൪. പാതാലസുത്തവണ്ണനാ

൨൫൨. ചതുത്ഥേ പാതാലോതി പാതസ്സ അലം പരിയത്തോ, നത്ഥി ഏത്ഥ പതിട്ഠാതി പാതാലോ. അസന്തം അവിജ്ജമാനന്തി അസമ്ഭൂതത്തം അപഞ്ഞായമാനത്തം. ഏവം വാചം ഭാസതീതി അത്ഥി മഹാസമുദ്ദേ പാതാലോതി ഏവം വാചം. സോ ഹി യം തം ബലവാമുഖം മഹാസമുദ്ദസ്സ ഉദകം വേഗേന പക്ഖന്ദിത്വാ ചക്കവാളം വാ സിനേരും വാ ആഹച്ച യോജനദ്വിയോജനദസയോജനപ്പമാണമ്പി ഉഗ്ഗന്ത്വാ പുന മഹാസമുദ്ദേ പതതി, യസ്സ പതിതട്ഠാനേ മഹാനരകപപാതോ വിയ ഹോതി, യം ലോകേ ബലവാമുഖന്തി വുച്ചതി. തം സന്ധായ ഏവം വദതി.

യസ്മാ പന തത്ഥ തഥാരൂപാനം മച്ഛകച്ഛപദേവദാനവാനം പതിട്ഠാപി ഹോതി സുഖനിവാസോപി, തസ്മാ അസന്തം അസംവിജ്ജമാനം തം തം വാചം ഭാസതി നാമ. യസ്മാ പന സബ്ബപുഥുജ്ജനാ സാരീരികായ ദുക്ഖവേദനായ പതിട്ഠാതും ന സക്കോന്തി, തസ്മാ പാതസ്സ അലന്തി അത്ഥേന അയമേവ പാതാലോതി ദസ്സേന്തോ സാരീരികാനം ഖോ ഏതം ഭിക്ഖവേതിആദിമാഹ.

പാതാലേ ന പച്ചുട്ഠാസീതി പാതാലസ്മിം ന പതിട്ഠാസി. ഗാധന്തി പതിട്ഠം. അക്കന്ദതീതി അനിബദ്ധം വിപ്പലാപം വിലപന്തോ കന്ദതി. ദുബ്ബലോതി ദുബ്ബലഞാണോ. അപ്പഥാമകോതി ഞാണഥാമസ്സ പരിത്തതായ പരിത്തഥാമകോ. ഇമസ്മിം സുത്തേ അരിയസാവകോതി സോതാപന്നോ. സോതാപന്നോ ഹി ഏത്ഥ ധുരം, ബലവവിപസ്സകോ ന തിക്ഖബുദ്ധി ഉപ്പന്നം വേദനം അനനുവത്തിത്വാ പതിട്ഠാതും സമത്ഥോ യോഗാവചരോപി വട്ടതി.