൨. മണിപൂജകത്ഥേരഅപദാനം

൮. ‘‘പദുമുത്തരോ നാമ ജിനോ, സബ്ബധമ്മാന പാരഗൂ;

വിവേകകാമോ സമ്ബുദ്ധോ, ഗച്ഛതേ അനിലഞ്ജസേ.

൯. ‘‘അവിദൂരേ ഹിമവന്തസ്സ, മഹാജാതസ്സരോ അഹു;

തത്ഥ മേ ഭവനം ആസി, പുഞ്ഞകമ്മേന സംയുതം.

൧൦. ‘‘ഭവനാ അഭിനിക്ഖമ്മ, അദ്ദസം ലോകനായകം;

ഇന്ദീവരംവ ജലിതം, ആദിത്തംവ ഹുതാസനം.

൧൧. ‘‘വിചിനം നദ്ദസം പുപ്ഫം, പൂജയിസ്സന്തി നായകം;

സകം ചിത്തം പസാദേത്വാ, അവന്ദിം സത്ഥുനോ അഹം.

൧൨. ‘‘മമ സീസേ മണിം ഗയ്ഹ, പൂജയിം ലോകനായകം;

ഇമായ മണിപൂജായ, വിപാകോ ഹോതു ഭദ്ദകോ.

൧൩. ‘‘പദുമുത്തരോ ലോകവിദൂ, ആഹുതീനം പടിഗ്ഗഹോ;

അന്തലിക്ഖേ ഠിതോ സത്ഥാ, ഇമം ഗാഥം അഭാസഥ.

൧൪. ‘സോ തേ ഇജ്ഝതു സങ്കപ്പോ, ലഭസ്സു വിപുലം സുഖം;

ഇമായ മണിപൂജായ, അനുഭോഹി മഹായസം’.

൧൫. ‘‘ഇദം വത്വാന ഭഗവാ, ജലജുത്തമനാമകോ;

അഗമാസി ബുദ്ധസേട്ഠോ, യത്ഥ ചിത്തം പണീഹിതം.

൧൬. ‘‘സട്ഠികപ്പാനി ദേവിന്ദോ, ദേവരജ്ജമകാരയിം;

അനേകസതക്ഖത്തുഞ്ച, ചക്കവത്തീ അഹോസഹം.

൧൭. ‘‘പുബ്ബകമ്മം സരന്തസ്സ, ദേവഭൂതസ്സ മേ സതോ;

മണി നിബ്ബത്തതേ മയ്ഹം, ആലോകകരണോ മമം.

൧൮. ‘‘ഛളസീതിസഹസ്സാനി, നാരിയോ മേ പരിഗ്ഗഹാ;

വിചിത്തവത്ഥാഭരണാ, ആമുക്കമണികുണ്ഡലാ [ആമുത്തമണികുണ്ഡലാ (സീ. സ്യാ. പീ.)].

൧൯. ‘‘അളാരപമ്ഹാ ഹസുലാ, സുസഞ്ഞാ തനുമജ്ഝിമാ;

പരിവാരേന്തി മം നിച്ചം, മണിപൂജായിദം ഫലം.

൨൦. ‘‘സോണ്ണമയാ മണിമയാ, ലോഹിതങ്ഗമയാ തഥാ;

ഭണ്ഡാ മേ സുകതാ ഹോന്തി, യദിച്ഛസി [യദിച്ഛായ (സീ. പീ.)] പിളന്ധനാ.

൨൧. ‘‘കൂടാഗാരാ ഗഹാരമ്മാ, സയനഞ്ച മഹാരഹം;

മമ സങ്കപ്പമഞ്ഞായ, നിബ്ബത്തന്തി യദിച്ഛകം.

൨൨. ‘‘ലാഭാ തേസം സുലദ്ധഞ്ച, യേ ലഭന്തി ഉപസ്സുതിം;

പുഞ്ഞക്ഖേത്തം മനുസ്സാനം, ഓസധം സബ്ബപാണിനം.

൨൩. ‘‘മയ്ഹമ്പി സുകതം കമ്മം, യോഹം അദക്ഖി നായകം;

വിനിപാതാ പമുത്തോമ്ഹി, പത്തോമ്ഹി അചലം പദം.

൨൪. ‘‘യം യം യോനുപപജ്ജാമി, ദേവത്തം അഥ മാനുസം;

ദിവസഞ്ചേവ രത്തിഞ്ച [സമന്താ സത്തരതനാ (സീ. പീ. ക.)], ആലോകോ ഹോതി മേ സദാ.

൨൫. ‘‘തായേവ മണിപൂജായ, അനുഭോത്വാന സമ്പദാ;

ഞാണാലോകോ മയാ ദിട്ഠോ, പത്തോമ്ഹി അചലം പദം.

൨൬. ‘‘സതസഹസ്സിതോ കപ്പേ, യം മണിം അഭിപൂജയിം;

ദുഗ്ഗതിം നാഭിജാനാമി, മണിപൂജായിദം ഫലം.

൨൭. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൨൮. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ മണിപൂജകോ ഥേരോ ഇമാ ഗാഥായോ

അഭാസിത്ഥാതി.

മണിപൂജകത്ഥേരസ്സാപദാനം ദുതിയം.