൧൦. അസനബോധിയത്ഥേരഅപദാനം

൭൮. ‘‘ജാതിയാ സത്തവസ്സോഹം, അദ്ദസം ലോകനായകം;

പസന്നചിത്തോ സുമനോ, ഉപഗച്ഛിം നരുത്തമം.

൭൯. ‘‘തിസ്സസ്സാഹം ഭഗവതോ, ലോകജേട്ഠസ്സ താദിനോ;

ഹട്ഠോ ഹട്ഠേന ചിത്തേന, രോപയിം ബോധിമുത്തമം.

൮൦. ‘‘അസനോ നാമധേയ്യേന, ധരണീരുഹപാദപോ;

പഞ്ചവസ്സേ പരിചരിം, അസനം ബോധിമുത്തമം.

൮൧. ‘‘പുപ്ഫിതം പാദപം ദിസ്വാ, അബ്ഭുതം ലോമഹംസനം;

സകം കമ്മം പകിത്തേന്തോ, ബുദ്ധസേട്ഠം ഉപാഗമിം.

൮൨. ‘‘തിസ്സോ തദാ സോ സമ്ബുദ്ധോ, സയമ്ഭൂ അഗ്ഗപുഗ്ഗലോ;

ഭിക്ഖുസങ്ഘേ നിസീദിത്വാ, ഇമാ ഗാഥാ അഭാസഥ.

൮൩. ‘‘‘യേനായം രോപിതാ ബോധി, ബുദ്ധപൂജാ ച സക്കതാ;

തമഹം കിത്തയിസ്സാമി, സുണാഥ മമ ഭാസതോ.

൮൪. ‘‘‘തിംസകപ്പാനി ദേവേസു, ദേവരജ്ജം കരിസ്സതി;

ചതുസട്ഠി ചക്ഖത്തും സോ, ചക്കവത്തീ ഭവിസ്സതി.

൮൫. ‘‘‘തുസിതാ ഹി ചവിത്വാന, സുക്കമൂലേന ചോദിതോ;

ദ്വേ സമ്പത്തീ അനുഭോത്വാ, മനുസ്സത്തേ രമിസ്സതി.

൮൬. ‘‘‘പധാനപഹിതത്തോ സോ, ഉപസന്തോ നിരൂപധി;

സബ്ബാസവേ പരിഞ്ഞായ, നിബ്ബായിസ്സതിനാസവോ’.

൮൭. ‘‘വിവേകമനുയുത്തോഹം, ഉപസന്തോ നിരൂപധി;

നാഗോവ ബന്ധനം ഛേത്വാ, വിഹരാമി അനാസവോ.

൮൮. ‘‘ദ്വേനവുതേ ഇതോ കപ്പേ, ബോധിം രോപേസഹം തദാ;

ദുഗ്ഗതിം നാഭിജാനാമി, ബോധിരോപസ്സിദം ഫലം.

൮൯. ‘‘ചതുസത്തതിതോ കപ്പേ, ദണ്ഡസേനോതി വിസ്സുതോ;

സത്തരതനസമ്പന്നോ, ചക്കവത്തീ തദാ അഹും.

൯൦. ‘‘തേസത്തതിമ്ഹിതോ കപ്പേ, സത്താഹേസും മഹീപതീ;

സമന്തനേമിനാമേന, രാജാനോ ചക്കവത്തിനോ.

൯൧. ‘‘പണ്ണവീസതിതോ കപ്പേ, പുണ്ണകോ നാമ ഖത്തിയോ;

സത്തരതനസമ്പന്നോ, ചക്കവത്തീ മഹബ്ബലോ.

൯൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ അസനബോധിയോ ഥേരോ ഇമാ ഗാഥായോ അഭാസിത്ഥാതി.

അസനബോധിയത്ഥേരസ്സാപദാനം ദസമം.

ബീജനിവഗ്ഗോ ഛട്ഠോ.