൧൨. ഫലഞാണനിദ്ദേസവണ്ണനാ

൬൩. ഫലഞാണനിദ്ദേസേ തംപയോഗപ്പടിപ്പസ്സദ്ധത്താതി തസ്സ അജ്ഝത്തബഹിദ്ധാ വുട്ഠാനപയോഗസ്സ പടിപ്പസ്സദ്ധത്താ. മഗ്ഗോ ഹി സകക്ഖണേ കിലേസപ്പഹാനേന ഉഭതോ വുട്ഠാനപയോഗം കരോതി നാമ, ഫലക്ഖണേ കിലേസാനം പഹീനത്താ മഗ്ഗസ്സ ഉഭതോ വുട്ഠാനപയോഗോ പടിപ്പസ്സദ്ധോ വൂപസന്തോ നാമ ഹോതി. ഉപ്പജ്ജതീതി മഗ്ഗാനന്തരം സകിം വാ ദ്വിക്ഖത്തും വാ ഉപ്പജ്ജതി, ഫലസമാപത്തികാലേ പന ബഹുക്ഖത്തും, നിരോധാ വുട്ഠഹന്തസ്സ ദ്വിക്ഖത്തും ഉപ്പജ്ജതി, സബ്ബമ്പി ഹി തം പയോഗപ്പടിപ്പസ്സദ്ധത്താ ഉപ്പജ്ജതി. മഗ്ഗസ്സേതം ഫലന്തി ഫലം അപേക്ഖിത്വാ നപുംസകവചനം കതം. സകദാഗാമിമഗ്ഗക്ഖണാദീസുപി ഏകേകമഗ്ഗങ്ഗവസേനേവ വുട്ഠാനയോജനാ വേദിതബ്ബാ.

ഫലഞാണനിദ്ദേസവണ്ണനാ നിട്ഠിതാ.