൪. അധോപുപ്ഫിയത്ഥേരഅപദാനവണ്ണനാ

അഭിഭൂ നാമ സോ ഭിക്ഖൂതിആദികം ആയസ്മതോ അധോപുപ്ഫിയത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ സിഖിസ്സ ഭഗവതോ കാലേ കുലഗേഹേ നിബ്ബത്തോ വുദ്ധിപ്പത്തോ ഘരാവാസം സണ്ഠപേത്വാ അപരഭാഗേ കാമേസു ആദീനവം ദിസ്വാ തം പഹായ ഇസിപബ്ബജ്ജം പബ്ബജിത്വാ പഞ്ചാഭിഞ്ഞാഅട്ഠസമാപത്തിലാഭീ ഇദ്ധീസു ച വസീഭാവം പത്വാ ഹിമവന്തസ്മിം പടിവസതി. തസ്സ സിഖിസ്സ ഭഗവതോ അഭിഭൂ നാമ അഗ്ഗസാവകോ വിവേകാഭിരതോ ഹിമവന്തമഗമാസി. അഥ സോ താപസോ തം അഗ്ഗസാവകത്ഥേരം ദിസ്വാ ഥേരസ്സ ഠിതപബ്ബതം ആരുഹന്തോ പബ്ബതസ്സ ഹേട്ഠാതലതോ സുഗന്ധാനി വണ്ണസമ്പന്നാനി സത്ത പുപ്ഫാനി ഗഹേത്വാ പൂജേസി. അഥ സോ ഥേരോ തസ്സാനുമോദനമകാസി. സോപി താപസോ സകസ്സമം അഗമാസി. തത്ഥ ഏകേന അജഗരേന പീളിതോ അപരഭാഗേ അപരിഹീനജ്ഝാനോ തേനേവ ഉപദ്ദവേന ഉപദ്ദുതോ കാലം കത്വാ ബ്രഹ്മലോകപരായനോ ഹുത്വാ ബ്രഹ്മസമ്പത്തിം ഛകാമാവചരസമ്പത്തിഞ്ച അനുഭവിത്വാ മനുസ്സേസു മനുസ്സസമ്പത്തിയോ ച ഖേപേത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിപ്പത്തോ ഭഗവതോ ധമ്മം സുത്വാ പസന്നമാനസോ പബ്ബജിത്വാ നചിരസ്സേവ അരഹാ അഹോസി. സോ അപരഭാഗേ അത്തനോ കതപുഞ്ഞനാമേന അധോപുപ്ഫിയത്ഥേരോതി പാകടോ.

൨൨. സോ ഏകദിവസം അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ അഭിഭൂ നാമ സോ ഭിക്ഖൂതിആദിമാഹ. തത്ഥ സീലസമാധീഹി പരേ അഭിഭവതീതി അഭിഭൂ, ഖന്ധമാരാദിമാരേ അഭിഭവതി അജ്ഝോത്ഥരതീതി വാ അഭിഭൂ, സസന്താനപരസന്താനഗതകിലേസേ അഭിഭവതി വിഹേസേതി വിദ്ധംസേതീതി വാ അഭിഭൂ. ഭിക്ഖനസീലോ യാചനസീലോതി ഭിക്ഖു, ഛിന്നഭിന്നപടധരോതി വാ ഭിക്ഖു. അഭിഭൂ നാമ അഗ്ഗസാവകോ സോ ഭിക്ഖൂതി അത്ഥോ, സിഖിസ്സ ഭഗവതോ അഗ്ഗസാവകോതി സമ്ബന്ധോ.

൨൭. അജഗരോ മം പീളേസീതി തഥാരൂപം സീലസമ്പന്നം ഝാനസമ്പന്നം താപസം പുബ്ബേ കതപാപേന വേരേന ച മഹന്തോ അജഗരസപ്പോ പീളേസി. സോ തേനേവ ഉപദ്ദവേന ഉപദ്ദുതോ അപരിഹീനജ്ഝാനോ കാലം കത്വാ ബ്രഹ്മലോകപരായണോ ആസി. സേസം സബ്ബത്ഥ ഉത്താനമേവാതി.

അധോപുപ്ഫിയത്ഥേരഅപദാനവണ്ണനാ സമത്താ.