൭. ആവട്ടഹാരസമ്പാതവണ്ണനാ

൬൯. നേക്ഖമ്മസങ്കപ്പബഹുലോ കസിണവസേന മേത്താദിവസേന വാ ലദ്ധായ ചിത്തേകഗ്ഗതാസങ്ഖാതായ ചിത്തമഞ്ജൂസായ ചിത്തം ഠപേത്വാ സമാധിംയേവ വാ യഥാലദ്ധം സംകിലേസതോ രക്ഖിതചിത്തോ നാമ ഹോതീതി വുത്തം – ‘‘തസ്മാ രക്ഖിതചിത്തസ്സ സമ്മാസങ്കപ്പഗോചരോതി അയം സമഥോ’’തി. പഞ്ഞാപധാനാ വിപസ്സനാതി ആഹ – ‘‘സമ്മാദിട്ഠിപുരേക്ഖാരോതി അയം വിപസ്സനാ’’തി. അരിയമഗ്ഗേന ദുക്ഖസച്ചേ പരിഞ്ഞാതേ ഉദയബ്ബയദസ്സനം മത്ഥകപ്പത്തം നാമ ഹോതീതി വുത്തം – ‘‘ഞത്വാന ഉദയബ്ബയന്തി ദുക്ഖപരിഞ്ഞാ’’തി. ‘‘യം കിഞ്ചി സമുദയധമ്മം, സബ്ബം തം നിരോധധമ്മ’’ന്തി ഹി മഗ്ഗഞാണസ്സ പവത്തിദസ്സനാതി. ഇമാനി ചത്താരി സച്ചാനീതി ചതുസച്ചധമ്മവസേന ആവട്ടനം നിട്ഠപേതി. തത്ഥ പുരിമേന സച്ചദ്വയട്ഠപനേന വിസഭാഗധമ്മവസേന, പച്ഛിമേന സഭാഗധമ്മവസേന ആവട്ടനന്തി ദട്ഠബ്ബം.

ആവട്ടഹാരസമ്പാതവണ്ണനാ നിട്ഠിതാ.