൨൫. പിലിന്ദവച്ഛത്ഥേരവത്ഥു

അകക്കസന്തി ഇമം ധമ്മദേസനം സത്ഥാ വേളുവനേ വിഹരന്തോ പിലിന്ദവച്ഛത്ഥേരം ആരബ്ഭ കഥേസി.

സോ കിരായസ്മാ ‘‘ഏഹി, വസലി, യാഹി, വസലീ’’തിആദീനി വദന്തോ ഗിഹീപി പബ്ബജിതേപി വസലിവാദേനേവ സമുദാചരതി. അഥേകദിവസം സമ്ബഹുലാ ഭിക്ഖൂ സത്ഥു ആരോചേസും – ‘‘ആയസ്മാ, ഭന്തേ, പിലിന്ദവച്ഛോ ഭിക്ഖൂ വസലിവാദേന സമുദാചരതീ’’തി. സത്ഥാ തം പക്കോസാപേത്വാ ‘‘സച്ചം കിര ത്വം പിലിന്ദവച്ഛ ഭിക്ഖൂ വസലിവാദേന സമുദാചരസീ’’തി പുച്ഛിത്വാ ‘‘ഏവം, ഭന്തേ’’തി വുത്തേ തസ്സായസ്മതോ പുബ്ബേനിവാസം മനസികരിത്വാ ‘‘മാ ഖോ തുമ്ഹേ, ഭിക്ഖവേ, വച്ഛസ്സ ഭിക്ഖുനോ ഉജ്ഝായിത്ഥ, ന, ഭിക്ഖവേ, വച്ഛോ ദോസന്തരോ ഭിക്ഖൂ വസലിവാദേന സമുദാചരതി, വച്ഛസ്സ, ഭിക്ഖവേ, ഭിക്ഖുനോ പഞ്ച ജാതിസതാനി അബ്ബോകിണ്ണാനി സബ്ബാനി താനി ബ്രാഹ്മണകുലേ പച്ചാജാതാനി, സോ തസ്സ ദീഘരത്തം വസലിവാദോ സമുദാചിണ്ണോ, ഖീണാസവസ്സ നാമ കക്കസം ഫരുസം പരേസം മമ്മഘട്ടനവചനമേവ നത്ഥി. ആചിണ്ണവസേന ഹി മമ പുത്തോ ഏവം കഥേതീ’’തി വത്വാ ഇമം ഗാഥമാഹ –

൪൦൮. ‘‘അകക്കസം വിഞ്ഞാപനിം, ഗിരം സച്ചമുദീരയേ;

യായ നാഭിസജേ കഞ്ചി, തമഹം ബ്രൂമി ബ്രാഹ്മണ’’ന്തി.

തത്ഥ അകക്കസന്തി അഫരുസം. വിഞ്ഞാപനിന്തി അത്ഥവിഞ്ഞാപനിം. സച്ചന്തി ഭൂതത്ഥം. നാഭിസജേതി യായ ഗിരായ അഞ്ഞം കുജ്ഝാപനവസേന ന ലഗ്ഗാപേയ്യ, ഖീണാസവോ നാമ ഏവരൂപമേവ ഗിരം ഭാസേയ്യ, തസ്മാ തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

പിലിന്ദവച്ഛത്ഥേരവത്ഥു പഞ്ചവീസതിമം.