൨. പാടലിപുപ്ഫിയത്ഥേരഅപദാനം

൬. ‘‘വിപസ്സീ നാമ ഭഗവാ, സയമ്ഭൂ അഗ്ഗപുഗ്ഗലോ;

പുരക്ഖതോ സസിസ്സേഹി, പാവിസി ബന്ധുമം ജിനോ.

൭. ‘‘തീണി പാടലിപുപ്ഫാനി, ഉച്ഛങ്ഗേ ഠപിതാനി മേ;

സീസം ന്ഹായിതുകാമോവ, നദീതിത്ഥം അഗച്ഛഹം.

൮. ‘‘നിക്ഖമ്മ ബന്ധുമതിയാ, അദ്ദസം ലോകനായകം;

ഇന്ദീവരംവ ജലിതം, ആദിത്തംവ ഹുതാസനം.

൯. ‘‘ബ്യഗ്ഘൂസഭംവ പവരം, അഭിജാതംവ കേസരിം;

ഗച്ഛന്തം സമണാനഗ്ഗം, ഭിക്ഖുസങ്ഘപുരക്ഖതം.

൧൦. ‘‘തസ്മിം പസന്നോ [സമണേ (ക.)] സുഗതേ, കിലേസമലധോവനേ;

ഗഹേത്വാ തീണി പുപ്ഫാനി, ബുദ്ധസേട്ഠം അപൂജയിം.

൧൧. ‘‘ഏകനവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൧൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പാടലിപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

പാടലിപുപ്ഫിയത്ഥേരസ്സാപദാനം ദുതിയം.