൬. ഏകദീപിയത്ഥേരഅപദാനം

൧൨൪. ‘‘പരിനിബ്ബുതേ സുഗതേ, സിദ്ധത്ഥേ ലോകനായകേ;

സദേവമാനുസാ സബ്ബേ, പൂജേന്തി ദ്വിപദുത്തമം.

൧൨൫. ‘‘ആരോപിതേ ച ചിതകേ, സിദ്ധത്ഥേ ലോകനായകേ;

യഥാസകേന ഥാമേന, ചിതം പൂജേന്തി സത്ഥുനോ.

൧൨൬. ‘‘അവിദൂരേ ചിതകസ്സ, ദീപം ഉജ്ജാലയിം അഹം;

യാവ ഉദേതി സൂരിയോ, ദീപം മേ താവ ഉജ്ജലി.

൧൨൭. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൧൨൮. ‘‘തത്ഥ മേ സുകതം ബ്യമ്ഹം, ഏകദീപീതി ഞായതി;

ദീപസതസഹസ്സാനി, ബ്യമ്ഹേ പജ്ജലരേ മമ.

൧൨൯. ‘‘ഉദയന്തോവ സൂരിയോ, ദേഹോ മേ ജോതതേ സദാ;

സപ്പഭാഹി സരീരസ്സ, ആലോകോ ഹോതി മേ സദാ.

൧൩൦. ‘‘തിരോകുട്ടം [തിരോകുഡ്ഡം (സീ. സ്യാ. ക.)] തിരോസേലം, സമതിഗ്ഗയ്ഹ [സബ്ബത്ഥപി ഏവമേവ ദിസ്സതി] പബ്ബതം;

സമന്താ യോജനസതം, പസ്സാമി ചക്ഖുനാ അഹം.

൧൩൧. ‘‘സത്തസത്തതിക്ഖത്തുഞ്ച, ദേവലോകേ രമിം അഹം;

ഏകതിംസതിക്ഖത്തുഞ്ച, ദേവരജ്ജമകാരയിം.

൧൩൨. ‘‘അട്ഠവീസതിക്ഖത്തുഞ്ച, ചക്കവത്തീ അഹോസഹം;

പദേസരജ്ജം വിപുലം, ഗണനാതോ അസങ്ഖിയം.

൧൩൩. ‘‘ദേവലോകാ ചവിത്വാന, നിബ്ബത്തിം മാതുകുച്ഛിയം;

മാതുകുച്ഛിഗതസ്സാപി, അക്ഖി മേ ന നിമീലതി.

൧൩൪. ‘‘ജാതിയാ ചതുവസ്സോഹം, പബ്ബജിം അനഗാരിയം;

അഡ്ഢമാസേ അസമ്പത്തേ, അരഹത്തമപാപുണിം.

൧൩൫. ‘‘ദിബ്ബചക്ഖും വിസോധേസിം, ഭവാ സബ്ബേ സമൂഹതാ;

സബ്ബേ കിലേസാ സഞ്ഛിന്നാ, ഏകദീപസ്സിദം ഫലം.

൧൩൬. ‘‘തിരോകുട്ടം തിരോസേലം, പബ്ബതഞ്ചാപി കേവലം;

സമതിക്കമ്മ [സബ്ബത്ഥപീ ഏവമേവ ദിസ്സതി] പസ്സാമി, ഏകദീപസ്സിദം ഫലം.

൧൩൭. ‘‘വിസമാ മേ സമാ ഹോന്തി, അന്ധകാരോ ന വിജ്ജതി;

നാഹം പസ്സാമി തിമിരം, ഏകദീപസ്സിദം ഫലം.

൧൩൮. ‘‘ചതുന്നവുതിതോ കപ്പേ, യം ദീപമദദിം തദാ;

ദുഗ്ഗതിം നാഭിജാനാമി, ഏകദീപസ്സിദം ഫലം.

൧൩൯. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൧൪൦. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൧൪൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഏകദീപിയോ ഥേരോ ഇമാ ഗാഥായോ അഭാസിത്ഥാതി.

ഏകദീപിയത്ഥേരസ്സാപദാനം ഛട്ഠം.