൨൯. രേവതത്ഥേരവത്ഥു

യോധ പുഞ്ഞഞ്ചാതി ഇമം ധമ്മദേസനം സത്ഥാ പുബ്ബാരാമേ വിഹരന്തോ രേവതത്ഥേരം ആരബ്ഭ കഥേസി. വത്ഥു ‘‘ഗാമേ വാ യദി വാരഞ്ഞേ’’തി (ധ. പ. ൯൮) ഗാഥാവണ്ണനായ വിത്ഥാരിതമേവ. വുത്തഞ്ഹി തത്ഥ (ധ. പ. അട്ഠ. ൧.൯൮) –

പുന ഏകദിവസം ഭിക്ഖൂ കഥം സമുട്ഠാപേസും ‘‘അഹോ സാമണേരസ്സ ലാഭോ, അഹോ പുഞ്ഞം, യേന ഏകകേന പഞ്ചന്നം ഭിക്ഖുസതാനം പഞ്ചകൂടാഗാരസതാനി കതാനീ’’തി. സത്ഥാ ആഗന്ത്വാ ‘‘കായ നുത്ഥ, ഭിക്ഖവേ, ഏതരഹി കഥായ സന്നിസിന്നാ’’തി പുച്ഛിത്വാ ‘‘ഇമായ നാമാ’’തി വുത്തേ, ‘‘ഭിക്ഖവേ, മയ്ഹം പുത്തസ്സ നേവ പുഞ്ഞം അത്ഥി, ന പാപം, ഉഭയമസ്സ പഹീന’’ന്തി വത്വാ ഇമം ഗാഥമാഹ –

൪൧൨. ‘‘യോധ പുഞ്ഞഞ്ച പാപഞ്ച, ഉഭോ സങ്ഗമുപച്ചഗാ;

അസോകം വിരജം സുദ്ധം, തമഹം ബ്രൂമി ബ്രാഹ്മണ’’ന്തി.

തത്ഥ ഉഭോതി ദ്വേപി പുഞ്ഞാനി ച പാപാനി ച ഛഡ്ഡേത്വാതി അത്ഥോ. സങ്ഗന്തി രാഗാദിഭേദം സങ്ഗം. ഉപച്ചഗാതി അതിക്കന്തോ. വട്ടമൂലകസോകാഭാവേന അസോകം അബ്ഭന്തരേ രാഗരജാദീനം അഭാവേന വിരജം നിരുപക്കിലേസതായ സുദ്ധം തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

രേവതത്ഥേരവത്ഥു ഏകൂനതിംസതിമം.