൩. അന്ധകവിന്ദസുത്തവണ്ണനാ

൧൮൪. തതിയേ അന്ധകവിന്ദന്തി ഏവംനാമകം ഗാമം. ഉപസങ്കമീതി ‘‘സത്ഥാ ഇദാനിപി വീരിയം കരോതി പധാനമനുയുഞ്ജതി, ഗച്ഛാമിസ്സ സന്തികേ ഠത്വാ സാസനാനുച്ഛവികം വീരിയപടിസംയുത്തം ഗാഥം വക്ഖാമീ’’തി ഉപസങ്കമി.

പന്താനീതി ജനതം അതിക്കമിത്വാ മനുസ്സാനം അനുപചാരേ ഠിതാനി. സംയോജനവിപ്പമോക്ഖാതി താനി ച സേനാസനാനി സേവമാനോ ന ചീവരാദീനം അത്ഥായ സേവേയ്യ, അഥ ഖോ ദസസംയോജനവിപ്പമോക്ഖത്ഥായ ചരേയ്യ. സങ്ഘേ വസേതി തേസു സേനാസനേസു രതിം അലഭന്തോ ഉപട്ഠാകാദീനം ചിത്താനുരക്ഖണത്ഥം ഗദ്രഭപിട്ഠേ രജം വിയ ഉപ്പതന്തോ അരഞ്ഞേ അചരിത്വാ സങ്ഘമജ്ഝേ വസേയ്യ. രക്ഖിതത്തോ സതീമാതി തത്ഥ ച വസന്തോ സഗവചണ്ഡോ ഗോണോ വിയ സബ്രഹ്മചാരിനോ അവിജ്ഝന്തോ അഘട്ടേന്തോ രക്ഖിതത്തോ സതിപട്ഠാനപരായണോ ഹുത്വാ വസേയ്യ.

ഇദാനി സങ്ഘേ വസമാനസ്സ ഭിക്ഖുനോ ഭിക്ഖാചാരവത്തം ആചിക്ഖന്തോ കുലാകുലന്തിആദിമാഹ. തത്ഥ പിണ്ഡികായ ചരന്തോതി പിണ്ഡത്ഥായ ചരമാനോ. സേവേഥ പന്താനി സേനാസനാനീതി സങ്ഘമജ്ഝം ഓതരിത്വാ വസമാനോപി ധുരപരിവേണേ താലനാളികേരആദീനി രോപേത്വാ ഉപട്ഠാകാദിസംസട്ഠോ ന വസേയ്യ, ചിത്തകല്ലതം പന ജനേത്വാ ചിത്തം ഹാസേത്വാ തോസേത്വാ പുന പന്തസേനാസനേ വസേയ്യാതി അരഞ്ഞസ്സേവ വണ്ണം കഥേതി. ഭയാതി വട്ടഭയതോ. അഭയേതി നിബ്ബാനേ. വിമുത്തോതി അധിമുത്തോ ഹുത്വാ വസേയ്യ.

യത്ഥ ഭേരവാതി യസ്മിം ഠാനേ ഭയജനകാ സവിഞ്ഞാണകാ സീഹബ്യഗ്ഘാദയോ, അവിഞ്ഞാണകാ രത്തിഭാഗേ ഖാണുവല്ലിആദയോ ബഹൂ അത്ഥി. സരീസപാതി ദീഘജാതികാദിസരീസപാ. നിസീദി തത്ഥ ഭിക്ഖൂതി താദിസേ ഠാനേ ഭിക്ഖു നിസിന്നോ. ഇമിനാ ഇദം ദീപേതി – ഭഗവാ യഥാ തുമ്ഹേ ഏതരഹി തത്രട്ഠകഭേരവാരമ്മണാനി ചേവ സരീസപേ ച വിജ്ജുനിച്ഛാരണാദീനി ച അമനസികത്വാ നിസിന്നാ, ഏവമേവം പധാനമനുയുത്താ ഭിക്ഖൂ നിസീദന്തീതി.

ജാതു മേ ദിട്ഠന്തി ഏകംസേന മയാ ദിട്ഠം. ന യിദം ഇതിഹീതിഹന്തി ഇദം ഇതിഹ ഇതിഹാതി ന തക്കഹേതു വാ നയഹേതു വാ പിടകസമ്പദാനേന വാ അഹം വദാമി. ഏകസ്മിം ബ്രഹ്മചരിയസ്മിന്തി ഏകായ ധമ്മദേസനായ. ധമ്മദേസനാ ഹി ഇധ ബ്രഹ്മചരിയന്തി അധിപ്പേതാ. മച്ചുഹായിനന്തി മരണപരിച്ചാഗിനം ഖീണാസവാനം.

ദസാ ച ദസധാ ദസാതി ഏത്ഥ ദസാതി ദസേവ, ദസധാ ദസാതി സതം, അഞ്ഞേ ച ദസുത്തരം സേഖസതം പസ്സാമീതി വദതി. സോതസമാപന്നാതി മഗ്ഗസോതം സമാപന്നാ. അതിരച്ഛാനഗാമിനോതി ദേസനാമത്തമേതം, അവിനിപാതധമ്മാതി അത്ഥോ. സങ്ഖാതും നോപി സക്കോമീതി മുസാവാദഭയേന ഏത്തകാ നാമ പുഞ്ഞഭാഗിനോ സത്താതി ഗണേതും ന സക്കോമീതി ബഹും ബ്രഹ്മധമ്മദേസനം സന്ധായ ഏവമാഹ. തതിയം.