൧൦. മോഘരാജത്ഥേരഅപദാനം

൩൨൭. ‘‘പദുമുത്തരോ നാമ ജിനോ, സബ്ബലോകവിദൂ മുനി;

ഇതോ സതസഹസ്സമ്ഹി, കപ്പേ ഉപ്പജ്ജി ചക്ഖുമാ.

൩൨൮. ‘‘ഓവാദകോ വിഞ്ഞാപകോ, താരകോ സബ്ബപാണിനം;

ദേസനാകുസലോ ബുദ്ധോ, താരേസി ജനതം ബഹും.

൩൨൯. ‘‘അനുകമ്പകോ കാരുണികോ, ഹിതേസീ സബ്ബപാണിനം;

സമ്പത്തേ തിത്ഥിയേ സബ്ബേ, പഞ്ചസീലേ പതിട്ഠപി.

൩൩൦. ‘‘ഏവം നിരാകുലം ആസി, സുഞ്ഞതം തിത്ഥിയേഹി ച;

വിചിത്തം അരഹന്തേഹി, വസീഭൂതേഹി താദിഭി.

൩൩൧. ‘‘രതനാനട്ഠപഞ്ഞാസം, ഉഗ്ഗതോ സോ മഹാമുനി;

കഞ്ചനഗ്ഘിയസങ്കാസോ, ബാത്തിംസവരലക്ഖണോ.

൩൩൨. ‘‘വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൩൩. ‘‘തദാഹം ഹംസവതിയം, കുലേ അഞ്ഞതരേ അഹും;

പരകമ്മായനേ യുത്തോ, നത്ഥി മേ കിഞ്ചി സംധനം.

൩൩൪. ‘‘പടിക്കമനസാലായം, വസന്തോ കതഭൂമിയം;

അഗ്ഗിം ഉജ്ജാലയിം തത്ഥ, ദള്ഹം കണ്ഹാസി സാ [കണ്ഹാ സിയാ (സീ. പീ.), ഡയ്ഹകണ്ഹാ സിലാ (സ്യാ.)] ഹീ.

൩൩൫. ‘‘തദാ പരിസതിം നാഥോ, ചതുസച്ചപകാസകോ;

സാവകം സമ്പകിത്തേസി, ലൂഖചീവരധാരകം.

൩൩൬. ‘‘തസ്സ തമ്ഹി ഗുണേ തുട്ഠോ, പണിപച്ച [പതിപജ്ജ (സ്യാ.)] തഥാഗതം;

ലൂഖചീവരധാരഗ്ഗം, പത്ഥയിം ഠാനമുത്തമം.

൩൩൭. ‘‘തദാ അവോച ഭഗവാ, സാവകേ പദുമുത്തരോ;

‘പസ്സഥേതം പുരിസകം, കുചേലം തനുദേഹകം.

൩൩൮. ‘‘‘പീതിപ്പസന്നവദനം, സദ്ധാധനസമന്വിതം [സദ്ധാസ്നേഹസമന്വതം (ക.)];

ഉദഗ്ഗതനുജം ഹട്ഠം, അചലം സാലപിണ്ഡിതം.

൩൩൯. ‘‘‘ഏസോ പത്ഥേതി തം ഠാനം, സച്ചസേനസ്സ ഭിക്ഖുനോ;

ലൂഖചീവരധാരിസ്സ, തസ്സ വണ്ണസിതാസയോ [വണ്ണഗതാസയോ (സീ. സ്യാ. പീ.)].

൩൪൦. ‘‘തം സുത്വാ മുദിതോ ഹുത്വാ, നിപച്ച സിരസാ ജിനം;

യാവജീവം സുഭം കമ്മം, കരിത്വാ ജിനസാസനേ.

൩൪൧. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസൂപഗോ അഹം.

൩൪൨. ‘‘പടിക്കമനസാലായം, ഭൂമിദാഹകകമ്മുനാ;

സമസഹസ്സം നിരയേ, അദയ്ഹിം വേദനാട്ടിതോ.

൩൪൩. ‘‘തേന കമ്മാവസേസേന, പഞ്ച ജാതിസതാനിഹം;

മനുസ്സോ കുലജോ ഹുത്വാ, ജാതിയാ ലക്ഖണങ്കിതോ.

൩൪൪. ‘‘പഞ്ച ജാതിസതാനേവ, കുട്ഠരോഗസമപ്പിതോ;

മഹാദുക്ഖം അനുഭവിം, തസ്സ കമ്മസ്സ വാഹസാ.

൩൪൫. ‘‘ഇമസ്മിം ഭദ്ദകേ കപ്പേ, ഉപരിട്ഠം യസസ്സിനം;

പിണ്ഡപാതേന തപ്പേസിം, പസന്നമാനസോ അഹം.

൩൪൬. ‘‘തേന കമ്മവിസേസേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൩൪൭. ‘‘പച്ഛിമേ ഭവേ സമ്പത്തേ, അജായിം ഖത്തിയേ കുലേ;

പിതുനോ അച്ചയേനാഹം, മഹാരജ്ജസമപ്പിതോ.

൩൪൮. ‘‘കുട്ഠരോഗാധിഭൂതോഹം, ന രതിം ന സുഖം ലഭേ;

മോഘം രജ്ജം സുഖം യസ്മാ, മോഘരാജാ തതോ അഹം.

൩൪൯. ‘‘കായസ്സ ദോസം ദിസ്വാന, പബ്ബജിം അനഗാരിയം;

ബാവരിസ്സ ദിജഗ്ഗസ്സ, സിസ്സത്തം അജ്ഝുപാഗമിം.

൩൫൦. ‘‘മഹതാ പരിവാരേന, ഉപേച്ച നരനായകം;

അപുച്ഛിം നിപുണം പഞ്ഹം, തം വീരം വാദിസൂദനം.

൩൫൧. ‘‘‘അയം ലോകോ പരോ ലോകോ, ബ്രഹ്മലോകോ സദേവകോ;

ദിട്ഠിം നോ [ദിട്ഠാ നോ (സീ.), ദിട്ഠം നോ (പീ.), ദിട്ഠിം തേ (സ്യാ.)] നാഭിജാനാമി, ഗോതമസ്സ യസസ്സിനോ.

൩൫൨. ‘‘‘ഏവാഭിക്കന്തദസ്സാവിം, അത്ഥി പഞ്ഹേന ആഗമം;

കഥം ലോകം അവേക്ഖന്തം, മച്ചുരാജാ ന പസ്സതി’.

൩൫൩. ‘‘‘സുഞ്ഞതോ ലോകം അവേക്ഖസ്സു, മോഘരാജ സദാ സതോ;

അത്താനുദിട്ഠിം ഉഹച്ച, ഏവം മച്ചുതരോ സിയാ.

൩൫൪. ‘‘‘ഏവം ലോകം അവേക്ഖന്തം, മച്ചുരാജാ ന പസ്സതി’;

ഇതി മം അഭണി ബുദ്ധോ, സബ്ബരോഗതികിച്ഛകോ.

൩൫൫. ‘‘സഹ ഗാഥാവസാനേന, കേസമസ്സുവിവജ്ജിതോ;

കാസാവവത്ഥവസനോ, ആസിം ഭിക്ഖു തഥാരഹാ.

൩൫൬. ‘‘സങ്ഘികേസു വിഹാരേസു, ന വസിം രോഗപീളിതോ;

മാ വിഹാരോ പദുസ്സീതി, വാതരോഗേഹി പീളിതോ [വാചായാഭിസുപീളിതോ (സ്യാ. പീ.), വാതരോഗീ സുപീളിതോ (ക.)].

൩൫൭. ‘‘സങ്കാരകൂടാ ആഹിത്വാ, സുസാനാ രഥികാഹി ച;

തതോ സങ്ഘാടിം കരിത്വാ, ധാരയിം ലൂഖചീവരം.

൩൫൮. ‘‘മഹാഭിസക്കോ തസ്മിം മേ, ഗുണേ തുട്ഠോ വിനായകോ;

ലൂഖചീവരധാരീനം, ഏതദഗ്ഗേ ഠപേസി മം.

൩൫൯. ‘‘പുഞ്ഞപാപപരിക്ഖീണോ, സബ്ബരോഗവിവജ്ജിതോ;

സിഖീവ അനുപാദാനോ, നിബ്ബായിസ്സമനാസവോ.

൩൬൦. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൩൬൧. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൩൬൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ മോഘരാജാ ഥേരോ ഇമാ ഗാഥായോ

അഭാസിത്ഥാതി.

മോഘരാജത്ഥേരസ്സാപദാനം ദസമം.

കച്ചായനവഗ്ഗോ ചതുപഞ്ഞാസമോ.