൯. രാധത്ഥേരഅപദാനം

൨൯൬. ‘‘പദുമുത്തരോ നാമ ജിനോ, സബ്ബലോകവിദൂ മുനി;

ഇതോ സതസഹസ്സമ്ഹി, കപ്പേ ഉപ്പജ്ജി ചക്ഖുമാ.

൨൯൭. ‘‘ഓവാദകോ വിഞ്ഞാപകോ, താരകോ സബ്ബപാണിനം;

ദേസനാകുസലോ ബുദ്ധോ, താരേസി ജനതം ബഹും.

൨൯൮. ‘‘അനുകമ്പകോ കാരുണികോ, ഹിതേസീ സബ്ബപാണിനം;

സമ്പത്തേ തിത്ഥിയേ സബ്ബേ, പഞ്ചസീലേ പതിട്ഠപി.

൨൯൯. ‘‘ഏവം നിരാകുലം ആസി, സുഞ്ഞതം തിത്ഥിയേഹി ച;

വിചിത്തം അരഹന്തേഹി, വസീഭൂതേഹി താദിഭി.

൩൦൦. ‘‘രതനാനട്ഠപഞ്ഞാസം, ഉഗ്ഗതോ സോ മഹാമുനി;

കഞ്ചനഗ്ഘിയസങ്കാസോ, ബാത്തിംസവരലക്ഖണോ.

൩൦൧. ‘‘വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൦൨. ‘‘തദാഹം ഹംസവതിയം, ബ്രാഹ്മണോ മന്തപാരഗൂ;

ഉപേച്ച തം നരവരം, അസ്സോസിം ധമ്മദേസനം.

൩൦൩. ‘‘പഞ്ഞപേന്തം മഹാവീരം, പരിസാസു വിസാരദം;

പടിഭാനേയ്യകം ഭിക്ഖും, ഏതദഗ്ഗേ വിനായകം.

൩൦൪. ‘‘തദാഹം കാരം കത്വാന, സസങ്ഘേ ലോകനായകേ;

നിപച്ച സിരസാ പാദേ, തം ഠാനം അഭിപത്ഥയിം.

൩൦൫. ‘‘തതോ മം ഭഗവാ ആഹ, സിങ്ഗീനിക്ഖസമപ്പഭോ;

സരേന രജനീയേന, കിലേസമലഹാരിനാ.

൩൦൬. ‘‘‘സുഖീ ഭവസ്സു ദീഘായു, സിജ്ഝതു പണിധീ തവ;

സസങ്ഘേ മേ കതം കാരം, അതീവ വിപുലം തയാ.

൩൦൭. ‘‘‘സതസഹസ്സിതോ കപ്പേ, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൩൦൮. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

രാധോതി നാമധേയ്യേന, ഹേസ്സതി സത്ഥു സാവകോ.

൩൦൯. ‘‘‘സ തേ ഹേതുഗുണേ തുട്ഠോ, സക്യപുത്തോ നരാസഭോ [ഇദം പാദദ്വയം സ്യാമമൂലേ നത്ഥീ];

പടിഭാനേയ്യകാനഗ്ഗം, പഞ്ഞപേസ്സതി നായകോ’.

൩൧൦. ‘‘തം സുത്വാ മുദിതോ ഹുത്വാ, യാവജീവം തദാ ജിനം;

മേത്തചിത്തോ പരിചരിം, സതോ പഞ്ഞാസമാഹിതോ.

൩൧൧. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൩൧൨. ‘‘സതാനം തീണിക്ഖത്തുഞ്ച, ദേവരജ്ജമകാരയിം;

സതാനം പഞ്ചക്ഖത്തുഞ്ച, ചക്കവത്തീ അഹോസഹം.

൩൧൩. ‘‘പദേസരജ്ജം വിപുലം, ഗണനാതോ അസങ്ഖിയം;

സബ്ബത്ഥ സുഖിതോ ആസിം, തസ്സ കമ്മസ്സ വാഹസാ.

൩൧൪. ‘‘പച്ഛിമേ ഭവേ സമ്പത്തേ, ഗിരിബ്ബജപുരുത്തമേ;

ജാതോ വിപ്പകുലേ നിദ്ധേ, വികലച്ഛാദനാസനേ.

൩൧൫. ‘‘കടച്ഛുഭിക്ഖം പാദാസിം, സാരിപുത്തസ്സ താദിനോ;

യദാ ജിണ്ണോ ച വുദ്ധോ ച, തദാരാമമുപാഗമിം.

൩൧൬. ‘‘പബ്ബജതി ന മം കോചി [പബ്ബാജേന്തി ന മം കേചി (സീ. സ്യാ പീ.)], ജിണ്ണദുബ്ബലഥാമകം;

തേന ദീനോ വിവണ്ണങ്ഗോ [വിവണ്ണകോ (ക.)], സോകോ ചാസിം തദാ അഹം.

൩൧൭. ‘‘ദിസ്വാ മഹാകാരുണികോ, മമമാഹ [മമാഹ സോ (സീ.), മമാഹ ച (പീ.)] മഹാമുനി;

‘കിമത്ഥം പുത്തസോകട്ടോ, ബ്രൂഹി തേ ചിത്തജം രുജം’.

൩൧൮. ‘‘‘പബ്ബജ്ജം ന ലഭേ വീര, സ്വാക്ഖാതേ തവ സാസനേ;

തേന സോകേന ദീനോസ്മി, സരണം ഹോഹി നായക’.

൩൧൯. ‘‘തദാ ഭിക്ഖൂ സമാനേത്വാ, അപുച്ഛി മുനിസത്തമോ;

‘ഇമസ്സ അധികാരം യേ, സരന്തി ബ്യാഹരന്തു തേ’.

൩൨൦. ‘‘സാരിപുത്തോ തദാവോച, ‘കാരമസ്സ സരാമഹം;

കടച്ഛുഭിക്ഖം ദാപേസി, പിണ്ഡായ ചരതോ മമ’.

൩൨൧. ‘‘‘സാധു സാധു കതഞ്ഞൂസി, സാരിപുത്ത ഇമം തുവം;

പബ്ബാജേഹി ദിജം വുഡ്ഢം, ഹേസ്സതാജാനിയോ അയം’.

൩൨൨. ‘‘തതോ അലത്ഥം പബ്ബജ്ജം, കമ്മവാചോപസമ്പദം;

ന ചിരേനേവ കാലേന, പാപുണിം ആസവക്ഖയം.

൩൨൩. ‘‘സക്കച്ചം മുനിനോ വാക്യം, സുണാമി മുദിതോ യതോ;

പടിഭാനേയ്യകാനഗ്ഗം, തതോ മം ഠപയീ ജിനോ.

൩൨൪. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൩൨൫. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൩൨൬. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ രാധോ ഥേരോ ഇമാ ഗാഥായോ

അഭാസിത്ഥാതി.

രാധത്ഥേരസ്സാപദാനം നവമം.