൭. വത്ഥദായകത്ഥേരഅപദാനം

൪൫. ‘‘പക്ഖിജാതോ തദാ ആസിം, സുപണ്ണോ ഗരുളാധിപോ;

അദ്ദസം വിരജം ബുദ്ധം, ഗച്ഛന്തം ഗന്ധമാദനം.

൪൬. ‘‘ജഹിത്വാ ഗരുളവണ്ണം, മാണവകം അധാരയിം;

ഏകം വത്ഥം മയാ ദിന്നം, ദ്വിപദിന്ദസ്സ താദിനോ.

൪൭. ‘‘തഞ്ച ദുസ്സം പടിഗ്ഗയ്ഹ, ബുദ്ധോ ലോകഗ്ഗനായകോ;

അന്തലിക്ഖേ ഠിതോ സത്ഥാ, ഇമാ ഗാഥാ അഭാസഥ.

൪൮. ‘‘‘ഇമിനാ വത്ഥദാനേന, ചിത്തസ്സ പണിധീഹി ച;

പഹായ ഗരുളം യോനിം, ദേവലോകേ രമിസ്സതി’.

൪൯. ‘‘അത്ഥദസ്സീ തു ഭഗവാ, ലോകജേട്ഠോ നരാസഭോ;

വത്ഥദാനം പസംസിത്വാ, പക്കാമി ഉത്തരാമുഖോ.

൫൦. ‘‘ഭവേ നിബ്ബത്തമാനമ്ഹി, ഹോന്തി മേ വത്ഥസമ്പദാ;

ആകാസേ ഛദനം ഹോതി, വത്ഥദാനസ്സിദം ഫലം.

൫൧. ‘‘അരുണവാ [അരുണകാ (സീ.), അരുണസാ (സ്യാ.)] സത്ത ജനാ, ചക്കവത്തീ മഹബ്ബലാ;

ഛത്തിംസതിമ്ഹി ആസിംസു, കപ്പമ്ഹി മനുജാധിപാ.

൫൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ വത്ഥദായകോ ഥേരോ ഇമാ ഗാഥായോ അഭാസിത്ഥാതി.

വത്ഥദായകത്ഥേരസ്സാപദാനം സത്തമം.