൭. ഉച്ഛങ്ഗപുപ്ഫിയത്ഥേരഅപദാനം

൧൪൨. ‘‘നഗരേ ബന്ധുമതിയാ, അഹോസിം മാലികോ തദാ;

ഉച്ഛങ്ഗം പൂരയിത്വാന, അഗമം അന്തരാപണം.

൧൪൩. ‘‘ഭഗവാ തമ്ഹി സമയേ, ഭിക്ഖുസങ്ഘപുരക്ഖതോ;

മഹതാ ആനുഭാവേന, നിയ്യാതി ലോകനായകോ.

൧൪൪. ‘‘ദിസ്വാന ലോകപജ്ജോതം, വിപസ്സിം ലോകതാരണം;

പുപ്ഫം പഗ്ഗയ്ഹ ഉച്ഛങ്ഗാ, ബുദ്ധസേട്ഠം അപൂജയിം.

൧൪൫. ‘‘ഏകനവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൧൪൬. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൧൪൭. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൧൪൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉച്ഛങ്ഗപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

ഉച്ഛങ്ഗപുപ്ഫിയത്ഥേരസ്സാപദാനം സത്തമം.