൨൦. ഖേമാഭിക്ഖുനീവത്ഥു

ഗമ്ഭീരപഞ്ഞന്തി ഇമം ധമ്മദേസനം സത്ഥാ ഗിജ്ഝകൂടേ വിഹരന്തോ ഖേമം നാമ ഭിക്ഖുനിം ആരബ്ഭ കഥേസി.

ഏകദിവസഞ്ഹി പഠമയാമസമനന്തരേ സക്കോ ദേവരാജാ പരിസായ സദ്ധിം ആഗന്ത്വാ സത്ഥു സന്തികേ സാരണീയധമ്മകഥം സുണന്തോ നിസീദി. തസ്മിം ഖണേ ഖേമാ ഭിക്ഖുനീ ‘‘സത്ഥാരം പസ്സിസ്സാമീ’’തി ആഗന്ത്വാ സക്കം ദിസ്വാ ആകാസേ ഠിതാവ സത്ഥാരം വന്ദിത്വാ നിവത്തി. സക്കോ തം ദിസ്വാ ‘‘കോ ഏസാ, ഭന്തേ, ആഗച്ഛമാനാ ആകാസേ ഠിതാവ സത്ഥാരം വന്ദിത്വാ നിവത്തീ’’തി പുച്ഛി. സത്ഥാ ‘‘ഏസാ, മഹാരാജ, മമ ധീതാ ഖേമാ നാമ മഹാപഞ്ഞാ മഗ്ഗാമഗ്ഗകോവിദാ’’തി വത്വാ ഇമം ഗാഥമാഹ –

൪൦൩. ‘‘ഗമ്ഭീരപഞ്ഞം മേധാവിം, മഗ്ഗാമഗ്ഗസ്സ കോവിദം;

ഉത്തമത്ഥമനുപ്പത്തം, തമഹം ബ്രൂമി ബ്രാഹ്മണ’’ന്തി.

തത്ഥ ഗബ്ഭീരപഞ്ഞന്തി ഗമ്ഭീരേസു ഖന്ധാദീസു പവത്തായ പഞ്ഞായ സമന്നാഗതം ധമ്മോജപഞ്ഞായ സമന്നാഗതം മേധാവിം ‘‘അയം ദുഗ്ഗതിയാ മഗ്ഗോ, അയം സുഗതിയാ മഗ്ഗോ, അയം നിബ്ബാനസ്സ മഗ്ഗോ, അയം അമഗ്ഗോ’’തി ഏവം മഗ്ഗേ ച അമഗ്ഗേ ച ഛേകതായ മഗ്ഗാമഗ്ഗസ്സ കോവിദം അരഹത്തസങ്ഖാതം ഉത്തമത്ഥം അനുപ്പത്തം തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

ഖേമാഭിക്ഖുനിവത്ഥു വീസതിമം.