൩. ഉക്കാസതികത്ഥേരഅപദാനം

൩൦. ‘‘കോസികോ നാമ ഭഗവാ, ചിത്തകൂടേ വസീ തദാ;

ഝായീ ഝാനരതോ ബുദ്ധോ, വിവേകാഭിരതോ മുനി.

൩൧. ‘‘അജ്ഝോഗാഹേത്വാ [അജ്ഝോഗഹേത്വാ (സീ. സ്യാ. പീ.)] ഹിമവന്തം, നാരീഗണപുരക്ഖതോ;

അദ്ദസം കോസികം ബുദ്ധം, പുണ്ണമായേവ ചന്ദിമം.

൩൨. ‘‘ഉക്കാസതേ ഗഹേത്വാന, പരിവാരേസഹം തദാ;

സത്തരത്തിന്ദിവം ഠത്വാ [ബുദ്ധോ (സ്യാ. ക.)], അട്ഠമേന അഗച്ഛഹം.

൩൩. ‘‘വുട്ഠിതം കോസികം ബുദ്ധം, സയമ്ഭും അപരാജിതം;

പസന്നചിത്തോ വന്ദിത്വാ, ഏകം ഭിക്ഖം അദാസഹം.

൩൪. ‘‘തേന കമ്മേന ദ്വിപദിന്ദ, ലോകജേട്ഠ നരാസഭ;

ഉപ്പജ്ജിം തുസിതേ കായേ, ഏകഭിക്ഖായിദം ഫലം.

൩൫. ‘‘ദിവസഞ്ചേവ രത്തിഞ്ച, ആലോകോ ഹോതി മേ സദാ;

സമന്താ യോജനസതം, ഓഭാസേന ഫരാമഹം.

൩൬. ‘‘പഞ്ചപഞ്ഞാസകപ്പമ്ഹി, ചക്കവത്തീ അഹോസഹം;

ചാതുരന്തോ വിജിതാവീ, ജമ്ബുമണ്ഡസ്സ [ജമ്ബുസണ്ഡസ്സ (പീ.)] ഇസ്സരോ.

൩൭. ‘‘തദാ മേ നഗരം ആസി, ഇദ്ധം ഫീതം സുനിമ്മിതം;

തിംസയോജനമായാമം, വിത്ഥാരേന ച വീസതി.

൩൮. ‘‘സോഭണം നാമ നഗരം, വിസ്സകമ്മേന മാപിതം;

ദസസദ്ദാവിവിത്തം തം, സമ്മതാളസമാഹിതം.

൩൯. ‘‘ന തമ്ഹി നഗരേ അത്ഥി, വല്ലികട്ഠഞ്ച മത്തികാ;

സബ്ബസോണ്ണമയംയേവ, ജോതതേ നിച്ചകാലികം.

൪൦. ‘‘ചതുപാകാരപരിക്ഖിത്തം, തയോ ആസും മണിമയാ;

വേമജ്ഝേ താലപന്തീ ച, വിസ്സകമ്മേന മാപിതാ.

൪൧. ‘‘ദസസഹസ്സപോക്ഖരഞ്ഞോ, പദുമുപ്പലഛാദിതാ;

പുണ്ഡരീകേഹി [പുണ്ഡരീകാദി (സ്യാ.)] സഞ്ഛന്നാ, നാനാഗന്ധസമീരിതാ.

൪൨. ‘‘ചതുന്നവുതിതോ കപ്പേ, യം ഉക്കം ധാരയിം അഹം;

ദുഗ്ഗതിം നാഭിജാനാമി, ഉക്കധാരസ്സിദം ഫലം.

൪൩. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൪൪. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൪൫. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉക്കാസതികോ ഥേരോ ഇമാ ഗാഥായോ

അഭാസിത്ഥാതി.

ഉക്കാസതികത്ഥേരസ്സാപദാനം തതിയം.