൭. ഹേമകത്ഥേരഅപദാനം

൧൮൩. ‘‘പബ്ഭാരകൂടം നിസ്സായ, അനോമോ നാമ താപസോ;

അസ്സമം സുകതം കത്വാ, പണ്ണസാലേ വസീ തദാ.

൧൮൪. ‘‘സിദ്ധം തസ്സ തപോ കമ്മം, സിദ്ധിപത്തോ സകേ ബലേ;

സകസാമഞ്ഞവിക്കന്തോ, ആതാപീ നിപകോ മുനി.

൧൮൫. ‘‘വിസാരദോ സസമയേ, പരവാദേ ച കോവിദോ;

പട്ഠോ ഭൂമന്തലിക്ഖമ്ഹി, ഉപ്പാതമ്ഹി ച കോവിദോ.

൧൮൬. ‘‘വീതസോകോ നിരാരമ്ഭോ, അപ്പാഹാരോ അലോലുപോ;

ലാഭാലാഭേന സന്തുട്ഠോ, ഝായീ ഝാനരതോ മുനി.

൧൮൭. ‘‘പിയദസ്സീ നാമ സമ്ബുദ്ധോ, അഗ്ഗോ കാരുണികോ മുനി;

സത്തേ താരേതുകാമോ സോ, കരുണായ ഫരീ തദാ.

൧൮൮. ‘‘ബോധനേയ്യം ജനം ദിസ്വാ, പിയദസ്സീ മഹാമുനി;

ചക്കവാളസഹസ്സമ്പി, ഗന്ത്വാ ഓവദതേ മുനി.

൧൮൯. ‘‘മമുദ്ധരിതുകാമോ സോ, മമസ്സമമുപാഗമി;

ന ദിട്ഠോ മേ ജിനോ പുബ്ബേ, ന സുതോപി ച കസ്സചി.

൧൯൦. ‘‘ഉപ്പാതാ സുപിനാ മയ്ഹം, ലക്ഖണാ സുപ്പകാസിതാ;

പട്ഠോ ഭൂമന്തലിക്ഖമ്ഹി, നക്ഖത്തപദകോവിദോ.

൧൯൧. ‘‘സോഹം ബുദ്ധസ്സ സുത്വാന, തത്ഥ ചിത്തം പസാദയിം;

തിട്ഠന്തോ [ഭുഞ്ജന്തോ (സീ. പീ. ക.)] വാ നിസിന്നോ വാ, സരാമി നിച്ചകാലികം.

൧൯൨. ‘‘മയി ഏവം സരന്തമ്ഹി, ഭഗവാപി അനുസ്സരി;

ബുദ്ധം അനുസ്സരന്തസ്സ, പീതി മേ ഹോതി താവദേ.

൧൯൩. ‘‘കാലഞ്ച പുനരാഗമ്മ, ഉപേസി മം മഹാമുനി;

സമ്പത്തേപി ന ജാനാമി, അയം ബുദ്ധോ മഹാമുനി.

൧൯൪. ‘‘അനുകമ്പകോ കാരുണികോ, പിയദസ്സീ മഹാമുനി;

സഞ്ജാനാപേസി അത്താനം, ‘അഹം ബുദ്ധോ സദേവകേ’.

൧൯൫. ‘‘സഞ്ജാനിത്വാന സമ്ബുദ്ധം, പിയദസ്സിം മഹാമുനിം;

സകം ചിത്തം പസാദേത്വാ, ഇദം വചനമബ്രവിം.

൧൯൬. ‘‘‘അഞ്ഞേ [സബ്ബേ (സ്യാ.)] പീഠേ ച പല്ലങ്കേ, ആസന്ദീസു നിസീദരേ;

തുവമ്പി സബ്ബദസ്സാവീ, നിസീദ രതനാസനേ’.

൧൯൭. ‘‘സബ്ബരതനമയം പീഠം, നിമ്മിനിത്വാന താവദേ;

പിയദസ്സിസ്സ മുനിനോ, അദാസിം ഇദ്ധിനിമ്മിതം.

൧൯൮. ‘‘രതനേ ച നിസിന്നസ്സ, പീഠകേ ഇദ്ധിനിമ്മിതേ;

കുമ്ഭമത്തം ജമ്ബുഫലം, അദാസിം താവദേ അഹം.

൧൯൯. ‘‘മമ ഹാസം ജനേത്വാന, പരിഭുഞ്ജി മഹാമുനി;

തദാ ചിത്തം പസാദേത്വാ, സത്ഥാരം അഭിവാദയിം.

൨൦൦. ‘‘പിയദസ്സീ തു ഭഗവാ, ലോകജേട്ഠോ നരാസഭോ;

രതനാസനമാസീനോ, ഇമാ ഗാഥാ അഭാസഥ.

൨൦൧. ‘‘‘യോ മേ രതനമയം പീഠം, അമതഞ്ച ഫലം അദാ;

തമഹം കിത്തയിസ്സാമി, സുണാഥ മമ ഭാസതോ.

൨൦൨. ‘‘‘സത്തസത്തതി കപ്പാനി, ദേവലോകേ രമിസ്സതി;

പഞ്ചസത്തതിക്ഖത്തുഞ്ച, ചക്കവത്തീ ഭവിസ്സതി.

൨൦൩. ‘‘‘ദ്വത്തിംസക്ഖത്തും ദേവിന്ദോ, ദേവരജ്ജം കരിസ്സതി;

പദേസരജ്ജം വിപുലം, ഗണനാതോ അസങ്ഖിയം.

൨൦൪. ‘‘‘സോണ്ണമയം രൂപിമയം, പല്ലങ്കം സുകതം ബഹും;

ലോഹിതങ്ഗമയഞ്ചേവ, ലച്ഛതി രതനാമയം.

൨൦൫. ‘‘‘ചങ്കമന്തമ്പി മനുജം, പുഞ്ഞകമ്മസമങ്ഗിനം;

പല്ലങ്കാനി അനേകാനി, പരിവാരേസ്സരേ തദാ.

൨൦൬. ‘‘‘കൂടാഗാരാ ച പാസാദാ, സയനഞ്ച മഹാരഹം;

ഇമസ്സ ചിത്തമഞ്ഞായ, നിബ്ബത്തിസ്സന്തി താവദേ.

൨൦൭. ‘‘‘സട്ഠി നാഗസഹസ്സാനി, സബ്ബാലങ്കാരഭൂസിതാ;

സുവണ്ണകച്ഛാ മാതങ്ഗാ, ഹേമകപ്പനവാസസാ [ഹേമകപ്പനിവാസനാ (സീ. സ്യാ.), ഹേമകപ്പനിവാസസാ (ക.)].

൨൦൮. ‘‘‘ആരൂള്ഹാ ഗാമണീയേഹി, തോമരങ്കുസപാണിഭി;

ഇമം പരിചരിസ്സന്തി, രത്നപീഠസ്സിദം ഫലം.

൨൦൯. ‘‘‘സട്ഠി അസ്സസഹസ്സാനി, സബ്ബാലങ്കാരഭൂസിതാ;

ആജാനീയാവ ജാതിയാ, സിന്ധവാ സീഘവാഹിനോ.

൨൧൦. ‘‘‘ആരൂള്ഹാ ഗാമണീയേഹി, ഇല്ലിയാചാപധാരിഭി;

തേപിമം പരിചരിസ്സന്തി, രത്നപീഠസ്സിദം ഫലം.

൨൧൧. ‘‘‘സട്ഠി രഥസഹസ്സാനി, സബ്ബാലങ്കാരഭൂസിതാ;

ദീപാ അഥോപി വേയഗ്ഘാ, സന്നദ്ധാ ഉസ്സിതദ്ധജാ.

൨൧൨. ‘‘‘ആരൂള്ഹാ ഗാമണീയേഹി, ചാപഹത്ഥേഹി വമ്മിഭി;

പരിവാരേസ്സന്തിമം നിച്ചം, രത്നപീഠസ്സിദം ഫലം.

൨൧൩. ‘‘‘സട്ഠി ധേനുസഹസ്സാനി, ദോഹഞ്ഞാ പുങ്ഗവൂസഭേ;

വച്ഛകേ ജനയിസ്സന്തി, രത്നപീഠസ്സിദം ഫലം.

൨൧൪. ‘‘‘സോളസിത്ഥിസഹസ്സാനി, സബ്ബാലങ്കാരഭൂസിതാ;

വിചിത്തവത്ഥാഭരണാ, ആമുക്കമണികുണ്ഡലാ.

൨൧൫. ‘‘‘അളാരപമ്ഹാ ഹസുലാ, സുസഞ്ഞാ തനുമജ്ഝിമാ;

പരിവാരേസ്സന്തിമം നിച്ചം, രത്നപീഠസ്സിദം ഫലം.

൨൧൬. ‘‘‘അട്ഠാരസേ കപ്പസതേ, ഗോതമോ നാമ ചക്ഖുമാ;

തമന്ധകാരം വിധമിത്വാ, ബുദ്ധോ ലോകേ ഭവിസ്സതി.

൨൧൭. ‘‘‘തസ്സ ദസ്സനമാഗമ്മ, പബ്ബജിസ്സതികിഞ്ചനോ;

തോസയിത്വാന സത്ഥാരം, സാസനേഭിരമിസ്സതി.

൨൧൮. ‘‘‘തസ്സ ധമ്മം സുണിത്വാന, കിലേസേ ഘാതയിസ്സതി;

സബ്ബാസവേ പരിഞ്ഞായ, നിബ്ബായിസ്സതിനാസവോ’.

൨൧൯. ‘‘വീരിയം മേ ധുരധോരയ്ഹം, യോഗക്ഖേമാധിവാഹനം;

ഉത്തമത്ഥം പത്ഥയന്തോ, സാസനേ വിഹരാമഹം.

൨൨൦. ‘‘ഇദം പച്ഛിമകം മയ്ഹം, ചരിമോ വത്തതേ ഭവോ;

സബ്ബാസവാ പരിക്ഖീണാ, നത്ഥി ദാനി പുനബ്ഭവോ.

൨൨൧. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൨൨൨. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൨൩. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഹേമകോ ഥേരോ ഇമാ ഗാഥായോ അഭാസിത്ഥാതി;

ഹേമകത്ഥേരസ്സാപദാനം സത്തമം.

സത്തരസമം ഭാണവാരം.