൪. മനോനിവാരണസുത്തവണ്ണനാ

൨൪. ചതുത്ഥേ യതോ യതോതി പാപതോ വാ കല്യാണതോ വാ. അയം കിര ദേവതാ ‘‘യംകിഞ്ചി കുസലാദിഭേദം ലോകിയം വാ ലോകുത്തരം വാ മനോ, തം നിവാരേതബ്ബമേവ, ന ഉപ്പാദേതബ്ബ’’ന്തി ഏവംലദ്ധികാ. സ സബ്ബതോതി സോ സബ്ബതോ. അഥ ഭഗവാ – ‘‘അയം ദേവതാ അനിയ്യാനികകഥം കഥേതി, മനോ നാമ നിവാരേതബ്ബമ്പി അത്ഥി ഭാവേതബ്ബമ്പി, വിഭജിത്വാ നമസ്സാ ദസ്സേസ്സാമീ’’തി ചിന്തേത്വാ ദുതിയഗാഥം ആഹ. തത്ഥ ന മനോ സംയതത്തമാഗതന്തി, യം വുത്തം ‘‘ന സബ്ബതോ മനോ നിവാരയേ’’തി, കതരം തം മനോ, യം തം സബ്ബതോ ന നിവാരേതബ്ബന്തി ചേ. മനോ സംയതത്തം ആഗതം, യം മനോ യത്ഥ സംയതഭാവം ആഗതം, ‘‘ദാനം ദസ്സാമി, സീലം രക്ഖിസ്സാമീ’’തിആദിനാ നയേന ഉപ്പന്നം, ഏതം മനോ ന നിവാരേതബ്ബം, അഞ്ഞദത്ഥു ബ്രൂഹേതബ്ബം വഡ്ഢേതബ്ബം. യതോ യതോ ച പാപകന്തി യതോ യതോ അകുസലം ഉപ്പജ്ജതി, തതോ തതോ ച തം നിവാരേതബ്ബന്തി. ചതുത്ഥം.