൩൫. പരിനിബ്ബാനഞാണനിദ്ദേസവണ്ണനാ

൮൬. പരിനിബ്ബാനഞാണനിദ്ദേസേ ഇധാതി ഇമസ്മിം സാസനേ. സമ്പജാനോതി സാത്ഥകസമ്പജഞ്ഞം, സപ്പായസമ്പജഞ്ഞം, ഗോചരസമ്പജഞ്ഞം, അസമ്മോഹസമ്പജഞ്ഞന്തി ഇമേഹി ചതൂഹി സമ്പജഞ്ഞേഹി സമ്പജാനോ. പവത്തന്തി സബ്ബത്ഥ യഥാനുരൂപം പരിയുട്ഠാനപവത്തഞ്ച അനുസയപ്പവത്തഞ്ച. പരിയാദിയതീതി ഉപചാരപ്പനാവസേന വുത്തേസു വിക്ഖമ്ഭനവസേന, വിപസ്സനാവസേന വുത്തേസു തദങ്ഗവസേന, മഗ്ഗവസേന വുത്തേസു സമുച്ഛേദവസേന ഖേപേതി അപ്പവത്തം കരോതി. പേയ്യാലമുഖേന ഹി ദുതിയാദിഝാനസമാപത്തിമഹാവിപസ്സനാമഗ്ഗാ സംഖിത്താ. യസ്മാ ഏതം പച്ചവേക്ഖന്തസ്സ പവത്തം ഞാണം പരിനിബ്ബാനേ ഞാണം നാമ ഹോതി, തസ്മാ വിക്ഖമ്ഭനപരിനിബ്ബാനം തദങ്ഗപരിനിബ്ബാനം സമുച്ഛേദപരിനിബ്ബാനന്തിപി വുത്തമേവ ഹോതി. ഏതേഹി കിലേസപരിനിബ്ബാനപച്ചവേക്ഖണഞാണം വുത്തം. അഥ വാ പനാതിആദീഹി ഖന്ധപരിനിബ്ബാനപച്ചവേക്ഖണഞാണം നിദ്ദിസതി. അനുപാദിസേസായ നിബ്ബാനധാതുയാതി ദുവിധാ ഹി നിബ്ബാനധാതു സഉപാദിസേസാ ച അനുപാദിസേസാ ച. തത്ഥ ഉപാദീയതേ ‘‘അഹം മമാ’’തി ഭുസം ഗണ്ഹീയതീതി ഉപാദി, ഖന്ധപഞ്ചകസ്സേതം അധിവചനം. ഉപാദിയേവ സേസോ അവസിട്ഠോതി ഉപാദിസേസോ, സഹ ഉപാദിസേസേന വത്തതീതി സഉപാദിസേസാ. നത്ഥേത്ഥ ഉപാദിസേസോതി അനുപാദിസേസാ. സഉപാദിസേസാ പഠമം വുത്താ. അയം പന അനുപാദിസേസാ. തായ അനുപാദിസേസായ നിബ്ബാനധാതുയാ. ചക്ഖുപവത്തന്തി ചക്ഖുപവത്തി ചക്ഖുസമുദാചാരോ. പരിയാദിയതീതി ഖേപീയതി മദ്ദീയതീതി. ഏസ നയോ സേസേസു.

പരിനിബ്ബാനഞാണനിദ്ദേസവണ്ണനാ നിട്ഠിതാ.