൧൦. യൂഥികപുപ്ഫിയത്ഥേരഅപദാനം

൫൩. ‘‘പദുമുത്തരോ നാമ ജിനോ, ആഹുതീനം പടിഗ്ഗഹോ;

പവനാ നിക്ഖമിത്വാന, വിഹാരം യാതി ചക്ഖുമാ.

൫൪. ‘‘ഉഭോ ഹത്ഥേഹി പഗ്ഗയ്ഹ, യൂഥികം പുപ്ഫമുത്തമം;

ബുദ്ധസ്സ അഭിരോപയിം, മേത്തചിത്തസ്സ താദിനോ.

൫൫. ‘‘തേന ചിത്തപ്പസാദേന, അനുഭോത്വാന സമ്പദാ;

കപ്പാനം സതസഹസ്സം, ദുഗ്ഗതിം നുപപജ്ജഹം.

൫൬. ‘‘ഇതോ പഞ്ഞാസകപ്പേസു, ഏകോ ആസിം ജനാധിപോ;

സമിത്തനന്ദനോ നാമ, ചക്കവത്തീ മഹബ്ബലോ.

൫൭. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ യൂഥികപുപ്ഫിയോ ഥേരോ ഇമാ ഗാഥായോ അഭാസിത്ഥാതി;

യൂഥികപുപ്ഫിയത്ഥേരസ്സാപദാനം ദസമം.

തമാലപുപ്ഫിയവഗ്ഗോ വീസതിമോ.

തസ്സുദ്ദാനം –

തമാലതിണസന്ഥാരോ, ഖണ്ഡഫുല്ലി അസോകിയോ;

അങ്കോലകീ കിസലയോ, തിന്ദുകോ നേലപുപ്ഫിയോ;

കിംകണികോ യൂഥികോ ച, ഗാഥാ പഞ്ഞാസ അട്ഠ ചാതി.

അഥ വഗ്ഗുദ്ദാനം –

ഭിക്ഖാദായീ പരിവാരോ, സേരേയ്യോ സോഭിതോ തഥാ;

ഛത്തഞ്ച ബന്ധുജീവീ ച, സുപാരിചരിയോപി ച.

കുമുദോ കുടജോ ചേവ, തമാലി ദസമോ കതോ;

ഛസതാനി ച ഗാഥാനി, ഛസട്ഠി ച തതുത്തരി.

ഭിക്ഖാവഗ്ഗദസകം.