൬. സല്ലസുത്തവണ്ണനാ

൨൫൪. ഛട്ഠേ തത്രാതി തേസു ദ്വീസു ജനേസു. അനുവേധം വിജ്ഝേയ്യാതി തസ്സേവ വണമുഖസ്സ അങ്ഗുലന്തരേ വാ ദ്വങ്ഗുലന്തരേ വാ ആസന്നപദേസേ അനുഗതവേധം. ഏവം വിദ്ധസ്സ ഹി സാ അനുവേധാ വേദനാ പഠമവേദനായ ബലവതരാ ഹോതി, പച്ഛാ ഉപ്പജ്ജമാനാ ദോമനസ്സവേദനാപി ഏവമേവ പുരിമവേദനായ ബലവതരാ ഹോതി. ദുക്ഖായ വേദനായ നിസ്സരണന്തി ദുക്ഖായ വേദനായ ഹി സമാധിമഗ്ഗഫലാനി നിസ്സരണം, തം സോ ന ജാനാതി, കാമസുഖമേവ നിസ്സരണന്തി ജാനാതി. താസം വേദനാനന്തി താസം സുഖദുക്ഖവേദനാനം. സഞ്ഞുത്തോ നം വേദയതീതി കിലേസേഹി സമ്പയുത്തോവ ഹുത്വാ തം വേദനം വേദയതി, ന വിപ്പയുത്തോ. സഞ്ഞുത്തോ ദുക്ഖസ്മാതി കരണത്ഥേ നിസ്സക്കം, ദുക്ഖേന സമ്പയുത്തോതി അത്ഥോ. സങ്ഖാതധമ്മസ്സാതി വിദിതധമ്മസ്സ തുലിതധമ്മസ്സ. ബഹുസ്സുതസ്സാതി പരിയത്തിബഹുസ്സുതസ്സ പടിവേധബഹുസ്സുതസ്സ ച. സമ്മാ പജാനാതി ഭവസ്സ പാരഗൂതി ഭവസ്സ പാരം നിബ്ബാനം ഗതോ, തദേവ നിബ്ബാനം സമ്മാ പജാനാതി. ഇമസ്മിമ്പി സുത്തേ ആരമ്മണാനുസയോവ കഥിതോ. അരിയസാവകേസു ച ഖീണാസവോ ഏത്ഥ ധുരം, അനാഗാമീപി വട്ടതീതി വദന്തി.