൯. വനവച്ഛത്ഥേരഅപദാനം

൨൫൧. ‘‘ഇമമ്ഹി ഭദ്ദകേ കപ്പേ, ബ്രഹ്മബന്ധു മഹായസോ;

കസ്സപോ നാമ ഗോത്തേന, ഉപ്പജ്ജി വദതം വരോ.

൨൫൨. ‘‘തദാഹം പബ്ബജിത്വാന, തസ്സ ബുദ്ധസ്സ സാസനേ;

യാവജീവം ചരിത്വാന, ബ്രഹ്മചാരം തതോ ചുതോ.

൨൫൩. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൨൫൪. ‘‘തതോ ചുതോ അരഞ്ഞമ്ഹി, കപോതോ ആസഹം തഹിം;

വസതേ ഗുണസമ്പന്നോ, ഭിക്ഖു ഝാനരതോ സദാ.

൨൫൫. ‘‘മേത്തചിത്തോ കാരുണികോ, സദാ പമുദിതാനനോ;

ഉപേക്ഖകോ മഹാവീരോ, അപ്പമഞ്ഞാസു കോവിദോ.

൨൫൬. ‘‘വിനീവരണസങ്കപ്പേ, സബ്ബസത്തഹിതാസയേ;

വിസട്ഠോ നചിരേനാസിം, തസ്മിം സുഗതസാവകേ.

൨൫൭. ‘‘ഉപേച്ച പാദമൂലമ്ഹി, നിസിന്നസ്സ തദാസ്സമേ;

കദാചി സാമിസം ദേതി, ധമ്മം ദേസേസി ചേകദാ.

൨൫൮. ‘‘തദാ വിപുലപേമേന, ഉപാസിത്വാ ജിനത്രജം;

തതോ ചുതോ ഗതോ സഗ്ഗം, പവാസോ സഘരം യഥാ.

൨൫൯. ‘‘സഗ്ഗാ ചുതോ മനുസ്സേസു, നിബ്ബത്തോ പുഞ്ഞകമ്മുനാ;

അഗാരം ഛഡ്ഡയിത്വാന, പബ്ബജിം ബഹുസോ അഹം.

൨൬൦. ‘‘സമണോ താപസോ വിപ്പോ, പരിബ്ബജോ തഥേവഹം;

ഹുത്വാ വസിം അരഞ്ഞമ്ഹി, അനേകസതസോ അഹം.

൨൬൧. ‘‘പച്ഛിമേ ച ഭവേ ദാനി, രമ്മേ കപിലവത്ഥവേ;

വച്ഛഗോത്തോ ദിജോ തസ്സ, ജായായ അഹമോക്കമിം.

൨൬൨. ‘‘മാതു മേ ദോഹളോ ആസി, തിരോകുച്ഛിഗതസ്സ മേ;

ജായമാനസമീപമ്ഹി, വനവാസായ നിച്ഛയോ.

൨൬൩. ‘‘തതോ മേ അജനീ മാതാ, രമണീയേ വനന്തരേ;

ഗബ്ഭതോ നിക്ഖമന്തം മം, കാസായേന പടിഗ്ഗഹും.

൨൬൪. ‘‘തതോ കുമാരോ സിദ്ധത്ഥോ, ജാതോ സക്യകുലദ്ധജോ;

തസ്സ മിത്തോ പിയോ ആസിം, സംവിസട്ഠോ സുമാനിയോ.

൨൬൫. ‘‘സത്തസാരേഭിനിക്ഖന്തേ, ഓഹായ വിപുലം യസം;

അഹമ്പി പബ്ബജിത്വാന, ഹിമവന്തമുപാഗമിം.

൨൬൬. ‘‘വനാലയം ഭാവനീയം, കസ്സപം ധുതവാദികം;

ദിസ്വാ സുത്വാ ജിനുപ്പാദം, ഉപേസിം നരസാരഥിം.

൨൬൭. ‘‘സോ മേ ധമ്മമദേസേസി, സബ്ബത്ഥം സമ്പകാസയം;

തതോഹം പബ്ബജിത്വാന, വനമേവ പുനാഗമം [പുനാഗമിം (സീ. പീ.), പുനോക്കമം (സ്യാ.)].

൨൬൮. ‘‘തത്ഥാപ്പമത്തോ വിഹരം, ഛളഭിഞ്ഞാ അഫസ്സയിം [അപസ്സയിം (സ്യാ. ക.)];

അഹോ സുലദ്ധലാഭോമ്ഹി, സുമിത്തേനാനുകമ്പിതോ.

൨൬൯. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൨൭൦. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൭൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ വനവച്ഛോ ഥേരോ ഇമാ ഗാഥായോ

അഭാസിത്ഥാതി.

വനവച്ഛത്ഥേരസ്സാപദാനം നവമം.