൨൨. അഞ്ഞതരഭിക്ഖുവത്ഥു

നിധായ ദണ്ഡന്തി ഇമം ധമ്മദേസനം സത്ഥാ ജേതവനേ വിഹരന്തോ അഞ്ഞതരം ഭിക്ഖും ആരബ്ഭ കഥേസി.

സോ കിര സത്ഥു സന്തികേ കമ്മട്ഠാനം ഗഹേത്വാ അരഞ്ഞേ വായമന്തോ അരഹത്തം പത്വാ ‘‘പടിലദ്ധഗുണം സത്ഥു ആരോചേസ്സാമീ’’തി തതോ നിക്ഖമി. അഥ നം ഏകസ്മിം ഗാമേ ഏകാ ഇത്ഥീ സാമികേന സദ്ധിം കലഹം കത്വാ തസ്മിം ബഹി നിക്ഖന്തേ ‘‘കുലഘരം ഗമിസ്സാമീ’’തി മഗ്ഗം പടിപന്നാ അന്തരാമഗ്ഗേ ദിസ്വാ ‘‘ഇമം ഥേരം നിസ്സായ ഗമിസ്സാമീ’’തി പിട്ഠിതോ പിട്ഠിതോ അനുബന്ധി. ഥേരോ പന തം ന പസ്സതി. അഥസ്സാ സാമികോ ഗേഹം ആഗതോ തം അദിസ്വാ ‘‘കുലഗാമം ഗതാ ഭവിസ്സതീ’’തി അനുബന്ധന്തോ തം ദിസ്വാ ‘‘ന സക്കാ ഇമായ ഏകികായ ഇമം അടവിം പടിപജ്ജിതും, കം നു ഖോ നിസ്സായ ഗച്ഛതീ’’തി ഓലോകേന്തോ ഥേരം ദിസ്വാ ‘‘അയം ഇമം ഗണ്ഹിത്വാ നിക്ഖന്തോ ഭവിസ്സതീ’’തി ചിന്തേത്വാ ഥേരം സന്തജ്ജേസി. അഥ നം സാ ഇത്ഥീ ‘‘നേവ മം ഏസ ഭദന്തോ പസ്സതി, ന ആലപതി, മാ നം കിഞ്ചി അവചാ’’തി ആഹ. സോ ‘‘കിം പന ത്വം അത്താനം ഗഹേത്വാ ഗച്ഛന്തം മമ ആചിക്ഖിസ്സസി, തുയ്ഹമേവ അനുച്ഛവികം ഇമസ്സ കരിസ്സാമീ’’തി ഉപ്പന്നകോധോ ഇത്ഥിയാ ആഘാതേന ഥേരം പോഥേത്വാ തം ആദായ നിവത്തി. ഥേരസ്സ സകലസരീരം സഞ്ജാതഗണ്ഡം അഹോസി. അഥസ്സ വിഹാരം ഗതകാലേ ഭിക്ഖൂ സരീരം സമ്ബാഹന്താ ഗണ്ഡേ ദിസ്വാ ‘‘കിം ഇദ’’ന്തി പുച്ഛിംസു. സോ തേസം തമത്ഥം ആരോചേസി. അഥ നം ഭിക്ഖൂ, ‘‘ആവുസോ, തസ്മിം പുരിസേ ഏവം പഹരന്തേ ത്വം കിം അവച, കിം വാ തേ കോധോ ഉപ്പന്നോ’’തി. ‘‘ന മേ, ആവുസോ, കോധോ ഉപ്പജ്ജീ’’തി വുത്തേ സത്ഥു സന്തികം ഗന്ത്വാ തമത്ഥം ആരോചേത്വാ, ‘‘ഭന്തേ, ഏസ ഭിക്ഖു ‘കോധോ തേ ഉപ്പജ്ജതീ’തി വുച്ചമാനോ ‘ന മേ, ആവുസോ, കോധോ ഉപ്പജ്ജതീ’തി അഭൂതം വത്വാ അഞ്ഞം ബ്യാകരോതീ’’തി ആരോചേസും. സത്ഥാ തേസം കഥം സുത്വാ, ‘‘ഭിക്ഖവേ, ഖീണാസവാ നാമ നിഹിതദണ്ഡാ, തേ പഹരന്തേസുപി കോധം ന കരോന്തിയേവാ’’തി വത്വാ ഇമം ഗാഥമാഹ –

൪൦൫. ‘‘നിധായ ദണ്ഡം ഭൂതേസു, തസേസു ഥാവരേസു ച;

യോ ന ഹന്തി ന ഘാതേതി, തമഹം ബ്രൂമി ബ്രാഹ്മണ’’ന്തി.

തത്ഥ നിധായാതി നിക്ഖിപിത്വാ ഓരോപേത്വാ. തസേസു ഥാവരേസു ചാതി തണ്ഹാതാസേന തസേസു, തണ്ഹാഅഭാവേന ഥിരതായ ഥാവരേസു ച. യോ ന ഹന്തീതി യോ ഏവം സബ്ബസത്തേസു വിഗതപടിഘതായ നിക്ഖിത്തദണ്ഡോ നേവ കഞ്ചി സയം ഹനതി, ന അഞ്ഞേ ഘാതേതി, തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

അഞ്ഞതരഭിക്ഖുവത്ഥു ബാവീസതിമം.