൮. മാഗവികങ്ഗപഞ്ഹോ

൮. ‘‘ഭന്തേ നാഗസേന, ‘മാഗവികസ്സ ചത്താരി അങ്ഗാനി ഗഹേതബ്ബാനീ’തി യം വദേസി, കതമാനി താനി ചത്താരി അങ്ഗാനി ഗഹേതബ്ബാനീ’’തി? ‘‘യഥാ, മഹാരാജ, മാഗവികോ അപ്പമിദ്ധോ ഹോതി, ഏവമേവ ഖോ, മഹാരാജ, യോഗിനാ യോഗാവചരേന അപ്പമിദ്ധേന ഭവിതബ്ബം. ഇദം, മഹാരാജ, മാഗവികസ്സ പഠമം അങ്ഗം ഗഹേതബ്ബം.

‘‘പുന ചപരം, മഹാരാജ, മാഗവികോ മിഗേസു യേവ ചിത്തം ഉപനിബന്ധതി, ഏവമേവ ഖോ, മഹാരാജ, യോഗിനാ യോഗാവചരേന ആരമ്മണേസു യേവ ചിത്തം ഉപനിബന്ധിതബ്ബം. ഇദം, മഹാരാജ, മാഗവികസ്സ ദുതിയം അങ്ഗം ഗഹേതബ്ബം.

‘‘പുന ചപരം, മഹാരാജ, മാഗവികോ കാലം കമ്മസ്സ ജാനാതി, ഏവമേവ ഖോ, മഹാരാജ, യോഗിനാ യോഗാവചരേന പടിസല്ലാനസ്സ കാലോ ജാനിതബ്ബോ ‘അയം കാലോ പടിസല്ലാനസ്സ, അയം കാലോ നിക്ഖമനായാ’തി. ഇദം, മഹാരാജ, മാഗവികസ്സ തതിയം അങ്ഗം ഗഹേതബ്ബം.

‘‘പുന ചപരം, മഹാരാജ, മാഗവികോ മിഗം ദിസ്വാ ഹാസമഭിജനേതി ‘ഇമം ലച്ഛാമീ’തി, ഏവമേവ ഖോ, മഹാരാജ, യോഗിനാ യോഗാവചരേന ആരമ്മണേ അഭിരമിതബ്ബം, ഹാസമഭിജനേതബ്ബം ‘ഉത്തരിം വിസേസമധിഗച്ഛിസ്സാമീ’തി. ഇദം, മഹാരാജ, മാഗവികസ്സ ചതുത്ഥം അങ്ഗം ഗഹേതബ്ബം. ഭാസിതമ്പേതം മഹാരാജ ഥേരേന മോഘരാജേന –

‘‘‘ആരമ്മണേ ലഭിത്വാന, പഹിതത്തേന ഭിക്ഖുനാ;

ഭിയ്യോ ഹാസോ ജനേതബ്ബോ, അധിഗച്ഛിസ്സാമി ഉത്തരി’’’ന്തി.

മാഗവികങ്ഗപഞ്ഹോ അട്ഠമോ.