൧൦. സമ്ബഹുലസീലാദിസമ്പന്നഭിക്ഖുവത്ഥു

ന സീലബ്ബതമത്തേനാതി ഇമം ധമ്മദേസനം സത്ഥാ ജേതവനേ വിഹരന്തോ സമ്ബഹുലേ സീലാദിസമ്പന്നേ ഭിക്ഖൂ ആരബ്ഭ കഥേസി.

തേസു കിര ഏകച്ചാനം ഏവം അഹോസി – ‘‘മയം സമ്പന്നസീലാ, മയം ധുതങ്ഗധരാ, മയം ബഹുസ്സുതാ, മയം പന്തസേനാസനവാസിനോ, മയം ഝാനലാഭിനോ, ന അമ്ഹാകം അരഹത്തം ദുല്ലഭം, ഇച്ഛിതദിവസേയേവ അരഹത്തം പാപുണിസ്സാമാ’’തി. യേപി തത്ഥ അനാഗാമിനോ, തേസമ്പി ഏതദഹോസി – ‘‘ന അമ്ഹാകം ഇദാനി അരഹത്തം ദുല്ലഭ’’ന്തി. തേ സബ്ബേപി ഏകദിവസം സത്ഥാരം ഉപസങ്കമിത്വാ വന്ദിത്വാ നിസിന്നാ ‘‘അപി നു ഖോ വോ, ഭിക്ഖവേ, പബ്ബജിതകിച്ചം മത്ഥകം പത്ത’’ന്തി സത്ഥാരാ പുട്ഠാ ഏവമാഹംസു – ‘‘ഭന്തേ, മയം ഏവരൂപാ ഏവരൂപാ ച, തസ്മാ ‘ഇച്ഛിതിച്ഛിതക്ഖണേയേവ അരഹത്തം പത്തും സമത്ഥമ്ഹാ’തി ചിന്തേത്വാ വിഹരാമാ’’തി.

സത്ഥാ തേസം വചനം സുത്വാ, ‘‘ഭിക്ഖവേ, ഭിക്ഖുനാ നാമ പരിസുദ്ധസീലാദിമത്തകേന വാ അനാഗാമിസുഖപ്പത്തമത്തകേന വാ ‘അപ്പകം നോ ഭവദുക്ഖ’ന്തി വത്തും ന വട്ടതി, ആസവക്ഖയം പന അപ്പത്വാ ‘സുഖിതോമ്ഹീ’തി ചിത്തം ന ഉപ്പാദേതബ്ബ’’ന്തി വത്വാ ഇമാ ഗാഥാ അഭാസി –

൨൭൧. ‘‘ന സീലബ്ബതമത്തേന, ബാഹുസച്ചേന വാ പന;

അഥ വാ സമാധിലാഭേന, വിവിത്തസയനേന വാ.

൨൭൨. ‘‘ഫുസാമി നേക്ഖമ്മസുഖം, അപുഥുജ്ജനസേവിതം;

ഭിക്ഖു വിസ്സാസമാപാദി, അപ്പത്തോ ആസവക്ഖയ’’ന്തി.

തത്ഥ സീലബ്ബതമത്തേനാതി ചതുപാരിസുദ്ധിസീലമത്തേന വാ തേരസധുതങ്ഗമത്തേന വാ. ബാഹുസച്ചേന വാതി തിണ്ണം പിടകാനം ഉഗ്ഗഹിതമത്തേന വാ. സമാധിലാഭേനാതി അട്ഠസമാപത്തിയാ ലാഭേന. നേക്ഖമ്മസുഖന്തി അനാഗാമിസുഖം. തം അനാഗാമിസുഖം ഫുസാമീതി ഏത്തകമത്തേന വാ. അപുഥുജ്ജനസേവിതന്തി പുഥുജ്ജനേഹി അസേവിതം അരിയസേവിതമേവ. ഭിക്ഖൂതി തേസം അഞ്ഞതരം ആലപന്തോ ആഹ. വിസ്സാസമാപാദീതി വിസ്സാസം ന ആപജ്ജേയ്യ. ഇദം വുത്തം ഹോതി – ഭിക്ഖു ഇമിനാ സമ്പന്നസീലാദിഭാവമത്തകേനേവ ‘‘മയ്ഹം ഭവോ അപ്പകോ പരിത്തകോ’’തി ആസവക്ഖയസങ്ഖാതം അരഹത്തം അപ്പത്തോ ഹുത്വാ ഭിക്ഖു നാമ വിസ്സാസം നാപജ്ജേയ്യ. യഥാ ഹി അപ്പമത്തകോപി ഗൂഥോ ദുഗ്ഗന്ധോ ഹോതി, ഏവം അപ്പമത്തകോപി ഭവോ ദുക്ഖോതി.

ദേസനാവസാനേ തേ ഭിക്ഖൂ അരഹത്തേ പതിട്ഠഹംസു, സമ്പത്താനമ്പി സാത്ഥികാ ധമ്മദേസനാ അഹോസീതി.

സമ്ബഹുലസീലാദിസമ്പന്നഭിക്ഖുവത്ഥു ദസമം.

ധമ്മട്ഠവഗ്ഗവണ്ണനാ നിട്ഠിതാ.

ഏകൂനവീസതിമോ വഗ്ഗോ.