൯. പദുമത്ഥേരഅപദാനം

൬൭. ‘‘ചതുസച്ചം പകാസേന്തോ, വരധമ്മപ്പവത്തകോ;

വസ്സതേ [വസ്സേതി (?)] അമതം വുട്ഠിം, നിബ്ബാപേന്തോ മഹാജനം.

൬൮. ‘‘സധജം [സദണ്ഡം (സീ.)] പദുമം ഗയ്ഹ, അഡ്ഢകോസേ ഠിതോ അഹം;

പദുമുത്തരമുനിസ്സ, പഹട്ഠോ ഉക്ഖിപിമമ്ബരേ.

൬൯. ‘‘ആഗച്ഛന്തേ ച പദുമേ, അബ്ഭുതോ ആസി താവദേ;

മമ സങ്കപ്പമഞ്ഞായ, പഗ്ഗണ്ഹി വദതം വരോ.

൭൦. ‘‘കരസേട്ഠേന പഗ്ഗയ്ഹ, ജലജം പുപ്ഫമുത്തമം;

ഭിക്ഖുസങ്ഘേ ഠിതോ സത്ഥാ, ഇമാ ഗാഥാ അഭാസഥ.

൭൧. ‘‘‘യേനിദം പദുമം ഖിത്തം, സബ്ബഞ്ഞുമ്ഹി വിനായകേ [സബ്ബഞ്ഞുതമനായകേ (സ്യാ. ക.)];

തമഹം കിത്തയിസ്സാമി, സുണാഥ മമ ഭാസതോ.

൭൨. ‘‘‘തിംസകപ്പാനി ദേവിന്ദോ, ദേവരജ്ജം കരിസ്സതി;

പഥബ്യാ രജ്ജം സത്തസതം, വസുധം ആവസിസ്സതി.

൭൩. ‘‘‘തത്ഥ പത്തം ഗണേത്വാന, ചക്കവത്തീ ഭവിസ്സതി;

ആകാസതോ പുപ്ഫവുട്ഠി, അഭിവസ്സിസ്സതീ തദാ.

൭൪. ‘‘‘കപ്പസതസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ നാമേന, സത്ഥാ ലോകേ ഭവിസ്സതി.

൭൫. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

സബ്ബാസവേ പരിഞ്ഞായ, നിബ്ബായിസ്സതിനാസവോ’.

൭൬. ‘‘നിക്ഖമിത്വാന കുച്ഛിമ്ഹാ, സമ്പജാനോ പതിസ്സതോ;

ജാതിയാ പഞ്ചവസ്സോഹം, അരഹത്തം അപാപുണിം.

൭൭. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പദുമോ ഥേരോ ഇമാ ഗാഥായോ അഭാസിത്ഥാതി.

പദുമത്ഥേരസ്സാപദാനം നവമം.