൨. പുണ്ണകത്ഥേരഅപദാനം

൨൯. ‘‘പബ്ഭാരകൂടം നിസ്സായ, സയമ്ഭൂ അപരാജിതോ;

ആബാധികോ ച സോ [ആബാധികോ ഗരു (സീ.)] ബുദ്ധോ, വസതി പബ്ബതന്തരേ.

൩൦. ‘‘മമ അസ്സമസാമന്താ, പനാദോ ആസി താവദേ;

ബുദ്ധേ നിബ്ബായമാനമ്ഹി, ആലോകോ ഉദപജ്ജഥ [ആസി താവദേ (സ്യാ. ക.)].

൩൧. ‘‘യാവതാ വനസണ്ഡസ്മിം, അച്ഛകോകതരച്ഛകാ;

വാളാ ച [ബ്യഗ്ഘാ (സീ.)] കേസരീ സബ്ബേ, അഭിഗജ്ജിംസു താവദേ.

൩൨. ‘‘ഉപ്പാതം തമഹം ദിസ്വാ, പബ്ഭാരം അഗമാസഹം;

തത്ഥദ്ദസ്സാസിം സമ്ബുദ്ധം, നിബ്ബുതം അപരാജിതം.

൩൩. ‘‘സുഫുല്ലം സാലരാജംവ, സതരംസിംവ ഉഗ്ഗതം;

വീതച്ചികംവ അങ്ഗാരം, നിബ്ബുതം അപരാജിതം.

൩൪. ‘‘തിണം കട്ഠഞ്ച പൂരേത്വാ, ചിതകം തത്ഥകാസഹം;

ചിതകം സുകതം കത്വാ, സരീരം ഝാപയിം അഹം.

൩൫. ‘‘സരീരം ഝാപയിത്വാന, ഗന്ധതോയം സമോകിരിം;

അന്തലിക്ഖേ ഠിതോ യക്ഖോ, നാമമഗ്ഗഹി താവദേ.

൩൬. ‘‘യം പൂരിതം [തം പൂരിതം (സ്യാ.), സപ്പുരിസ (ക.)] തയാ കിച്ചം, സയമ്ഭുസ്സ മഹേസിനോ;

പുണ്ണകോ നാമ നാമേന, സദാ ഹോഹി തുവം [യദാ ഹോസി തുവം (സ്യാ.), സദാ ഹോഹിതി ത്വം (ക.)] മുനേ.

൩൭. ‘‘തമ്ഹാ കായാ ചവിത്വാന, ദേവലോകം അഗച്ഛഹം;

തത്ഥ ദിബ്ബമയോ ഗന്ധോ, അന്തലിക്ഖാ പവസ്സതി [അന്തലിക്ഖേ പവായതി (സീ.)].

൩൮. ‘‘തത്രാപി നാമധേയ്യം മേ, പുണ്ണകോതി അഹൂ തദാ;

ദേവഭൂതോ മനുസ്സോ വാ, സങ്കപ്പം പൂരയാമഹം.

൩൯. ‘‘ഇദം പച്ഛിമകം മയ്ഹം, ചരിമോ വത്തതേ ഭവോ;

ഇധാപി പുണ്ണകോ നാമ, നാമധേയ്യം പകാസതി.

൪൦. ‘‘തോസയിത്വാന സമ്ബുദ്ധം, ഗോതമം സക്യപുങ്ഗവം;

സബ്ബാസവേ പരിഞ്ഞായ, വിഹരാമി അനാസവോ.

൪൧. ‘‘ഏകനവുതിതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, തനുകിച്ചസ്സിദം ഫലം.

൪൨. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൪൩. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൪൪. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പുണ്ണകോ ഥേരോ ഇമാ ഗാഥായോ അഭാസിത്ഥാതി.

പുണ്ണകത്ഥേരസ്സാപദാനം ദുതിയം.