൨൦-൨൪. ഞാണപഞ്ചകനിദ്ദേസവണ്ണനാ

൭൫. ഞാണപഞ്ചകനിദ്ദേസേ തേസം പഞ്ചന്നം ഞാണാനം അനുപുബ്ബസമ്ബന്ധസബ്ഭാവതോ ഏകതോവ പുച്ഛാവിസ്സജ്ജനാനി കതാനി. അഭിഞ്ഞാതാ ഹോന്തീതി ധമ്മസഭാവലക്ഖണജാനനവസേന സുട്ഠു ഞാതാ ഹോന്തി. ഞാതാ ഹോന്തീതി ഞാതപരിഞ്ഞാവസേന സഭാവതോ ഞാതത്താ ഞാതാ നാമ ഹോന്തി. യേന ഞാണേന തേ ധമ്മാ ഞാതാ ഹോന്തി, തം ഞാതട്ഠേന ഞാണം, പജാനനട്ഠേന പഞ്ഞാതി സമ്ബന്ധോ. ഇമിനാവ നയേന സേസഞാണാനിപി യോജേതബ്ബാനി. പരിഞ്ഞാതാ ഹോന്തീതി സാമഞ്ഞലക്ഖണവസേന സമന്തതോ ഞാതാ ഹോന്തി. തീരിതാ ഹോന്തീതി തീരണപരിഞ്ഞാവസേന അനിച്ചാദിതോ ഉപപരിക്ഖിതാ സമാപിതാ നാമ ഹോന്തി. പഹീനാ ഹോന്തീതി അനിച്ചാനുപസ്സനാദിനാ ഞാണേന നിച്ചസഞ്ഞാദയോ ഭങ്ഗാനുപസ്സനതോ പട്ഠായ പഹീനാ ഹോന്തി. പരിച്ചത്താ ഹോന്തീതി പഹാനവസേനേവ ഛഡ്ഡിതാ നാമ ഹോന്തി. ഭാവിതാ ഹോന്തീതി വഡ്ഢിതാ പരിഭാവിതാ ച ഹോന്തി. ഏകരസാ ഹോന്തീതി സകിച്ചസാധനപടിപക്ഖപഹാനേന ഏകകിച്ചാ ഹോന്തി, പച്ചനീകതോ വാ വിമുത്തിവസേന വിമുത്തിരസേന ഏകരസാ ഹോന്തി. സച്ഛികതാ ഹോന്തീതി പടിലാഭവസേന ഫലധമ്മോ പടിവേധവസേന നിബ്ബാനധമ്മോതി പച്ചക്ഖകതാ ഹോന്തി. ഫസ്സിതാ ഹോന്തീതി പടിലാഭഫുസനേന പടിവേധഫുസനേന ച ഫസ്സിതാ അനുഭൂതാ ഹോന്തി. ഇമാനി പഞ്ച ഞാണാനി ഹേട്ഠാ സുതമയഞാണവസേന വുത്താനി, ഇധ സകിച്ചസാധനവസേന.

ഞാണപഞ്ചകനിദ്ദേസവണ്ണനാ നിട്ഠിതാ.