൧൦. ചൂളസുഗന്ധത്ഥേരഅപദാനം

൨൭൨. ‘‘ഇമമ്ഹി ഭദ്ദകേ കപ്പേ, ബ്രഹ്മബന്ധു മഹായസോ;

കസ്സപോ നാമ ഗോത്തേന, ഉപ്പജ്ജി വദതം വരോ.

൨൭൩. ‘‘അനുബ്യഞ്ജനസമ്പന്നോ, ബാത്തിംസവരലക്ഖണോ;

ബ്യാമപ്പഭാപരിവുതോ, രംസിജാലസമോത്ഥടോ.

൨൭൪. ‘‘അസ്സാസേതാ യഥാ ചന്ദോ, സൂരിയോവ പഭങ്കരോ;

നിബ്ബാപേതാ യഥാ മേഘോ, സാഗരോവ ഗുണാകരോ.

൨൭൫. ‘‘ധരണീരിവ സീലേന, ഹിമവാവ സമാധിനാ;

ആകാസോ വിയ പഞ്ഞായ, അസങ്ഗോ അനിലോ യഥാ.

൨൭൬. ‘‘തദാഹം ബാരാണസിയം, ഉപപന്നോ മഹാകുലേ;

പഹൂതധനധഞ്ഞസ്മിം, നാനാരതനസഞ്ചയേ.

൨൭൭. ‘‘മഹതാ പരിവാരേന, നിസിന്നം ലോകനായകം;

ഉപേച്ച ധമ്മമസ്സോസിം, അമതംവ മനോഹരം.

൨൭൮. ‘‘ദ്വത്തിംസലക്ഖണധരോ, സനക്ഖത്തോവ ചന്ദിമാ;

അനുബ്യഞ്ജനസമ്പന്നോ, സാലരാജാവ ഫുല്ലിതോ.

൨൭൯. ‘‘രംസിജാലപരിക്ഖിത്തോ, ദിത്തോവ കനകാചലോ;

ബ്യാമപ്പഭാപരിവുതോ, സതരംസീ ദിവാകരോ.

൨൮൦. ‘‘സോണ്ണാനനോ ജിനവരോ, സമണീവ [രമ്മണീവ (സ്യാ.)] സിലുച്ചയോ;

കരുണാപുണ്ണഹദയോ, ഗുണേന വിയ സാഗരോ.

൨൮൧. ‘‘ലോകവിസ്സുതകിത്തി ച, സിനേരൂവ നഗുത്തമോ;

യസസാ വിത്ഥതോ വീരോ, ആകാസസദിസോ മുനി.

൨൮൨. ‘‘അസങ്ഗചിത്തോ സബ്ബത്ഥ, അനിലോ വിയ നായകോ;

പതിട്ഠാ സബ്ബഭൂതാനം, മഹീവ മുനിസത്തമോ.

൨൮൩. ‘‘അനുപലിത്തോ ലോകേന, തോയേന പദുമം യഥാ;

കുവാദഗച്ഛദഹനോ, അഗ്ഗിഖന്ധോവ സോഭസി [സോഭതി (സീ.), സോ വസി (സ്യാ. ക.)].

൨൮൪. ‘‘അഗധോ വിയ സബ്ബത്ഥ, കിലേസവിസനാസകോ;

ഗന്ധമാദനസേലോവ, ഗുണഗന്ധവിഭൂസിതോ.

൨൮൫. ‘‘ഗുണാനം ആകരോ വീരോ, രതനാനംവ സാഗരോ;

സിന്ധൂവ വനരാജീനം, കിലേസമലഹാരകോ.

൨൮൬. ‘‘വിജയീവ മഹായോധോ, മാരസേനാവമദ്ദനോ;

ചക്കവത്തീവ സോ രാജാ, ബോജ്ഝങ്ഗരതനിസ്സരോ.

൨൮൭. ‘‘മഹാഭിസക്കസങ്കാസോ, ദോസബ്യാധിതികിച്ഛകോ;

സല്ലകത്തോ യഥാ വേജ്ജോ, ദിട്ഠിഗണ്ഡവിഫാലകോ.

൨൮൮. ‘‘സോ തദാ ലോകപജ്ജോതോ, സനരാമരസക്കതോ;

പരിസാസു നരാദിച്ചോ, ധമ്മം ദേസയതേ ജിനോ.

൨൮൯. ‘‘ദാനം ദത്വാ മഹാഭോഗോ, സീലേന സുഗതൂപഗോ;

ഭാവനായ ച നിബ്ബാതി, ഇച്ചേവമനുസാസഥ.

൨൯൦. ‘‘ദേസനം തം മഹസ്സാദം, ആദിമജ്ഝന്തസോഭണം;

സുണന്തി പരിസാ സബ്ബാ, അമതംവ മഹാരസം.

൨൯൧. ‘‘സുത്വാ സുമധുരം ധമ്മം, പസന്നോ ജിനസാസനേ;

സുഗതം സരണം ഗന്ത്വാ, യാവജീവം നമസ്സഹം.

൨൯൨. ‘‘മുനിനോ ഗന്ധകുടിയാ, ഓപുഞ്ജേസിം [ഉബ്ബട്ടേസിം (സ്യാ.)] തദാ മഹിം;

ചതുജ്ജാതേന ഗന്ധേന, മാസേ അട്ഠ ദിനേസ്വഹം.

൨൯൩. ‘‘പണിധായ സുഗന്ധത്തം, സരീരവിസ്സഗന്ധിനോ [സരീരസ്സ വിഗന്ധിനോ (സീ. സ്യാ. പീ.)];

തദാ ജിനോ വിയാകാസി, സുഗന്ധതനുലാഭിതം.

൨൯൪. ‘‘‘യോ യം ഗന്ധകുടിഭൂമിം, ഗന്ധേനോപുഞ്ജതേ സകിം;

തേന കമ്മവിപാകേന, ഉപപന്നോ തഹിം തഹിം.

൨൯൫. ‘‘‘സുഗന്ധദേഹോ സബ്ബത്ഥ, ഭവിസ്സതി അയം നരോ;

ഗുണഗന്ധയുത്തോ ഹുത്വാ, നിബ്ബായിസ്സതിനാസവോ’.

൨൯൬. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൨൯൭. ‘‘പച്ഛിമേ ച ഭവേ ദാനി, ജാതോ വിപ്പകുലേ അഹം;

ഗബ്ഭം മേ വസതോ മാതാ, ദേഹേനാസി സുഗന്ധിതാ.

൨൯൮. ‘‘യദാ ച മാതുകുച്ഛിമ്ഹാ, നിക്ഖമാമി തദാ പുരീ [പുരം (സ്യാ. ക.)];

സാവത്ഥിസബ്ബഗന്ധേഹി, വാസിതാ വിയ വായഥ.

൨൯൯. ‘‘പുപ്ഫവസ്സഞ്ച സുരഭി, ദിബ്ബഗന്ധം മനോരമം;

ധൂപാനി ച മഹഗ്ഘാനി, ഉപവായിംസു താവദേ.

൩൦൦. ‘‘ദേവാ ച സബ്ബഗന്ധേഹി, ധൂപപുപ്ഫേഹി തം ഘരം;

വാസയിംസു സുഗന്ധേന, യസ്മിം ജാതോ അഹം ഘരേ.

൩൦൧. ‘‘യദാ ച തരുണോ ഭദ്ദോ, പഠമേ യോബ്ബനേ ഠിതോ;

തദാ സേലം [സേസം (സ്യാ.)] സപരിസം, വിനേത്വാ നരസാരഥി.

൩൦൨. ‘‘തേഹി സബ്ബേഹി പരിവുതോ [സഹിതോ (സീ. സ്യാ. പീ.)], സാവത്ഥിപുരമാഗതോ;

തദാ ബുദ്ധാനുഭാവം തം, ദിസ്വാ പബ്ബജിതോ അഹം.

൩൦൩. ‘‘സീലം സമാധിപഞ്ഞഞ്ച, വിമുത്തിഞ്ച അനുത്തരം;

ഭാവേത്വാ ചതുരോ ധമ്മേ, പാപുണിം ആസവക്ഖയം.

൩൦൪. ‘‘യദാ പബ്ബജിതോ ചാഹം, യദാ ച അരഹാ അഹും;

നിബ്ബായിസ്സം യദാ ചാഹം, ഗന്ധവസ്സോ തദാ അഹു.

൩൦൫. ‘‘സരീരഗന്ധോ ച സദാതിസേതി [സദാ വാസേതി (ക.)] മേ, മഹാരഹം ചന്ദനചമ്പകുപ്പലം;

തഥേവ ഗന്ധേ ഇതരേ ച സബ്ബസോ, പസയ്ഹ വായാമി തതോ തഹിം [യഹിം (സ്യാ.)] തഹിം.

൩൦൬. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൩൦൭. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൩൦൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ചൂളസുഗന്ധോ ഥേരോ ഇമാ ഗാഥായോ അഭാസിത്ഥാതി;

ചൂളസുഗന്ധത്ഥേരസ്സാപദാനം ദസമം.

ഭദ്ദിയവഗ്ഗോ പഞ്ചപഞ്ഞാസമോ.