൯. അഗ്ഗഗ്ഗസമണപഞ്ഹോ

൯. ‘‘ഭന്തേ നാഗസേന, ഭാസിതമ്പേതം ഭഗവതാ ‘ആസവാനം ഖയാ സമണോ ഹോതീ’തി. പുന ച ഭണിതം –

‘‘‘ചതുബ്ഭി ധമ്മേഹി സമങ്ഗിഭൂതം, തം വേ നരം സമണം ആഹു ലോകേ’തി.

തത്രിമേ ചത്താരോ ധമ്മാ ഖന്തി അപ്പാഹാരതാ രതിവിപ്പഹാനം ആകിഞ്ചഞ്ഞം. സബ്ബാനി പനേതാനി അപരിക്ഖീണാസവസ്സ സകിലേസസ്സേവ ഹോന്തി. യദി, ഭന്തേ നാഗസേന, ആസവാനം ഖയാ സമണോ ഹോതി, തേന ഹി ‘ചതുബ്ഭി ധമ്മേഹി സമങ്ഗിഭൂതം, തം വേ നരം സമണം ആഹു ലോകേ’തി യം വചനം, തം മിച്ഛാ. യദി ചതുബ്ഭി ധമ്മേഹി സമങ്ഗിഭൂതോ സമണോ ഹോതി, തേന ഹി ‘ആസവാനം ഖയാ സമണോ ഹോതീ’തി തമ്പി വചനം മിച്ഛാ, അയമ്പി ഉഭതോ കോടികോ പഞ്ഹോ തവാനുപ്പത്തോ, സോ തയാ നിബ്ബാഹിതബ്ബോ’’തി.

‘‘ഭാസിതമ്പേതം, മഹാരാജ, ഭഗവതാ ‘ആസവാനം ഖയാ സമണോ ഹോതീ’തി. പുന ച ഭണിതം ‘ചതുബ്ഭി ധമ്മേഹി സമങ്ഗിഭൂതം, തം വേ നരം സമണം ആഹു ലോകേ’തി. തദിദം, മഹാരാജ, വചനം തേസം തേസം പുഗ്ഗലാനം ഗുണവസേന ഭണിതം ‘ചതുബ്ഭി ധമ്മേഹി സമങ്ഗിഭൂതം, തം വേ നരം സമണം ആഹു ലോകേ’തി, ഇദം പന നിരവസേസവചനം ‘ആസവാനം ഖയാ സമണോ ഹോതീ’തി.

‘‘അപി ച, മഹാരാജ, യേ കേചി കിലേസൂപസമായ പടിപന്നാ, തേ സബ്ബേ ഉപാദായുപാദായ സമണോ ഖീണാസവോ അഗ്ഗമക്ഖായതി. യഥാ, മഹാരാജ, യാനി കാനിചി ജലജഥലജപുപ്ഫാനി, വസ്സികം തേസം അഗ്ഗമക്ഖായതി, അവസേസാനി യാനി കാനിചി വിവിധാനി പുപ്ഫജാതാനി, സബ്ബാനി താനി പുപ്ഫാനി യേവ, ഉപാദായുപാദായ പന വസ്സികം യേവ പുപ്ഫം ജനസ്സ പത്ഥിതം പിഹയിതം. ഏവമേവ ഖോ, മഹാരാജ, യേ കേചി കിലേസൂപസമായ പടിപന്നാ, തേ സബ്ബേ ഉപാദായുപാദായ സമണോ ഖീണാസവോ അഗ്ഗമക്ഖായതി.

‘‘യഥാ വാ പന, മഹാരാജ, സബ്ബധഞ്ഞാനം സാലി അഗ്ഗമക്ഖായതി, യാ കാചി അവസേസാ വിവിധാ ധഞ്ഞജാതിയോ, താ സബ്ബാ ഉപാദായുപാദായ ഭോജനാനി സരീരയാപനായ, സാലി യേവ തേസം അഗ്ഗമക്ഖായതി. ഏവമേവ ഖോ, മഹാരാജ, യേ കേചി കിലേസൂപസമായ പടിപന്നാ, തേ സബ്ബേ ഉപാദായുപാദായ സമണോ ഖീണാസവോ അഗ്ഗമക്ഖായതീ’’തി. ‘‘സാധു, ഭന്തേ നാഗസേന, ഏവമേതം തഥാ സമ്പടിച്ഛാമീ’’തി.

അഗ്ഗഗ്ഗസമണപഞ്ഹോ നവമോ.