൩. മിച്ഛാദിട്ഠിനിദ്ദേസവണ്ണനാ

൧൩൬. മിച്ഛാദിട്ഠി ഹേട്ഠാ വുത്തത്ഥായേവ. അയം പന അപരോ നയോ – നത്ഥി ദിന്നന്തി ഉച്ഛേദദിട്ഠികത്താ ദാനഫലം പടിക്ഖിപതി. നത്ഥി യിട്ഠന്തി ഏത്ഥ യിട്ഠന്തി ഖുദ്ദകയഞ്ഞോ. ഹുതന്തി മഹായഞ്ഞോ. ദ്വിന്നമ്പി ഫലം പടിക്ഖിപതി. നത്ഥി സുകതദുക്കടാനം കമ്മാനം ഫലം വിപാകോതി ദാനഫലസ്സ പടിക്ഖിത്തത്താ സീലാദീനം പുഞ്ഞകമ്മാനം, പാണാതിപാതാദീനം പാപകമ്മാനം ഫലം പടിക്ഖിപതി. നത്ഥി അയം ലോകോതി പുരേ കതേന കമ്മുനാ. നത്ഥി പരോ ലോകോതി ഇധ കതേന കമ്മുനാ. നത്ഥി മാതാ, നത്ഥി പിതാതി തേസു കതകമ്മാനം ഫലം പടിക്ഖിപതി. നത്ഥി സത്താ ഓപപാതികാതി കമ്മഹേതുകം ഉപപത്തിം പടിക്ഖിപതി. നത്ഥി ലോകേ സമണബ്രാഹ്മണാ…പേ… പവേദേന്തീതി ഇധലോകപരലോകേ പസ്സിതും അഭിഞ്ഞാപടിലാഭായ പടിപദം പടിക്ഖിപതി. ഇധ പാളിയം പന നത്ഥി ദിന്നന്തി വത്ഥൂതി നത്ഥി ദിന്നന്തി വുച്ചമാനം ദാനം, തസ്സാ ദിട്ഠിയാ വത്ഥൂതി അത്ഥോ. ഏവംവാദോ മിച്ഛാതി ഏവം നത്ഥി ദിന്നന്തി വാദോ വചനം മിച്ഛാ വിപരീതോതി അത്ഥോ.

മിച്ഛാദിട്ഠിനിദ്ദേസവണ്ണനാ നിട്ഠിതാ.