൧൩. വിമുത്തിഞാണനിദ്ദേസവണ്ണനാ

൬൪. വിമുത്തിഞാണനിദ്ദേസേ സക്കായദിട്ഠീതി വിജ്ജമാനട്ഠേന സതി ഖന്ധപഞ്ചകസങ്ഖാതേ കായേ, സയം വാ സതീ തസ്മിം കായേ ദിട്ഠീതി സക്കായദിട്ഠി. വിചികിച്ഛാതി വിഗതാ ചികിച്ഛാ, സഭാവം വാ വിചിനന്തോ ഏതായ കിച്ഛതി കിലമതീതി വിചികിച്ഛാ. സീലബ്ബതപരാമാസോതി സീലേന സുദ്ധി വതേന സുദ്ധി സീലബ്ബതേന സുദ്ധീതി ഗഹിതഅഭിനിവേസോ. സോ ഹി സഭാവം അതിക്കമിത്വാ പരതോ ആമസതീതി സീലബ്ബതപരാമാസോ. ഉഭിന്നം സമാനേപി ദിട്ഠിഭാവേ തക്കഞ്ച പരൂപദേസഞ്ച വിനാ പകതിയാ ഏവ സക്കായദിട്ഠിഗഹണതോ പകതിഭൂതായ വീസതിവത്ഥുകായ സക്കായദിട്ഠിയാ പഹാനേനേവ സബ്ബദിട്ഠിപ്പഹാനദസ്സനത്ഥം സക്കായദിട്ഠി വുത്താ. സീലബ്ബതപരാമാസോ പന ‘‘സുദ്ധിപടിപദം പടിപജ്ജാമാ’’തി പടിപന്നാനം പടിപദായ മിച്ഛാഭാവദസ്സനത്ഥം വിസും വുത്തോതി വേദിതബ്ബോ. തിണ്ണമ്പി അനുസയപ്പഹാനേനേവ പഹാനം ദസ്സേതും ദിട്ഠാനുസയോ വിചികിച്ഛാനുസയോതി വുത്തം, ന വിസും കിലേസത്താ. ഉപക്കിലേസാതി കിലേസേന്തി ഉപതാപേന്തി വിബാധേന്തീതി കിലേസാ, ഥാമഗതട്ഠേന ഭുസാ കിലേസാതി ഉപക്കിലേസാ. സമ്മാ സമുച്ഛിന്നാ ഹോന്തീതി സമുച്ഛേദപ്പഹാനേന അനുപ്പാദനിരോധേന സമ്മാ സമുച്ഛിന്നാ ഹോന്തി. സപരിയുട്ഠാനേഹീതി ചിത്തം പരിയോനന്ധന്താനി ഉട്ഠേന്തി ഉപ്പജ്ജന്തീതി പരിയുട്ഠാനാനി, സമുദാചാരപ്പത്താനം കിലേസാനമേതം അധിവചനം. സഹ പരിയുട്ഠാനേഹീതി സപരിയുട്ഠാനാനി. തേഹി സപരിയുട്ഠാനേഹി അനുസയിതഉപക്കിലേസേഹി. ചിത്തം വിമുത്തം ഹോതീതി തേസം അഭബ്ബുപ്പത്തികഭൂതത്താ സന്തതിവസേന പവത്തമാനം ചിത്തം തതോ വിമുത്തം നാമ ഹോതി. തദേവ സുട്ഠു വിമുത്തത്താ സുവിമുത്തം. തംവിമുത്തിഞാതട്ഠേനാതി തസ്സാ വിമുത്തിയാ ജാനനട്ഠേന.

വിമുത്തിഞാണനിദ്ദേസവണ്ണനാ നിട്ഠിതാ.