൩. കുമ്മോപമസുത്തവണ്ണനാ

൨൪൦. തതിയേ കുമ്മോതി അട്ഠികുമ്മോ. കച്ഛപോതി തസ്സേവ വേവചനം. അനുനദീതീരേതി നദിയാ അനുതീരേ. ഗോചരപസുതോതി ‘‘സചേ കിഞ്ചി ഫലാഫലം ലഭിസ്സാമി, ഖാദിസ്സാമീ’’തി ഗോചരത്ഥായ പസുതോ ഉസ്സുക്കോ തന്നിബന്ധോ. സമോദഹിത്വാതി സമുഗ്ഗേ വിയ പക്ഖിപിത്വാ. സങ്കസായതീതി അച്ഛതി. സമോദഹന്തി സമോദഹന്തോ ഠപേന്തോ. ഇദം വുത്തം ഹോതി – യഥാ കുമ്മോ അങ്ഗാനി സകേ കപാലേ സമോദഹന്തോ സിങ്ഗാലസ്സ ഓതാരം ന ദേതി, ന ച നം സിങ്ഗാലോ പസഹതി, ഏവം ഭിക്ഖു അത്തനോ മനോവിതക്കേ സകേ ആരമ്മണകപാലേ സമോദഹന്തോ കിലേസമാരസ്സ ഓതാരം ന ദേതി, ന ച നം മാരോ പസഹതി.

അനിസ്സിതോതി തണ്ഹാദിട്ഠിനിസ്സയേഹി അനിസ്സിതോ. അഞ്ഞമഹേഠയാനോതി അഞ്ഞം കഞ്ചി പുഗ്ഗലം അവിഹേഠേന്തോ. പരിനിബ്ബുതോതി കിലേസപരിനിബ്ബാനേന പരിനിബ്ബുതോ. നൂപവദേയ്യ കഞ്ചീതി അഞ്ഞം കഞ്ചി പുഗ്ഗലം സീലവിപത്തിയാ വാ ആചാരവിപത്തിയാ വാ അത്താനം ഉക്കംസേതുകാമതായ വാ പരം വമ്ഭേതുകാമതായ വാ ന ഉപവദേയ്യ, അഞ്ഞദത്ഥു പഞ്ച ധമ്മേ അജ്ഝത്തം ഉപട്ഠപേത്വാ, ‘‘കാലേന വക്ഖാമി, നോ അകാലേന, ഭൂതേന വക്ഖാമി, നോ അഭൂതേന, സണ്ഹേന വക്ഖാമി, നോ ഫരുസേന, അത്ഥസംഹിതേന വക്ഖാമി, നോ അനത്ഥസംഹിതേന, മേത്തചിത്തോ വക്ഖാമി, നോ ദോസന്തരോ’’തി ഏവം ഉല്ലുമ്പനസഭാവസണ്ഠിതേനേവ ചിത്തേന വിഹരതി.