൮. വിഭത്തിഹാരസമ്പാതവണ്ണനാ

൭൦. കുസലപക്ഖോ കുസലപക്ഖേന നിദ്ദിസിതബ്ബോതി രക്ഖിതചിത്തസ്സാതി സതിസംവരോ, സോ ഛബ്ബിധോ ദ്വാരവസേന ചക്ഖുദ്വാരസംവരോ യാവ മനോദ്വാരസംവരോതി. സമ്മാസങ്കപ്പോ തിവിധോ – നേക്ഖമ്മസങ്കപ്പോ, അബ്യാപാദസങ്കപ്പോ, അവിഹിംസാസങ്കപ്പോതി. സമ്മാദിട്ഠി അട്ഠവിധാ ദുക്ഖേ ഞാണം…പേ… ഇദപ്പച്ചയതാപടിച്ചസമുപ്പന്നേസു ധമ്മേസു ഞാണന്തി. ഉദയബ്ബയഞാണം പഞ്ഞാസവിധം അവിജ്ജാസമുദയാ രൂപസമുദയോ…പേ… വിപരിണാമലക്ഖണം പസ്സന്തോപി വിഞ്ഞാണക്ഖന്ധസ്സ വയം പസ്സതി. ഥിനമിദ്ധാഭിഭവനം ചതുബ്ബിധം ചതുമഗ്ഗവസേന. തത്ഥ സതിസംവരോ ലോകിയലോകുത്തരവസേന ദുവിധോ. തേസു ലോകിയോ കാമാവചരോവ, ലോകുത്തരോ ദസ്സനഭാവനാഭേദതോ ദുവിധോ. ഏകമേകോ ചേത്ഥ ചതുസതിപട്ഠാനഭേദതോ ചതുബ്ബിധോ. ഏസ നയോ സമ്മാസങ്കപ്പാദീസുപി.

അയം പന വിസേസോ – സമ്മാസങ്കപ്പോ പഠമജ്ഝാനവസേന രൂപാവചരോതിപി നീഹരിതബ്ബോ. പദട്ഠാനവിഭാഗോ പദട്ഠാനഹാരസമ്പാതേ വുത്തനയേന വത്തബ്ബോ. അകുസലപക്ഖേ അസംവരോ ചക്ഖുഅസംവരോ…പേ… കായഅസംവരോ, ചോപനകായഅസംവരോ, വാചാഅസംവരോ, മനോഅസംവരോതി അട്ഠവിധോ. മിച്ഛാസങ്കപ്പോ കാമവിതക്കാദിവസേന തിവിധോ. അഞ്ഞാണം ‘‘ദുക്ഖേ അഞ്ഞാണ’’ന്തിആദിനാ അട്ഠവിധാ വിഭത്തം. സമ്മാദിട്ഠിപടിപക്ഖതോ മിച്ഛാദിട്ഠി ദ്വാസട്ഠിവിധേന വേദിതബ്ബാ. ഥിനമിദ്ധം ഉപ്പത്തിഭൂമിതോ പഞ്ചവിധന്തി ഏവം അകുസലപക്ഖേ വിഭത്തി വേദിതബ്ബാ.

വിഭത്തിഹാരസമ്പാതവണ്ണനാ നിട്ഠിതാ.