൨൪. മഹാപന്ഥകത്ഥേരവത്ഥു

യസ്സ രാഗോ ചാതി ഇമം ധമ്മദേസനം സത്ഥാ വേളുവനേ വിഹരന്തോ മഹാപന്ഥകം ആരബ്ഭ കഥേസി.

സോ ഹായസ്മാ ചൂളപന്ഥകം ചതൂഹി മാസേഹി ഏകം ഗാഥം പഗുണം കാതും അസക്കോന്തം ‘‘ത്വം സാസനേ അഭബ്ബോ, ഗിഹിഭോഗാപി പരിഹീനോ, കിം തേ ഇധ വാസേന, ഇതോ നിക്ഖമാ’’തി വിഹാരാ നിക്കഡ്ഢിത്വാ ദ്വാരം ഥകേസി. ഭിക്ഖൂ കഥം സമുട്ഠാപേസും, ‘‘ആവുസോ, മഹാപന്ഥകത്ഥേരേന ഇദം നാമ കതം, ഖീണാസവാനമ്പി മഞ്ഞേ കോധോ ഉപ്പജ്ജതീ’’തി. സത്ഥാ ആഗന്ത്വാ ‘‘കായ നുത്ഥ, ഭിക്ഖവേ, ഏതരഹി കഥായ സന്നിസിന്നാ’’തി പുച്ഛിത്വാ ‘‘ഇമായ നാമാ’’തി വുത്തേ ‘‘ന, ഭിക്ഖവേ, ഖീണാസവാനം രാഗാദയോ കിലേസാ അത്ഥി, മമ പുത്തേന അത്ഥപുരേക്ഖാരതായ ചേവ ധമ്മപുരേക്ഖാരതായ ച കത’’ന്തി വത്വാ ഇമം ഗാഥമാഹ –

൪൦൭. ‘‘യസ്സ രാഗോ ച ദോസോ ച, മാനോ മക്ഖോ ച പാതിതോ;

സാസപോരിവ ആരഗ്ഗാ, തമഹം ബ്രൂമി ബ്രാഹ്മണ’’ന്തി.

തത്ഥ ആരഗ്ഗാതി യസ്സേതേ രാഗാദയോ കിലേസാ, അയഞ്ച പരഗുണമക്ഖനലക്ഖണോ മക്ഖോ ആരഗ്ഗാ സാസപോ വിയ പാതിതോ, യഥാ സാസപോ ആരഗ്ഗേ ന സന്തിട്ഠതി, ഏവം ചിത്തേ ന സന്തിട്ഠതി, തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

മഹാപന്ഥകത്ഥേരവത്ഥു ചതുവീസതിമം.