൧൭. സാരിപുത്തത്ഥേരവത്ഥു

അക്കോധനന്തി ഇമം ധമ്മദേസനം സത്ഥാ വേളുവനേ വിഹരന്തോ സാരിപുത്തത്ഥേരം ആരബ്ഭ കഥേസി.

തദാ കിര ഥേരോ പഞ്ചഹി ഭിക്ഖുസതേഹി സദ്ധിം പിണ്ഡായ ചരന്തോ നാലകഗാമേ മാതു ഘരദ്വാരം അഗമാസി. അഥ നം സാ നിസീദാപേത്വാ പരിവിസമാനാ അക്കോസി – ‘‘അമ്ഭോ, ഉച്ഛിട്ഠഖാദക ഉച്ഛിട്ഠകഞ്ജിയം അലഭിത്വാ പരഘരേസു ഉളുങ്കപിട്ഠേന ഘട്ടിതകഞ്ജിയം പരിഭുഞ്ജിതും അസീതികോടിധനം പഹായ പബ്ബജിതോസി, നാസിതമ്ഹാ തയാ, ഭുഞ്ജാഹി ദാനീ’’തി. ഭിക്ഖൂനമ്പി ഭത്തം ദദമാനാ ‘‘തുമ്ഹേഹി മമ പുത്തോ അത്തനോ ചൂളുപട്ഠാകോ കതോ, ഇദാനി ഭുഞ്ജഥാ’’തി വദേതി. ഥേരോ ഭിക്ഖം ഗഹേത്വാ വിഹാരമേവ അഗമാസി. അഥായസ്മാ രാഹുലോ സത്ഥാരം പിണ്ഡപാതേന ആപുച്ഛി. അഥ നം സത്ഥാ ആഹ – ‘‘രാഹുല, കഹം ഗമിത്ഥാ’’തി? ‘‘അയ്യികായ ഗാമം, ഭന്തേ’’തി. ‘‘കിം പന തേ അയ്യികായ ഉപജ്ഝായോ വുത്തോ’’തി? ‘‘അയ്യികായ മേ, ഭന്തേ, ഉപജ്ഝായോ അക്കുട്ഠോ’’തി. ‘‘കിന്തി വത്വാ’’തി? ‘‘ഇദം നാമ, ഭന്തേ’’തി. ‘‘ഉപജ്ഝായേന പന തേ കിം വുത്ത’’ന്തി? ‘‘ന കിഞ്ചി, ഭന്തേ’’തി. തം സുത്വാ ഭിക്ഖൂ ധമ്മസഭായം കഥം സമുട്ഠാപേസും, ‘‘ആവുസോ, അച്ഛരിയാ വത സാരിപുത്തത്ഥേരസ്സ ഗുണാ, ഏവംനാമസ്സ മാതരി അക്കോസന്തിയാ കോധമത്തമ്പി നാഹോസീ’’തി. സത്ഥാ ആഗന്ത്വാ ‘‘കായ നുത്ഥ, ഭിക്ഖവേ, ഏതരഹി കഥായ സന്നിസിന്നാ’’തി പുച്ഛിത്വാ ‘‘ഇമായ നാമാ’’തി വുത്തേ, ‘‘ഭിക്ഖവേ, ഖീണാസവാ നാമ അക്കോധനാവ ഹോന്തീ’’തി വത്വാ ഇമം ഗാഥമാഹ –

൪൦൦. ‘‘അക്കോധനം വതവന്തം, സീലവന്തം അനുസ്സദം;

ദന്തം അന്തിമസാരീരം, തമഹം ബ്രൂമി ബ്രാഹ്മണ’’ന്തി.

തത്ഥ വതവന്തന്തി ധുതവതേന, സമന്നാഗതം ചതുപാരിസുദ്ധിസീലേന സീലവന്തം, തണ്ഹാഉസ്സദാഭാവേന അനുസ്സദം , ഛളിന്ദ്രിയദമനേന ദന്തം, കോടിയം ഠിതേന അത്തഭാവേന അന്തിമസരീരം തമഹം ബ്രാഹ്മണം വദാമീതി അത്ഥോ.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി.

സാരിപുത്തത്ഥേരവത്ഥു സത്തരസമം.