൩. തീണുപ്പലമാലിയത്ഥേരഅപദാനം

൧൩. ‘‘ചന്ദഭാഗാനദീതീരേ, അഹോസിം വാനരോ തദാ;

അദ്ദസം വിരജം ബുദ്ധം, നിസിന്നം പബ്ബതന്തരേ.

൧൪. ‘‘ഓഭാസേന്തം ദിസാ സബ്ബാ, സാലരാജംവ ഫുല്ലിതം;

ലക്ഖണബ്യഞ്ജനൂപേതം, ദിസ്വാനത്തമനോ അഹം.

൧൫. ‘‘ഉദഗ്ഗചിത്തോ സുമനോ, പീതിയാ ഹട്ഠമാനസോ;

തീണി ഉപ്പലപുപ്ഫാനി, മത്ഥകേ അഭിരോപയിം.

൧൬. ‘‘പൂജയിത്വാന പുപ്ഫാനി, ഫുസ്സസ്സാഹം മഹേസിനോ;

സഗാരവോ ഭവിത്വാന, പക്കാമിം ഉത്തരാമുഖോ.

൧൭. ‘‘ഗച്ഛന്തോ പടികുടികോ, വിപ്പസന്നേന ചേതസാ;

സേലന്തരേ പതിത്വാന, പാപുണിം ജീവിതക്ഖയം.

൧൮. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ പുരിമം ജാതിം, താവതിംസമഗച്ഛഹം.

൧൯. ‘‘സതാനം തീണിക്ഖത്തുഞ്ച, ദേവരജ്ജമകാരയിം;

സതാനം പഞ്ചക്ഖത്തുഞ്ച, ചക്കവത്തീ അഹോസഹം.

൨൦. ‘‘ദ്വേനവുതേ ഇതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൨൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ തീണുപ്പലമാലിയോ ഥേരോ ഇമാ ഗാഥായോ അഭാസിത്ഥാതി.

തീണുപ്പലമാലിയത്ഥേരസ്സാപദാനം തതിയം.