൩. വിത്തസുത്തവണ്ണനാ

൭൩. തതിയേ സദ്ധീധ വിത്തന്തി യസ്മാ സദ്ധോ സദ്ധായ മുത്തമണിആദീനിപി വിത്താനി ലഭതി, തിസ്സോപി കുലസമ്പദാ, ഛ കാമസഗ്ഗാനി, നവ ബ്രഹ്മലോകേ പത്വാ പരിയോസാനേ അമതമഹാനിബ്ബാനദസ്സനമ്പി ലഭതി, തസ്മാ മണിമുത്താദീഹി വിത്തേഹി സദ്ധാവിത്തമേവ സേട്ഠം. ധമ്മോതി ദസകുസലകമ്മപഥോ. സുഖമാവഹതീതി സബ്ബമ്പി സാസവാനാസവം അസംകിലിട്ഠസുഖം ആവഹതി. സാദുതരന്തി ലോകസ്മിം ലോണമ്ബിലാദീനം സബ്ബരസാനം സച്ചമേവ മധുരതരം. സച്ചസ്മിം ഹി ഠിതാ സീഘവേഗം നദിമ്പി നിവത്തേന്തി, വിസമ്പി നിമ്മദ്ദേന്തി, അഗ്ഗിമ്പി പടിബാഹന്തി, ദേവമ്പി വസ്സാപേന്തി, തസ്മാ തം സബ്ബരസാനം മധുരതരന്തി വുത്തം. പഞ്ഞാജീവിം ജീവിതമാഹു സേട്ഠന്തി യോ പഞ്ഞാജീവീ ഗഹട്ഠോ സമാനോ പഞ്ചസു സീലേസു പതിട്ഠായ സലാകഭത്താദീനി പട്ഠപേത്വാ പഞ്ഞായ ജീവതി, പബ്ബജിതോ വാ പന ധമ്മേന ഉപ്പന്നേ പച്ചയേ ‘‘ഇദമത്ഥ’’ന്തി പച്ചവേക്ഖിത്വാ പരിഭുഞ്ജന്തോ കമ്മട്ഠാനം ആദായ വിപസ്സനം പട്ഠപേത്വാ അരിയഫലാധിഗമവസേന പഞ്ഞായ ജീവതി, തം പഞ്ഞാജീവിം പുഗ്ഗലം സേട്ഠം ജീവിതം ജീവതീതി ആഹു. തതിയം.