൯. ഉപകാജീവകവത്ഥു

സബ്ബാഭിഭൂതി ഇമം ധമ്മദേസനം സത്ഥാ അന്തരാമഗ്ഗേ ഉപകം ആജീവകം ആരബ്ഭ കഥേസി.

ഏകസ്മിഞ്ഹി സമയേ സത്ഥാ പത്തസബ്ബഞ്ഞുതഞ്ഞാണോ ബോധിമണ്ഡേ സത്തസത്താഹം വീതിനാമേത്വാ അത്തനോ പത്തചീവരമാദായ ധമ്മചക്കപവത്തനത്ഥം ബാരാണസിം സന്ധായ അട്ഠാരസയോജനമഗ്ഗം പടിപന്നോ അന്തരാമഗ്ഗേ ഉപകം ആജീവകം അദ്ദസ. സോപി സത്ഥാരം ദിസ്വാ ‘‘വിപ്പസന്നാനി ഖോ തേ, ആവുസോ, ഇന്ദ്രിയാനി, പരിസുദ്ധോ ഛവിവണ്ണോ പരിയോദാതോ, കംസി ത്വം, ആവുസോ, ഉദ്ദിസ്സ പബ്ബജിതോ, കോ വാ തേ സത്ഥാ, കസ്സ വാ ത്വം ധമ്മം രോചേസീ’’തി പുച്ഛി. അഥസ്സ സത്ഥാ ‘‘മയ്ഹം ഉപജ്ഝായോ വാ ആചരിയോ വാ നത്ഥീ’’തി വത്വാ ഇമം ഗാഥമാഹ –

൩൫൩. ‘‘സബ്ബാഭിഭൂ സബ്ബവിദൂഹമസ്മി,

സബ്ബേസു ധമ്മേസു അനൂപലിത്തോ;

സബ്ബഞ്ജഹോ തണ്ഹക്ഖയേ വിമുത്തോ,

സയം അഭിഞ്ഞായ കമുദ്ദിസേയ്യ’’ന്തി.

തത്ഥ സബ്ബാഭിഭൂതി സബ്ബേസം തേഭൂമകധമ്മാനം അഭിഭവനതോ സബ്ബാഭിഭൂ. സബ്ബവിദൂതി വിദിതസബ്ബചതുഭൂമകധമ്മോ. സബ്ബേസു ധമ്മേസൂതി സബ്ബേസുപി തേഭൂമകധമ്മേസു തണ്ഹാദിട്ഠീഹി അനൂപലിത്തോ. സബ്ബഞ്ജഹോതി സബ്ബേ തേഭൂമകധമ്മേ ജഹിത്വാ ഠിതോ. തണ്ഹക്ഖയേ വിമുത്തോതി തണ്ഹക്ഖയന്തേ ഉപ്പാദിതേ തണ്ഹക്ഖയസങ്ഖാതേ അരഹത്തേ അസേഖായ വിമുത്തിയാ വിമുത്തോ. സയം അഭിഞ്ഞായാതി അഭിഞ്ഞേയ്യാദിഭേദേ ധമ്മേ സയമേവ ജാനിത്വാ. കമുദ്ദിസേയ്യന്തി ‘‘അയം മേ ഉപജ്ഝായോ വാ ആചരിയോ വാ’’തി കം നാമ ഉദ്ദിസേയ്യന്തി.

ദേസനാവസാനേ ഉപകോ ആജീവകോ തഥാഗതസ്സ വചനം നേവാഭിനന്ദി, ന പടിക്കോസി. സീസം പന ചാലേത്വാ ജിവ്ഹം നില്ലാളേത്വാ ഏകപദികമഗ്ഗം ഗഹേത്വാ അഞ്ഞതരം ലുദ്ദകനിവാസനട്ഠാനം അഗമാസീതി.

ഉപകാജീവകവത്ഥു നവമം.