൮. അച്ചേകചീവരസിക്ഖാപദവണ്ണനാ

൬൪൬-൯. തേന സമയേനാതി അച്ചേകചീവരസിക്ഖാപദം. തത്ഥ ദസാഹാനാഗതന്തി ദസ അഹാനി ദസാഹം, തേന ദസാഹേന അനാഗതാ ദസാഹാനാഗതാ, ദസാഹേന അസമ്പത്താതി അത്ഥോ, തം ദസാഹാനാഗതം, അച്ചന്തസംയോഗവസേന ഭുമ്മത്ഥേ ഉപയോഗവചനം, തേനേവസ്സ പദഭാജനേ ‘‘ദസാഹാനാഗതായാ’’തി വുത്തം. പവാരണായാതി ഇദം പന യാ സാ ദസാഹാനാഗതാതി വുത്താ, തം സരൂപതോ ദസ്സേതും അസമ്മോഹത്ഥം അനുപയോഗവചനം.

കത്തികതേമാസികപുണ്ണമന്തി പഠമകത്തികതേമാസികപുണ്ണമം. ഇധാപി പഠമപദസ്സ അനുപയോഗത്താ പുരിമനയേനേവ ഭുമ്മത്ഥേ ഉപയോഗവചനം. ഇദം വുത്തം ഹോതി – ‘‘‘യതോ പട്ഠായ പഠമമഹാപവാരണാ ദസാഹാനാഗതാ’തി വുച്ചതി, സചേപി താനി ദിവസാനി അച്ചന്തമേവ ഭിക്ഖുനോ അച്ചേകചീവരം ഉപ്പജ്ജേയ്യ, ‘അച്ചേകം ഇദ’ന്തി ജാനമാനേന ഭിക്ഖുനാ സബ്ബമ്പി പടിഗ്ഗഹേതബ്ബ’’ന്തി. തേന പവാരണാമാസസ്സ ജുണ്ഹപക്ഖപഞ്ചമിതോ പഠായ ഉപ്പന്നസ്സ ചീവരസ്സ നിധാനകാലോ ദസ്സിതോ ഹോതി. കാമഞ്ചേസ ‘‘ദസാഹപരമം അതിരേകചീവരം ധാരേതബ്ബ’’ന്തി ഇമിനാവ സിദ്ധോ, അത്ഥുപ്പത്തിവസേന പന അപുബ്ബം വിയ അത്ഥം ദസ്സേത്വാ സിക്ഖാപദം ഠപിതം.

അച്ചേകചീവരന്തി അച്ചായികചീവരം വുച്ചതി, തസ്സ പന അച്ചായികഭാവം ദസ്സേതും ‘‘സേനായ വാ ഗന്തുകാമോ ഹോതീ’’തിആദി വുത്തം. തത്ഥ സദ്ധാതി ഇമിനാ സദ്ധാമത്തകമേവ ദസ്സിതം. പസാദോതി ഇമിനാ സുപ്പസന്നാ ബലവസദ്ധാ. ഏതം അച്ചേകചീവരം നാമാതി ഏതം ഇമേഹി കാരണേഹി ദാതുകാമേന ദൂതം വാ പേസേത്വാ സയം വാ ആഗന്ത്വാ ‘‘വസ്സാവാസികം ദസ്സാമീ’’തി ഏവം ആരോചിതം ചീവരം അച്ചേകചീവരം നാമ ഹോതീ. ഛട്ഠിതോ പട്ഠായ പന ഉപ്പന്നം അനച്ചേകചീവരമ്പി പച്ചുദ്ധരിത്വാ ഠപിതചീവരമ്പി ഏതം പരിഹാരം ലഭതിയേവ.

സഞ്ഞാണം കത്വാ നിക്ഖിപിതബ്ബന്തി കിഞ്ചി നിമിത്തം കത്വാ ഠപേതബ്ബം. കസ്മാ ഏതം വുത്തം? യദി ഹി തം പുരേ പവാരണായ വിഭജന്തി. യേന ഗഹിതം, തേന ഛിന്നവസ്സേന ന ഭവിതബ്ബം. സചേ പന ഹോതി, തം ചീവരം സങ്ഘികമേവ ഹോതി. തതോ സല്ലക്ഖേത്വാ സുഖം ദാതും ഭവിസ്സതീതി.

൬൫൦. അച്ചേകചീവരേ അച്ചേകചീവരസഞ്ഞീതി ഏവമാദി വിഭജിത്വാ ഗഹിതമേവ സന്ധായ വുത്തം. സചേ പന അവിഭത്തം ഹോതി, സങ്ഘസ്സ വാ ഭണ്ഡാഗാരേ, ചീവരസമയാതിക്കമേപി അനാപത്തി. ഇതി അതിരേകചീവരസ്സ ദസാഹം പരിഹാരോ. അകതസ്സ വസ്സികസാടികചീവരസ്സ അനത്ഥതേ കഥിനേ പഞ്ച മാസാ, വസ്സേ ഉക്കഡ്ഢിതേ ഛ മാസാ, അത്ഥതേ കഥിനേ അപരേ ചത്താരോ മാസാ. ഹേമന്തസ്സ പച്ഛിമേ ദിവസേ മൂലചീവരാധിട്ഠാനവസേന അപരോപി ഏകോ മാസോതി ഏകാദസ മാസാ പരിഹാരോ. സതിയാ പച്ചാസായ മൂലചീവരസ്സ ഏകോ മാസോ, അച്ചേകചീവരസ്സ അനത്ഥതേ കഥിനേ ഏകാദസദിവസാധികോ മാസോ, അത്ഥതേ കഥിനേ ഏകാദസദിവസാധികാ പഞ്ച മാസാ, തതോ പരം ഏകദിവസമ്പി പരിഹാരോ നത്ഥീതി വേദിതബ്ബം.

അനച്ചേകചീവരേതി അച്ചേകചീവരസദിസേ അഞ്ഞസ്മിം. സേസമേത്ഥ ഉത്താനത്ഥമേവാതി.

കഥിനസമുട്ഠാനം – അകിരിയം, നോസഞ്ഞാവിമോക്ഖം, അചിത്തകം, പണ്ണത്തിവജ്ജം, കായകമ്മവചീകമ്മം, തിചിത്തം, തിവേദനന്തി.

അച്ചേകചീവരസിക്ഖാപദവണ്ണനാ നിട്ഠിതാ.