ്മാതി പിയവചനം സഗാരവസപ്പതിസ്സാധിവചനമേതം ആയസ്മാതി. ജതുകണ്ണീതി തസ്സ ബ്രാഹ്മണസ്സ ഗോത്തം സങ്ഖാ സമഞ്ഞാ പഞ്ഞത്തി വോഹാരോതി – ഇച്ചായസ്മാ ജതുകണ്ണി.

ഓഘാതിഗം പുട്ഠുമകാമമാഗമന്തി. ഓഘാതിഗന്തി ഓഘാതിഗം ഓഘം അതിക്കന്തം സമതിക്കന്തം വീതിവത്തന്തി – ഓഘാതിഗം. പുട്ഠുന്തി പുട്ഠും പുച്ഛിതും യാചിതും അജ്ഝേസിതും പസാദേതും. അകാമമാഗമന്തി അകാമം പുട്ഠും നിക്കാമം ചത്തകാമം വന്തകാമം മുത്തകാമം പഹീനകാമം പടിനിസ്സട്ഠകാമം വീതരാഗം വിഗതരാഗം ചത്തരാഗം വന്തരാഗം മുത്തരാഗം പഹീനരാഗം പടിനിസ്സട്ഠരാഗം ആഗമ്ഹാ ആഗതമ്ഹാ ഉപാഗതമ്ഹാ സമ്പത്തമ്ഹാ തയാ സദ്ധിം സമാഗതമ്ഹാതി – ഓഘാതിഗം പുട്ഠുമകാമമാഗമം.

സന്തിപദം ബ്രൂഹി സഹജനേത്താതി. സന്തീതി ഏകേന ആകാരേന സന്തിപി സന്തിപദമ്പി [സന്തിപദന്തി (ക.)] തംയേവ അമതം നിബ്ബാനം. യോ സോ സബ്ബസങ്ഖാരസമഥോ സബ്ബൂപധിപടിനിസ്സഗ്ഗോ തണ്ഹക്ഖയോ വിരാഗോ നിരോധോ നിബ്ബാനം. വുത്തഞ്ഹേതം ഭഗവതാ – ‘‘സന്തമേതം പദം, പണീതമേതം പദം, യദിദം സബ്ബസങ്ഖാരസമഥോ സബ്ബൂപധിപടിനിസ്സഗ്ഗോ തണ്ഹക്ഖയോ വിരാഗോ നിരോധോ നിബ്ബാന’’ന്തി. അഥാപരേനാകാരേന യേ ധമ്മാ സന്താധിഗമായ സന്തിഫുസനായ സന്തിസച്ഛികിരിയായ സംവത്തന്തി, സേയ്യഥിദം – ചത്താരോ സതിപട്ഠാനാ ചത്താരോ സമ്മപ്പധാനാ ചത്താരോ ഇദ്ധിപാദാ പഞ്ചിന്ദ്രിയാനി പഞ്ച ബലാനി സത്ത ബോജ്ഝങ്ഗാ അരിയോ അട്ഠങ്ഗികോ മഗ്ഗോ – ഇമേ വുച്ചന്തി സന്തിപദാ. സന്തിപദം താണപദം ലേണപദം സരണപദം അഭയപദം അച്ചുതപദം അമതപദം നിബ്ബാനപദം ബ്രൂഹി ആചിക്ഖാഹി ദേസേഹി പഞ്ഞപേഹി പട്ഠപേഹി വിവരാഹി വിഭജാഹി ഉത്താനീകരോഹി പകാസേഹി. സഹജനേത്താതി നേത്തം വുച്ചതി സബ്ബഞ്ഞുതഞാണം. ബുദ്ധസ്സ ഭഗവതോ നേത്തഞ്ച ജിനഭാവോ ച ബോധിയാ മൂലേ അപുബ്ബം അചരിമം ഏകസ്മിം ഖണേ ഉപ്പന്നോ, തസ്മാ ബുദ്ധോ സഹജനേത്തോതി – സന്തിപദം ബ്രൂഹി സഹജനേത്ത.

യഥാതച്ഛം ഭഗവാ ബ്രൂഹി മേതന്തി യഥാതച്ഛം വുച്ചതി അമതം നിബ്ബാനം…പേ… നിരോധോ നിബ്ബാനം. ഭഗവാതി ഗാരവാധിവചനം…പേ… സച്ഛികാ പഞ്ഞത്തി, യദിദം ഭഗവാതി. ബ്രൂഹി മേതന്തി ബ്രൂഹി ആചിക്ഖാഹി…പേ… പകാസേഹീതി – യഥാതച്ഛം ഭഗവാ ബ്രൂഹി മേതം. തേനാഹ സോ ബ്രാഹ്മണോ –

‘‘സുത്വാനഹം വീര അകാമകാമിം, [ഇച്ചായസ്മാ ജതുകണ്ണി]

ഓഘാതിഗം പുട്ഠുമകാമമാഗമം;

സന്തിപദം ബ്രൂഹി സഹജനേത്ത, യഥാതച്ഛം ഭഗവാ ബ്രൂഹി മേത’’ന്തി.

൬൬. ഭഗവാ ഹി കാമേ അഭിഭുയ്യ ഇരിയതി, ആദിച്ചോവ പഥവിം തേജീ തേജസാ;

പരിത്തപഞ്ഞസ്സ മേ ഭൂരിപഞ്ഞോ, ആചിക്ഖ ധമ്മം യമഹം വിജഞ്ഞം;

ജാതിജരായ ഇധ വിപ്പഹാനം.

ഭഗവാ ഹി കാമേ അഭിഭുയ്യ ഇരിയതീതി. ഭഗവാതി ഗാരവാധിവചനം…പേ… സച്ഛികാ പഞ്ഞത്തി, യദിദം ഭഗവാതി. കാമാതി ഉദ്ദാനതോ ദ്വേ കാമാ – വത്ഥുകാമാ ച കിലേസകാമാ ച…പേ… ഇമേ വുച്ചന്തി വത്ഥുകാമാ…പേ… ഇമേ വുച്ചന്തി കിലേസകാമാ. ഭഗവാ വത്ഥുകാമേ പരിജാനിത്വാ കിലേസകാമേ പഹായ അഭിഭുയ്യ അഭിഭവിത്വാ അജ്ഝോത്ഥരിത്വാ പരിയാദിയിത്വാ ചരതി വിഹരതി ഇരിയതി വത്തേതി പാലേതി യപേതി യാപേതീതി – ഭഗവാ ഹി കാമേ അഭിഭുയ്യ ഇരിയതി.

ആദിച്ചോവ പഥവിം തേജീ തേജസാതി ആദിച്ചോ വുച്ചതി സൂരിയോ [സുരിയോ (സ്യാ.)]. പഥവീ വുച്ചതി ജഗതീ [ജരാ (സ്യാ.)]. യഥാ സൂരിയോ തേജീ തേജേന സമന്നാഗതോ പഥവിം അഭിഭുയ്യ അഭിഭവിത്വാ അജ്ഝോത്ഥരിത്വാ പരിയാദിയിത്വാ സന്താപയിത്വാ സബ്ബം ആകാസഗതം തമഗതം അഭിവിഹച്ച അന്ധകാരം വിധമിത്വാ ആലോകം ദസ്സയിത്വാ ആകാസേ അന്തലിക്ഖേ ഗഗനപഥേ [ഗമനപഥേ (സ്യാ.) അട്ഠകഥാ ഓലോകേതബ്ബാ] ഗച്ഛതി, ഏവമേവ ഭഗവാ ഞാണതേജീ ഞാണതേജേന സമന്നാഗതോ സബ്ബം അഭിസങ്ഖാരസമുദയം…പേ… കിലേസതമം അവിജ്ജന്ധകാരം വിധമിത്വാ ഞാണാലോകം ദസ്സേത്വാ വത്ഥുകാമേ പരിജാനിത്വാ കിലേസകാമേ പഹായ അഭിഭുയ്യ അഭിഭവിത്വാ അജ്ഝോത്ഥരിത്വാ പരിയാദിയിത്വാ മദ്ദിത്വാ ചരതി വിഹരതി ഇരിയതി വത്തേതി പാലേതി യപേതി യാപേതീതി – ആദിച്ചോവ പഥവിം തേജീ തേജസാ.

പരിത്തപഞ്ഞസ്സ മേ ഭൂരിപഞ്ഞോതി അഹമസ്മി പരിത്തപഞ്ഞോ ഓമകപഞ്ഞോ ലാമകപഞ്ഞോ ഛതുക്കപഞ്ഞോ. ത്വമ്പി മഹാപഞ്ഞോ പുഥുപഞ്ഞോ ഹാസപഞ്ഞോ ജവനപഞ്ഞോ തിക്ഖപഞ്ഞോ നിബ്ബേധികപഞ്ഞോ. ഭൂരി വുച്ചതി പഥവീ. ഭഗവാ തായ പഥവിസമായ പഞ്ഞായ വിപുലായ വിത്ഥതായ സമന്നാഗതോതി – പരിത്തപഞ്ഞസ്സ മേ ഭൂരിപഞ്ഞോ.

ആചിക്ഖ ധമ്മം യമഹം വിജഞ്ഞന്തി. ധമ്മന്തി ആദികല്യാണം മജ്ഝേകല്യാണം പരിയോസാനകല്യാണം സാത്ഥം സബ്യഞ്ജനം കേവലപരിപുണ്ണം പരിസുദ്ധം ബ്രഹ്മചരിയം, ചത്താരോ സതിപട്ഠാനേ…പേ… നിബ്ബാനഞ്ച നിബ്ബാനഗാമിനിഞ്ച പടിപദം ആചിക്ഖാഹി ദേസേഹി പഞ്ഞപേഹി പട്ഠപേഹി വിവരാഹി വിഭജാഹി ഉത്താനീകരോഹി പകാസേഹി. യമഹം വിജഞ്ഞന്തി യമഹം ജാനേയ്യം ആജാനേയ്യം വിജാനേയ്യം പടിജാനേയ്യം പടിവിജ്ഝേയ്യം അധിഗച്ഛേയ്യം ഫസ്സേയ്യം സച്ഛികരേയ്യന്തി – ആചിക്ഖ ധമ്മം യമഹം വിജഞ്ഞം.

ജാതിജരായ ഇധ വിപ്പഹാനന്തി ഇധേവ ജാതിജരായ മരണസ്സ പഹാനം വൂപസമം പടിനിസ്സഗ്ഗം പടിപ്പസ്സദ്ധിം അമതം നിബ്ബാനന്തി – ജാതിജരായ ഇധ വിപ്പഹാനം. തേനാഹ സോ ബ്രാഹ്മണോ –

‘‘ഭഗവാ ഹി കാമേ അഭിഭുയ്യ ഇരിയതി, ആദിച്ചോവ പഥവിം തേജീ തേജസാ;

പരിത്തപഞ്ഞസ്സ മേ ഭൂരിപഞ്ഞോ, ആചിക്ഖ ധമ്മം യമഹം വിജഞ്ഞം;

ജാതിജരായ ഇധ വിപ്പഹാന’’ന്തി.

൬൭. കാമേസു വിനയ ഗേധം, [ജതുകണ്ണീതി ഭഗവാ]

നേക്ഖമ്മം ദട്ഠു ഖേമതോ;

ഉഗ്ഗഹിതം നിരത്തം വാ, മാ തേ വിജ്ജിത്ഥ കിഞ്ചനം.

കാമേസു വിനയ ഗേധന്തി. കാമാതി ഉദ്ദാനതോ ദ്വേ കാമാ – വത്ഥുകാമാ ച കിലേസകാമാ ച…പേ… ഇമേ വുച്ചന്തി വത്ഥുകാമാ…പേ… ഇമേ വുച്ചന്തി കിലേസകാമാ. ഗേധന്തി ഗേധോ വുച്ചതി തണ്ഹാ. യോ രാഗോ സാരാഗോ…പേ… അഭിജ്ഝാ ലോഭോ അകുസലമൂലം. കാമേസു വിനയ ഗേധന്തി കാമേസു ഗേധം വിനയ പടിവിനയ പജഹ വിനോദേഹി ബ്യന്തീകരോഹി അനഭാവം ഗമേഹീതി – കാമേസു വിനയ ഗേധം. ജതുകണ്ണീതി ഭഗവാ തം ബ്രാഹ്മണം ഗോത്തേന ആലപതി. ഭഗവാതി ഗാരവാധിവചനമേതം…പേ… സച്ഛികാ പഞ്ഞത്തി, യദിദം ഭഗവാതി – ജതുകണ്ണീതി ഭഗവാ.

നേക്ഖമ്മം ദട്ഠു ഖേമതോതി. നേക്ഖമ്മന്തി സമ്മാപടിപദം അനുലോമപടിപദം അപച്ചനീകപടിപദം അന്വത്ഥപടിപദം ധമ്മാനുധമ്മപടിപദം സീലേസു പരിപൂരകാരിതം ഇന്ദ്രിയേസു ഗുത്തദ്വാരതം ഭോജനേ മത്തഞ്ഞുതം ജാഗരിയാനുയോഗം സതിസമ്പജഞ്ഞം ചത്താരോ സതിപട്ഠാനേ ചത്താരോ സമ്മപ്പധാനേ ചത്താരോ ഇദ്ധിപാദേ പഞ്ചിന്ദ്രിയാനി പഞ്ച ബലാനി സത്ത ബോജ്ഝങ്ഗേ അരിയം അട്ഠങ്ഗികം മഗ്ഗം നിബ്ബാനഞ്ച നിബ്ബാനഗാമിനിഞ്ച പടിപദം ഖേമതോ താണതോ ലേണതോ സരണതോ സരണീഭൂതതോ അഭയതോ അച്ചുതതോ അമതതോ നിബ്ബാനതോ ദട്ഠും പസ്സിത്വാ തുലയിത്വാ തീരയിത്വാ വിഭാവയിത്വാ വിഭൂതം കത്വാതി – നേക്ഖമ്മം ദട്ഠു ഖേമതോ.

ഉഗ്ഗഹിതം നിരത്തം വാതി. ഉഗ്ഗഹിതന്തി തണ്ഹാവസേന ദിട്ഠിവസേന ഗഹിതം പരാമട്ഠം അഭിനിവിട്ഠം അജ്ഝോസിതം അധിമുത്തം. നിരത്തം വാതി നിരത്തം വാ മുഞ്ചിതബ്ബം വിജഹിതബ്ബം വിനോദിതബ്ബം ബ്യന്തീകാതബ്ബം അനഭാവം ഗമേതബ്ബന്തി – ഉഗ്ഗഹിതം നിരത്തം വാ.

മാ തേ വിജ്ജിത്ഥ കിഞ്ചനന്തി രാഗകിഞ്ചനം ദോസകിഞ്ചനം മോഹകിഞ്ചനം മാനകിഞ്ചനം ദിട്ഠികിഞ്ചനം കിലേസകിഞ്ചനം ദുച്ചരിതകിഞ്ചനം. ഇദം കിഞ്ചനം [ഇമേ കിഞ്ചനാ (ക.)] തുയ്ഹം മാ വിജ്ജിത്ഥ മാ പവിജ്ജിത്ഥ മാ സംവിജ്ജിത്ഥ പജഹ വിനോദേഹി ബ്യന്തീകരോഹി അനഭാവം ഗമേഹീതി – മാ തേ വിജ്ജിത്ഥ കിഞ്ചനം. തേനാഹ ഭഗവാ –

‘‘കാമേസു വിനയ ഗേധം, [ജതുകണ്ണീതി ഭഗവാ]

നേക്ഖമ്മം ദട്ഠു ഖേമതോ;

ഉഗ്ഗഹിതം നിരത്തം വാ, മാ തേ വിജ്ജിത്ഥ കിഞ്ചന’’ന്തി.

൬൮. യം പുബ്ബേ തം വിസോസേഹി, പച്ഛാ തേ മാഹു കിഞ്ചനം;

മജ്ഝേ ചേ നോ ഗഹേസ്സസി, ഉപസന്തോ ചരിസ്സസി.

യം പുബ്ബേ തം വിസോസേഹീതി അതീതേ സങ്ഖാരേ ആരബ്ഭ യേ കിലേസാ ഉപ്പജ്ജേയ്യും തേ കിലേസേ സോസേഹി വിസോസേഹി സുക്ഖാപേഹി വിസുക്ഖാപേഹി അബീജം കരോഹി പജഹ വിനോദേഹി ബ്യന്തീകരോഹി അനഭാവം ഗമേഹീതി – ഏവമ്പി യം പുബ്ബേ തം വിസോസേഹി. അഥ വാ, യേ അതീതാ കമ്മാഭിസങ്ഖാരാ അവിപക്കവിപാകാ തേ കമ്മാഭിസങ്ഖാരേ സോസേഹി വിസോസേഹി സുക്ഖാപേഹി വിസുക്ഖാപേഹി അബീജം [അവീജം (സ്യാ.)] കരോഹി പജഹ വിനോദേഹി ബ്യന്തീകരോഹി അനഭാവം ഗമേഹീതി – ഏവമ്പി യം പുബ്ബേ തം വിസോസേഹി.

പച്ഛാ തേ മാഹു കിഞ്ചനന്തി പച്ഛാ വുച്ചതി അനാഗതേ സങ്ഖാരേ ആരബ്ഭ രാഗകിഞ്ചനം ദോസകിഞ്ചനം മോഹകിഞ്ചനം മാനകിഞ്ചനം ദിട്ഠികിഞ്ചനം കിലേസകിഞ്ചനം ദുച്ചരിതകിഞ്ചനം. ഇദം കിഞ്ചനം തുയ്ഹം മാ അഹു മാ അഹോസി മാ ജനേസി [മാ ജനേഹി (സ്യാ.) തഥാവസേസേസു ദ്വീസു പദേസുപി] മാ സഞ്ജനേസി മാഭിനിബ്ബത്തേസി പജഹ വിനോദേഹി ബ്യന്തീകരോഹി അനഭാവം ഗമേഹീതി – പച്ഛാ തേ മാഹു കിഞ്ചനം.

മജ്ഝേ ചേ നോ ഗഹേസ്സസീതി മജ്ഝേ വുച്ചതി പച്ചുപ്പന്നം രൂപം വേദനാ സഞ്ഞാ സങ്ഖാരാ വിഞ്ഞാണം. പച്ചുപ്പന്നേ സങ്ഖാരേ തണ്ഹാവസേന ദിട്ഠിവസേന ന ഗഹേസ്സസി ന തണ്ഹിസ്സസി ന പരാമസിസ്സസി ന നന്ദിസ്സസി നാഭിനന്ദിസ്സസി ന അജ്ഝോസിസ്സസി. അഭിനന്ദനം അഭിവദനം അജ്ഝോസാനം ഗാഹം പരാമാസം അഭിനിവേസം പജഹിസ്സസി വിനോദേസ്സസി ബ്യന്തീകരിസ്സസി അനഭാവം ഗമേസ്സസീതി – മജ്ഝേ ചേ നോ ഗഹേസ്സസി.

ഉപസന്തോ ചരിസ്സസീതി രാഗസ്സ ഉപസമിതത്താ ഉപസന്തോ ചരിസ്സസി, ദോസസ്സ…പേ… സബ്ബാകുസലാഭിസങ്ഖാരാനം സന്തത്താ സമിതത്താ ഉപസമിതത്താ വൂപസമിതത്താ നിജ്ഝാതത്താ നിബ്ബുതത്താ വിഗതത്താ പടിപ്പസ്സദ്ധത്താ സന്തോ ഉപസന്തോ വൂപസന്തോ നിബ്ബുതോ പടിപ്പസ്സദ്ധോ ചരിസ്സസി വിഹരിസ്സസി ഇരിയിസ്സസി വത്തിസ്സസി പാലേസ്സസി യപേസ്സസി യാപേസ്സസീതി – ഉപസന്തോ ചരിസ്സസി. തേനാഹ ഭഗവാ –

‘‘യം പുബ്ബേ തം വിസോസേഹി, പച്ഛാ തേ മാഹു കിഞ്ചനം;

മജ്ഝേ ചേ നോ ഗഹേസ്സസി, ഉപസന്തോ ചരിസ്സസീ’’തി.

൬൯. സബ്ബസോ നാമരൂപസ്മിം, വീതഗേധസ്സ ബ്രാഹ്മണ;

ആസവാസ്സ ന വിജ്ജന്തി, യേഹി മച്ചുവസം വജേ.

സബ്ബസോ നാമരൂപസ്മിം വീതഗേധസ്സ ബ്രാഹ്മണാതി. സബ്ബസോതി സബ്ബേന സബ്ബം സബ്ബഥാ സബ്ബം അസേസം നിസ്സേസം പരിയാദിയനവചനമേതം സബ്ബസോതി. നാമന്തി ചത്താരോ അരൂപിനോ ഖന്ധാ. രൂപന്തി ചത്താരോ ച മഹാഭൂതാ ചതുന്നഞ്ച മഹാഭൂതാനം ഉപാദായ രൂപം. ഗേധോ വുച്ചതി തണ്ഹാ. യോ രാഗോ സാരാഗോ…പേ… അഭിജ്ഝാ ലോഭോ അകുസലമൂലം. സബ്ബസോ നാമരൂപസ്മിം വീതഗേധസ്സ ബ്രാഹ്മണാതി സബ്ബസോ നാമരൂപസ്മിം വീതഗേധസ്സ വിഗതഗേധസ്സ ചത്തഗേധസ്സ വന്തഗേധസ്സ മുത്തഗേധസ്സ പഹീനഗേധസ്സ പടിനിസ്സട്ഠഗേധസ്സ വീതരാഗസ്സ വിഗതരാഗസ്സ ചത്തരാഗസ്സ വന്തരാഗസ്സ മുത്തരാഗസ്സ പഹീനരാഗസ്സ പടിനിസ്സട്ഠരാഗസ്സാതി – സബ്ബസോ നാമരൂപസ്മിം വീതഗേധസ്സ ബ്രാഹ്മണ.

ആസവാസ്സ ന വിജ്ജന്തീതി. ആസവാതി ചത്താരോ ആസവാ – കാമാസവോ, ഭവാസവോ, ദിട്ഠാസവോ, അവിജ്ജാസവോ. അസ്സാതി അരഹതോ ഖീണാസവസ്സ. ന വിജ്ജന്തീതി ഇമേ ആസവാ തസ്സ നത്ഥി ന സന്തി ന സംവിജ്ജന്തി നുപലബ്ഭന്തി പഹീനാ സമുച്ഛിന്നാ വൂപസന്താ പടിപ്പസ്സദ്ധാ അഭബ്ബുപ്പത്തികാ ഞാണഗ്ഗിനാ ദഡ്ഢാതി – ആസവാസ്സ ന വിജ്ജന്തി.

യേഹി മച്ചുവസം വജേതി യേഹി ആസവേഹി മച്ചുനോ വാ വസം ഗച്ഛേയ്യ, മരണസ്സ വാ വസം ഗച്ഛേയ്യ, മാരപക്ഖസ്സ വാ വസം ഗച്ഛേയ്യ; തേ ആസവാ തസ്സ നത്ഥി ന സന്തി ന സംവിജ്ജന്തി നുപലബ്ഭന്തി പഹീനാ സമുച്ഛിന്നാ വൂപസന്താ പടിപ്പസ്സദ്ധാ അഭബ്ബുപ്പത്തികാ ഞാണഗ്ഗിനാ ദഡ്ഢാതി – യേഹി മച്ചുവസം വജേ. തേനാഹ ഭഗവാ –

‘‘സബ്ബസോ നാമരൂപസ്മിം, വീതഗേധസ്സ ബ്രാഹ്മണ;

ആസവാസ്സ ന വിജ്ജന്തി, യേഹി മച്ചുവസം വജേ’’തി.

സഹ ഗാഥാപരിയോസാനാ…പേ… സത്ഥാ മേ ഭന്തേ ഭഗവാ, സാവകോഹമസ്മീതി.

ജതുകണ്ണിമാണവപുച്ഛാനിദ്ദേസോ ഏകാദസമോ.