൧൨. സുഭദ്ദപരിബ്ബാജകവത്ഥു

ആകാസേതി ഇദം ധമ്മദേസനം സത്ഥാ കുസിനാരായം ഉപവത്തനേ മല്ലാനം സാലവനേ പരിനിബ്ബാനമഞ്ചകേ നിപന്നോ സുഭദ്ദം പരിബ്ബാജകം ആരബ്ഭ കഥേസി.

സോ കിര അതീതേ കനിട്ഠഭാതരി ഏകസ്മിം സസ്സേ നവക്ഖത്തും അഗ്ഗദാനം ദേന്തേ ദാനം ദാതും അനിച്ഛന്തോ ഓസക്കിത്വാ അവസാനേ അദാസി. തസ്മാ പഠമബോധിയമ്പി മജ്ഝിമബോധിയമ്പി സത്ഥാരം ദട്ഠും നാലത്ഥ. പച്ഛിമബോധിയം പന സത്ഥു പരിനിബ്ബാനകാലേ ‘‘അഹം തീസു പഞ്ഹേസു അത്തനോ കങ്ഖം മഹല്ലകേ പരിബ്ബാജകേ പുച്ഛിത്വാ സമണം ഗോതമം ‘ദഹരോ’തി സഞ്ഞായ ന പുച്ഛിം, തസ്സ ച ദാനി പരിനിബ്ബാനകാലോ, പച്ഛാ മേ സമണസ്സ ഗോതമസ്സ അപുച്ഛിതകാരണാ വിപ്പടിസാരോ ഉപ്പജ്ജേയ്യാ’’തി സത്ഥാരം ഉപസങ്കമിത്വാ ആനന്ദത്ഥേരേന നിവാരിയമാനോപി സത്ഥാരാ ഓകാസം കത്വാ, ‘‘ആനന്ദ, മാ സുഭദ്ദം നിവാരയി, പുച്ഛതു മം പഞ്ഹ’’ന്തി വുത്തേ അന്തോസാണിം പവിസിത്വാ ഹേട്ഠാമഞ്ചകേ നിസിന്നോ, ‘‘ഭോ സമണ, കിം നു ഖോ ആകാസേ പദം നാമ അത്ഥി, ഇതോ ബഹിദ്ധാ സമണോ നാമ അത്ഥി, സങ്ഖാരാ സസ്സതാ നാമ അത്ഥീ’’തി ഇമേ പഞ്ഹേ പുച്ഛി. അഥസ്സ സത്ഥാ തേസം അഭാവം ആചിക്ഖന്തോ ഇമാഹി ഗാഥാഹി ധമ്മം ദേസേസി –

൨൫൪. ‘‘ആകാസേവ പദം നത്ഥി, സമണോ നത്ഥി ബാഹിരേ;

പപഞ്ചാഭിരതാ പജാ, നിപ്പപഞ്ചാ തഥാഗതാ.

൨൫൫. ‘‘ആകാസേവ പദം നത്ഥി, സമണോ നത്ഥി ബാഹിരേ;

സങ്ഖാരാ സസ്സതാ നത്ഥി, നത്ഥി ബുദ്ധാനമിഞ്ജിത’’ന്തി.

തത്ഥ പദന്തി ഇമസ്മിം ആകാസേ വണ്ണസണ്ഠാനവസേന ഏവരൂപന്തി പഞ്ഞാപേതബ്ബം കസ്സചി പദം നാമ നത്ഥി. ബാഹിരേതി മമ സാസനതോ ബഹിദ്ധാ മഗ്ഗഫലട്ഠോ സമണോ നാമ നത്ഥി. പജാതി അയം സത്തലോകസങ്ഖാതാ പജാ തണ്ഹാദീസു പപഞ്ചേസുയേവാഭിരതാ. നിപ്പപഞ്ചാതി ബോധിമൂലേയേവ സബ്ബപപഞ്ചാനം സമുച്ഛിന്നത്താ നിപ്പപഞ്ചാ തഥാഗതാ. സങ്ഖാരാതി പഞ്ചക്ഖന്ധാ. തേസു ഹി ഏകോപി സസ്സതോ നാമ നത്ഥി. ഇഞ്ജിതന്തി ബുദ്ധാനം പന തണ്ഹാമാനാദീസു ഇഞ്ജിതേസു യേന സങ്ഖാരാ സസ്സതാതി ഗണ്ഹേയ്യ, തം ഏകം ഇഞ്ജിതമ്പി നാമ നത്ഥീതി അത്ഥോ.

ദേസനാവസാനേ സുഭദ്ദോ അനാഗാമിഫലേ പതിട്ഠഹി, സമ്പത്തപരിസായപി സാത്ഥികാ ധമ്മദേസനാ അഹോസീതി.

സുഭദ്ദപരിബ്ബാജകവത്ഥു ദ്വാദസമം.

മലവഗ്ഗവണ്ണനാ നിട്ഠിതാ.

അട്ഠാരസമോ വഗ്ഗോ.