൭. മണിരതനങ്ഗപഞ്ഹോ

൭. ‘‘ഭന്തേ നാഗസേന, ‘മണിരതനസ്സ തീണി അങ്ഗാനി ഗഹേതബ്ബാനീ’തി യം വദേസി, കതമാനി താനി തീണി അങ്ഗാനി ഗഹേതബ്ബാനീ’’തി? ‘‘യഥാ, മഹാരാജ, മണിരതനം ഏകന്തപരിസുദ്ധം, ഏവമേവ ഖോ, മഹാരാജ, യോഗിനാ യോഗാവചരേന ഏകന്തപരിസുദ്ധാജീവേന ഭവിതബ്ബം. ഇദം, മഹാരാജ, മണിരതനസ്സ പഠമം അങ്ഗം ഗഹേതബ്ബം.

‘‘പുന ചപരം, മഹാരാജ, മണിരതനം ന കേനചി സദ്ധിം മിസ്സീയതി, ഏവമേവ ഖോ, മഹാരാജ, യോഗിനാ യോഗാവചരേന പാപേഹി പാപസഹായേഹി സദ്ധിം ന മിസ്സിതബ്ബം. ഇദം, മഹാരാജ, മണിരതനസ്സ ദുതിയം അങ്ഗം ഗഹേതബ്ബം.

‘‘പുന ചപരം, മഹാരാജ, മണിരതനം ജാതിരതനേഹി യോജീയതി, ഏവമേവ ഖോ, മഹാരാജ, യോഗിനാ യോഗാവചരേന ഉത്തമവരജാതിമന്തേഹി സദ്ധിം സംവസിതബ്ബം, പടിപന്നകഫലട്ഠസേക്ഖഫലസമങ്ഗീഹി സോതാപന്നസകദാഗാമിഅനാഗാമിഅരഹന്തതേവിജ്ജഛളഭിഞ്ഞസമണമണിരതനേഹി സദ്ധിം സംവസിതബ്ബം. ഇദം, മഹാരാജ, മണിരതനസ്സ തതിയം അങ്ഗം ഗഹേതബ്ബം. ഭാസിതമ്പേതം, മഹാരാജ, ഭഗവതാ ദേവാതിദേവേന സുത്തനിപാതേ –

‘‘‘സുദ്ധാ സുദ്ധേഹി സംവാസം, കപ്പയവ്ഹോ പതിസ്സതാ;

തതോ സമഗ്ഗാ നിപകാ, ദുക്ഖസ്സന്തം കരിസ്സഥാ’’’തി.

മണിരതനപഞ്ഹോ സത്തമോ.