൨൯-൩൧. ഞാണത്തയനിദ്ദേസവണ്ണനാ

൭൮. ഞാണത്തയനിദ്ദേസേ നിമിത്തന്തി സങ്ഖാരനിമിത്തം. അനിമിത്തേതി സങ്ഖാരനിമിത്തപടിപക്ഖേ നിബ്ബാനേ. അധിമുത്തത്താതി തന്നിന്നഭാവേന ചിത്തസ്സ വിസ്സട്ഠത്താ. ഫുസ്സ ഫുസ്സ വയം പസ്സതീതി സങ്ഖാരനിമിത്തം ഞാണേന ഫുസിത്വാ ഫുസിത്വാ തസ്സ ഭങ്ഗം വിപസ്സനാഞാണേനേവ പസ്സതി. ഏതേന ഭങ്ഗാനുപസ്സനാ സിദ്ധാ. സാ അനിച്ചാനുപസ്സനം സാധേതി, അനിച്ചസ്സ ദുക്ഖത്താ സാ ദുക്ഖാനുപസ്സനം, ദുക്ഖസ്സ അനത്തത്താ സാ അനത്താനുപസ്സനന്തി ഏവമേത്ഥ തിസ്സോ അനുപസ്സനാ വുത്താ ഹോന്തി. അനിമിത്തോ വിഹാരോതി നിമിത്തം ഭയതോ ദിട്ഠത്താ സോ വിപസ്സനത്തയവിഹാരോ അനിമിത്തവിഹാരോ നാമ ഹോതി. പണിധിന്തി തണ്ഹം. അപ്പണിഹിതേതി തണ്ഹാപടിപക്ഖേ നിബ്ബാനേ. അഭിനിവേസന്തി അത്താഭിനിവേസം. സുഞ്ഞതേതി അത്തവിരഹിതേ നിബ്ബാനേ. സുഞ്ഞതോതി സുഞ്ഞംയേവ സുഞ്ഞതോ. പവത്തം അജ്ഝുപേക്ഖിത്വാതി വിപാകപ്പവത്തം സങ്ഖാരുപേക്ഖായ അജ്ഝുപേക്ഖിത്വാ. സുഗതിസങ്ഖാതവിപാകപ്പവത്താഭിനന്ദിനോ ഹി സത്താ. അയം പന ഫലസമാപത്തിം സമാപജ്ജിതുകാമോ തം പവത്തം, സബ്ബഞ്ച സങ്ഖാരഗതം അനിച്ചാദിതോ പസ്സിത്വാ അജ്ഝുപേക്ഖതിയേവ. ഏവഞ്ഹി ദിട്ഠേ ഫലസമാപത്തിം സമാപജ്ജിതും സക്കോതി, ന അഞ്ഞഥാ. ആവജ്ജിത്വാതി ആവജ്ജനേന ആവജ്ജിത്വാ. സമാപജ്ജതീതി ഫലസമാപത്തിം പടിപജ്ജതി. അനിമിത്താ സമാപത്തീതി നിമിത്തം ഭയതോ ദിസ്വാ സമാപന്നത്താ അനിമിത്താ സമാപത്തി നാമ. അനിമിത്തവിഹാരസമാപത്തീതി വിപസ്സനാവിഹാരവസേന ച ഫലസമാപത്തിവസേന ച തദുഭയം നാമ ഹോതി.

൭൯. ഇദാനി സങ്ഖാരനിമിത്തമേവ വിഭജിത്വാ ദസ്സേന്തോ രൂപനിമിത്തന്തിആദിമാഹ. ജരാമരണഗ്ഗഹണേ വത്തബ്ബം പുബ്ബേ വുത്തമേവ. ‘‘അഞ്ഞോ അനിമിത്തവിഹാരോ’’തിആദീഹി വുത്തേയേവ നിഗമേത്വാ ദസ്സേതി. സങ്ഖേപേന വിഹാരട്ഠേ ഞാണം നാമ ഫലസമാപത്തിയാ പുബ്ബഭാഗേ സങ്ഖാരുപേക്ഖാഞാണേ ഠിതസ്സ വിപസ്സനാവിഹാരനാനത്തേ ഞാണം സമാപത്തട്ഠേ ഞാണം നാമ ഫലസമാപത്തിനാനത്തേ ഞാണം. വിഹാരസമാപത്തട്ഠേ ഞാണം നാമ തദുഭയനാനത്തേ ഞാണം. വിപസ്സനാവിഹാരേനേവ വീതിനാമേതുകാമോ വിപസ്സനാവിഹാരമേവ പവത്തേതി, ഫലസമാപത്തിവിഹാരേനേവ വീതിനാമേതുകാമോ വിപസ്സനാപടിപാടിയാ ഉസ്സക്കിത്വാ ഫലസമാപത്തിവിഹാരമേവ പവത്തേതി, തദുഭയേന വീതിനാമേതുകാമോ തദുഭയം പവത്തേതി. ഏവം പുഗ്ഗലാധിപ്പായവസേന തിവിധം ജാതം. സേസമേത്ഥ വത്തബ്ബം സങ്ഖാരുപേക്ഖാഞാണവണ്ണനായം വുത്തമേവ.

ഞാണത്തയനിദ്ദേസവണ്ണനാ നിട്ഠിതാ.