൫. പുത്തസുത്തം

൭൪. വുത്തഞ്ഹേതം ഭഗവതാ, വുത്തമരഹതാതി മേ സുതം –

‘‘തയോമേ, ഭിക്ഖവേ, പുത്താ സന്തോ സംവിജ്ജമാനാ ലോകസ്മിം. കതമേ തയോ? അതിജാതോ, അനുജാതോ, അവജാതോതി.

‘‘കഥഞ്ച, ഭിക്ഖവേ, പുത്തോ അതിജാതോ ഹോതി? ഇധ, ഭിക്ഖവേ, പുത്തസ്സ മാതാപിതരോ ഹോന്തി ന ബുദ്ധം സരണം ഗതാ, ന ധമ്മം സരണം ഗതാ, ന സങ്ഘം സരണം ഗതാ; പാണാതിപാതാ അപ്പടിവിരതാ, അദിന്നാദാനാ അപ്പടിവിരതാ, കാമേസുമിച്ഛാചാരാ അപ്പടിവിരതാ, മുസാവാദാ അപ്പടിവിരതാ, സുരാമേരയമജ്ജപമാദട്ഠാനാ അപ്പടിവിരതാ, ദുസ്സീലാ പാപധമ്മാ. പുത്തോ ച നേസം ഹോതി ബുദ്ധം സരണം ഗതോ, ധമ്മം സരണം ഗതോ, സങ്ഘം സരണം ഗതോ; പാണാതിപാതാ പടിവിരതോ, അദിന്നാദാനാ പടിവിരതോ, കാമേസുമിച്ഛാചാരാ പടിവിരതോ, മുസാവാദാ പടിവിരതോ, സുരാമേരയമജ്ജപമാദട്ഠാനാ പടിവിരതോ, സീലവാ കല്യാണധമ്മോ. ഏവം ഖോ, ഭിക്ഖവേ, പുത്തോ അതിജാതോ ഹോതി.

‘‘കഥഞ്ച, ഭിക്ഖവേ, പുത്തോ അനുജാതോ ഹോതി? ഇധ, ഭിക്ഖവേ, പുത്തസ്സ മാതാപിതരോ ഹോന്തി ബുദ്ധം സരണം ഗതാ, ധമ്മം സരണം ഗതാ, സങ്ഘം സരണം ഗതാ; പാണാതിപാതാ പടിവിരതാ, അദിന്നാദാനാ പടിവിരതാ, കാമേസുമിച്ഛാചാരാ പടിവിരതാ, മുസാവാദാ പടിവിരതാ, സുരാമേരയമജ്ജപമാദട്ഠാനാ പടിവിരതാ, സീലവന്തോ കല്യാണധമ്മാ. പുത്തോപി നേസം ഹോതി ബുദ്ധം സരണം ഗതോ, ധമ്മം സരണം ഗതോ, സങ്ഘം സരണം ഗതോ; പാണാതിപാതാ പടിവിരതോ, അദിന്നാദാനാ പടിവിരതോ, കാമേസുമിച്ഛാചാരാ പടിവിരതോ, മുസാവാദാ പടിവിരതോ, സുരാമേരയമജ്ജപമാദട്ഠാനാ പടിവിരതോ, സീലവാ കല്യാണധമ്മോ. ഏവം ഖോ, ഭിക്ഖവേ, പുത്തോ അനുജാതോ ഹോതി.

‘‘കഥഞ്ച, ഭിക്ഖവേ, പുത്തോ അവജാതോ ഹോതി? ഇധ, ഭിക്ഖവേ, പുത്തസ്സ മാതാപിതരോ ഹോന്തി ബുദ്ധം സരണം ഗതാ, ധമ്മം സരണം ഗതാ, സങ്ഘം സരണം ഗതാ; പാണാതിപാതാ പടിവിരതാ, അദിന്നാദാനാ പടിവിരതാ, കാമേസുമിച്ഛാചാരാ പടിവിരതാ, മുസാവാദാ പടിവിരതാ, സുരാമേരയമജ്ജപമാദട്ഠാനാ പടിവിരതാ, സീലവന്തോ കല്യാണധമ്മാ. പുത്തോ ച നേസം ഹോതി ന ബുദ്ധം സരണം ഗതോ, ന ധമ്മം സരണം ഗതോ, ന സങ്ഘം സരണം ഗതോ; പാണാതിപാതാ അപ്പടിവിരതോ, അദിന്നാദാനാ അപ്പടിവിരതോ, കാമേസുമിച്ഛാചാരാ അപ്പടിവിരതോ, മുസാവാദാ അപ്പടിവിരതോ, സുരാമേരയമജ്ജപമാദട്ഠാനാ അപ്പടിവിരതോ, ദുസ്സീലോ പാപധമ്മോ. ഏവം ഖോ, ഭിക്ഖവേ, പുത്തോ അവജാതോ ഹോതി. ഇമേ ഖോ, ഭിക്ഖവേ, തയോ പുത്താ സന്തോ സംവിജ്ജമാനാ ലോകസ്മി’’ന്തി. ഏതമത്ഥം ഭഗവാ അവോച. തത്ഥേതം ഇതി വുച്ചതി –

‘‘അതിജാതം അനുജാതം, പുത്തമിച്ഛന്തി പണ്ഡിതാ;

അവജാതം ന ഇച്ഛന്തി, യോ ഹോതി കുലഗന്ധനോ.

‘‘ഏതേ ഖോ പുത്താ ലോകസ്മിം, യേ ഭവന്തി ഉപാസകാ;

സദ്ധാ സീലേന സമ്പന്നാ, വദഞ്ഞൂ വീതമച്ഛരാ;

ചന്ദോ അബ്ഭഘനാ മുത്തോ, പരിസാസു വിരോചരേ’’തി.

അയമ്പി അത്ഥോ വുത്തോ ഭഗവതാ, ഇതി മേ സുതന്തി. പഞ്ചമം.