൩൬. സമസീസട്ഠഞാണനിദ്ദേസവണ്ണനാ

൮൭. സമസീസട്ഠഞാണനിദ്ദേസേ പഞ്ചക്ഖന്ധാതിആദീഹി ദസഹി രാസീഹി സബ്ബധമ്മസങ്ഗഹോ വേദിതബ്ബോ. ന ഹി ഏകേകസ്സ വസേന ആയതനധാതുരാസിവജ്ജേഹി സേസേഹി അട്ഠഹി രാസീഹി വിസും വിസും സബ്ബധമ്മോ സങ്ഗയ്ഹതീതി. യസ്മാ പന ലോകുത്തരധമ്മാ ഹേതുസമുച്ഛേദേന സമുച്ഛിന്ദിതബ്ബാ ന ഹോന്തി, തസ്മാ സബ്ബധമ്മസദ്ദേന സങ്ഗഹിതാപി ലോകുത്തരധമ്മാ സമുച്ഛേദവസേന സമ്ഭവതോ ഇധ ന ഗഹേതബ്ബാ, ഹേതുസമുച്ഛേദേന സമുച്ഛിന്ദിതബ്ബാ ഏവ തേഭൂമകധമ്മാ ഗഹേതബ്ബാ. സമ്മാ സമുച്ഛിന്ദതീതി യഥായോഗം വിക്ഖമ്ഭനതദങ്ഗസമുച്ഛേദപഹാനവസേന പരിയുട്ഠാനം അനുസയഞ്ച നിരോധേന്തോ സമ്മാ സമുച്ഛിന്ദതി. ഏവം പുഗ്ഗലാധിട്ഠാനായ ദേസനായ സമ്മാ സമുച്ഛേദോ നിദ്ദിട്ഠോ. നിരോധേതീതി അനുപ്പാദനിരോധേന നിരോധേതി. ഇമിനാ സമുച്ഛേദത്ഥോ വുത്തോ. ന ഉപട്ഠാതീതി ഏവം നിരോധേ കതേ സോ സോ ധമ്മോ പുന ന ഉപതിട്ഠതി, ന ഉപ്പജ്ജതീതി അത്ഥോ. ഇമിനാ നിരോധത്ഥോ വുത്തോ. ഏവം അനുപട്ഠഹനധമ്മവസേന അനുപട്ഠാനഭാവോ നിദ്ദിട്ഠോ. സമന്തി കാമച്ഛന്ദാദീനം സമിതത്താ സമം. താനി പന നേക്ഖമ്മാദീനി സത്ത, രൂപാരൂപജ്ഝാനാനി അട്ഠ, മഹാവിപസ്സനാ അട്ഠാരസ, അരിയമഗ്ഗാ ചത്താരോതി സത്തതിംസ ഹോന്തി.

തേരസ സീസാനി സീസഭൂതാനം സബ്ബേസം സങ്ഗഹവസേന വുത്താനി. ഇധ പന സദ്ധാദീനി അട്ഠേവ സീസാനി യുജ്ജന്തി. ന ഹി അരഹതോ തണ്ഹാദീനി പഞ്ച സീസാനി സന്തി. പലിബോധസീസന്തി പലിബുന്ധനം പലിബോധോ, നിബ്ബാനമഗ്ഗാവരണന്തി അത്ഥോ. സീസന്തി പധാനം, അധികന്തി അത്ഥോ. പലിബോധോയേവ സീസം, തംസമ്പയുത്താദിസബ്ബപലിബോധേസു വാ സീസന്തി പലിബോധസീസം. ഏസ നയോ സേസേസു. വിസേസതോ പന വിനിബന്ധനന്തി ഉന്നതിവസേന സംസാരേ ബന്ധനം. പരാമാസോതി അഭിനിവേസോ. വിക്ഖേപോതി വിപ്പകിണ്ണതാ. കിലേസോതി കിലിസ്സനം. അധിമോക്ഖോതി അധിമുച്ചനം. പഗ്ഗഹോതി ഉസ്സാഹനം. ഉപട്ഠാനന്തി അപിലാപനം. അവിക്ഖേപോതി അവിപ്പകിണ്ണതാ. ദസ്സനന്തി യഥാസഭാവപടിവേധോ. പവത്തന്തി ഉപാദിന്നക്ഖന്ധപവത്തം. ഗോചരോതി ആരമ്മണം. ഇമേസു ദ്വാദസസുപി വാരേസു പധാനട്ഠോ സീസട്ഠോ. വിമോക്ഖോതി വിക്ഖമ്ഭനതദങ്ഗസമുച്ഛേദപടിപ്പസ്സദ്ധിനിസ്സരണവിമുത്തീസു പഞ്ചസു നിസ്സരണവിമുത്തി നിബ്ബാനം. സങ്ഖാരസീസന്തി സബ്ബസങ്ഖതസങ്ഖാരാനം സീസം, കോടി അവസാനന്തി അത്ഥോ. ഏതേന അനുപാദിസേസപരിനിബ്ബാനം വുത്തം. സങ്ഖാരാഭാവമത്തവസേന വാ ഖന്ധപരിനിബ്ബാനമേവ വുത്തം ഹോതി. നേക്ഖമ്മാദികം സമഞ്ച സദ്ധാദികം സീസഞ്ച, സമസീസം വാ അസ്സ അത്ഥീതി സമസീസീതി. അഥ വാ തേരസന്നം സീസാനം തണ്ഹാദീനി പഞ്ച സീസാനി സമുദയസച്ചം, സദ്ധാദീനി പഞ്ച മഗ്ഗസച്ചം, പവത്തസീസം ജീവിതിന്ദ്രിയം ദുക്ഖസച്ചം, ഗോചരസീസഞ്ച സങ്ഖാരസീസഞ്ച നിരോധസച്ചന്തി ഇമേസം ചതുന്നം അരിയസച്ചാനം ഏകസ്മിം രോഗേ വാ ഏകസ്മിം ഇരിയാപഥേ വാ ഏകസ്മിം സഭാഗജീവിതിന്ദ്രിയേ വാ അഭിസമയോ ച അനുപാദിസേസപരിനിബ്ബാനഞ്ച യസ്സ ഹോതി, സോ പുബ്ബേ വുത്തസമാനഞ്ച ഇമേസഞ്ച സീസാനം അത്ഥിതായ സമസീസീതി വുച്ചതി.

സമസീസട്ഠഞാണനിദ്ദേസവണ്ണനാ നിട്ഠിതാ.