൧൦. ഉക്ഖിത്തപദുമിയത്ഥേരഅപദാനം

൧൨൯. ‘‘നഗരേ ഹംസവതിയാ, അഹോസിം മാലികോ തദാ;

ഓഗാഹേത്വാ പദുമസരം, സതപത്തം ഓചിനാമഹം.

൧൩൦. ‘‘പദുമുത്തരോ നാമ ജിനോ, സബ്ബധമ്മാന പാരഗൂ;

സഹ സതസഹസ്സേഹി [സതസഹസ്സസിസ്സേഹി (ക.)], സന്തചിത്തേഹി താദിഭി.

൧൩൧. ‘‘ഖീണാസവേഹി സുദ്ധേഹി, ഛളഭിഞ്ഞേഹി ഝായിഭി [സോ തദാ (സീ.), സോ സഹ (ക.)];

മമ വുദ്ധിം സമന്വേസം, ആഗച്ഛി മമ സന്തികം [മമ സന്തികേ (സീ.), പുരിസുത്തമോ (സ്യാ. ക.)].

൧൩൨. ‘‘ദിസ്വാനഹം ദേവദേവം, സയമ്ഭും ലോകനായകം;

വണ്ടേ ഛേത്വാ സതപത്തം, ഉക്ഖിപിമമ്ബരേ തദാ.

൧൩൩. ‘‘യദി ബുദ്ധോ തുവം വീര, ലോകജേട്ഠോ നരാസഭോ;

സയം ഗന്ത്വാ സതപത്താ, മത്ഥകേ ധാരയന്തു തേ.

൧൩൪. ‘‘അധിട്ഠഹി മഹാവീരോ, ലോകജേട്ഠോ നരാസഭോ;

ബുദ്ധസ്സ ആനുഭാവേന, മത്ഥകേ ധാരയിംസു തേ.

൧൩൫. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൧൩൬. ‘‘തത്ഥ മേ സുകതം ബ്യമ്ഹം, സതപത്തന്തി വുച്ചതി;

സട്ഠിയോജനമുബ്ബിദ്ധം, തിംസയോജനവിത്ഥതം.

൧൩൭. ‘‘സഹസ്സക്ഖത്തും ദേവിന്ദോ, ദേവരജ്ജമകാരയിം;

പഞ്ചസത്തതിക്ഖത്തുഞ്ച, ചക്കവത്തീ അഹോസഹം.

൧൩൮. ‘‘പദേസരജ്ജം വിപുലം, ഗണനാതോ അസങ്ഖിയം;

അനുഭോമി സകം കമ്മം, പുബ്ബേ സുകതമത്തനോ.

൧൩൯. ‘‘തേനേവേകപദുമേന, അനുഭോത്വാന സമ്പദാ;

ഗോതമസ്സ ഭഗവതോ, ധമ്മം സച്ഛികരിം അഹം.

൧൪൦. ‘‘കിലേസാ ഝാപിതാ മയ്ഹം, ഭവാ സബ്ബേ സമൂഹതാ;

നാഗോവ ബന്ധനം ഛേത്വാ, വിഹരാമി അനാസവോ.

൧൪൧. ‘‘സതസഹസ്സിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ഏകപദുമസ്സിദം ഫലം.

൧൪൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉക്ഖിത്തപദുമിയോ ഥേരോ ഇമാ ഗാഥായോ അഭാസിത്ഥാതി.

ഉക്ഖിത്തപദുമിയത്ഥേരസ്സാപദാനം ദസമം.

ഗന്ധോദകവഗ്ഗോ ചതുതിംസതിമോ.