൯. കിംകണികപുപ്ഫിയത്ഥേരഅപദാനം

൪൭. ‘‘സുമങ്ഗലോതി നാമേന, സയമ്ഭൂ അപരാജിതോ;

പവനാ നിക്ഖമിത്വാന, നഗരം പാവിസീ ജിനോ.

൪൮. ‘‘പിണ്ഡചാരം ചരിത്വാന, നിക്ഖമ്മ നഗരാ മുനി;

കതകിച്ചോവ സമ്ബുദ്ധോ, സോ വസീ വനമന്തരേ.

൪൯. ‘‘കിംകണിപുപ്ഫം പഗ്ഗയ്ഹ, ബുദ്ധസ്സ അഭിരോപയിം;

പസന്നചിത്തോ സുമനോ, സയമ്ഭുസ്സ മഹേസിനോ.

൫൦. ‘‘ചതുന്നവുതിതോ കപ്പേ, യം പുപ്ഫമഭിരോപയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൫൧. ‘‘ഛളാസീതിമ്ഹിതോ കപ്പേ, അപിലാസിസനാമകോ;

സത്തരതനസമ്പന്നോ, ചക്കവത്തീ മഹബ്ബലോ.

൫൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ കിംകണികപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

കിംകണികപുപ്ഫിയത്ഥേരസ്സാപദാനം നവമം.